Informe di Proclamadornan di Reino

E Bon Nobo di Reino Lo Ser Predicá

PA SIGLONAN e enemigu principal di Dios, Satanas e Diabel, astutamente a usa gobiernunan político i religion falsu den su esfuersonan pa stroba e plamamentu di cristianismo berdadero. Pero e métodonan aki lo fracasá. Jesus a pronosticá cu e “bon nobo di reino aki lo ser predicá [no, “kisas ta ser predicá” of, “lo por ser predicá”] den tur e tera habitá pa un testimonio na tur nacion.”—Mateo 24:14.

E fracaso di Satanas tabata bisto na Grecia. N’e pais ei e Iglesia Griego Ortodox a purba restringuí Testigonan di Jehova di predicá e bon nobo di Reino. Pero, manera e siguiente experencia ta resaltá, na debido tempu e berdadnan di Bijbel ta alcansá hende di curason onrado apesar di oposicion.

Rond di 30 aña pasá, un pastor griego ortodox a aceptá e bon nobo i asta a expresá un deseo pa bira Testigo di Jehova. Sin embargo, miembronan di su famia a oponé fuertemente e paso aki i a pone presion riba dje p’e stop di asociá cu e Testigonan. Pa agradá su famia, el a sigui tras di su carera como pastor; tog, semper el a reconocé cu e Testigonan di Jehova a yud’é siña e berdad i cu el a sacrificá esei a cambio di un posicion di prominencia den un religion falsu.

No obstante, na algun ocasion el a papia na fabor di Testigonan di Jehova ora e oportunidad a presentá. Na vários ocasion el a asta spierta hendenan cu si nan kier a siña e berdadnan di Bijbel, nan mester studia cu e Testigonan. Atrabes di añanan algun en realidad a sigui su recomendacion.

Recientemente e pastor a bira masha malu i a realisá cu pronto lo e por a muri. Miéntras e tabata den hospital, el a manda yama su yunan, i nan tur a reuní rond di su cama.a Anto el a splica nan cu si e muri, nan lo por top’é atrobe. El a papia cu nan tocante e siñansa bíblico di cu hende lo ser resucitá dor di Jehova pa biba den un paradijs riba tera, pero si nan realmente kier mira esei sosodé, nan tabatin cu siña e berdad for di Bijbel i desasociá nan mes for di religion falsu. El a suplicá nan pa asociá cu e Testigonan di Jehova i siña for di nan con pa bira cristiannan berdadero.

Djis despues di esei e pastor a muri. Sin embargo, su conseho di despedida na su yunan a cosechá bon resultado. Su yu muher, mescos cu mayoria miembro di su famia, tabata masha contra Testigonan di Jehova i nan trabou. Pero e no por a ignorá e peticion sincero di su tata muriendo, di manera cu pronto el a drenta den contacto cu Testigonan di Jehova i a cuminsá studia Bijbel. Recientemente e mes a bira un Testigo, dedicando su bida na Jehova Dios i simbolisando su dedicacion mediante bautismo bou di awa.

Na Grecia, i tambe na 230 otro pais, Testigonan di Jehova ta confia riba e poder di Dios su spiritu santu. Ta cu e pleno apoyo di spiritu santu nan ta participá den e cumplimentu di Jesus su profecia: “Boso lo ricibí poder ora e spiritu santu yega riba boso, i boso lo ta testigo di mi tantu den Jerusalem como den henter Hudea i den Samaria i te n’e parti mas lehano dje tera.”—Echo 1:8.

[Notanan]