fInforme di Proclamadornan Di Reino

Alcansando Comunidadnan Remoto di Groenlandia

PA HOPI décadanan Testigonan di Jehova a usa e revistanan Toren di Vigilancia i Spierta! den predicacion dje bon nobo. E revistanan aki ta halsa e sabiduria di Jehova manera e ta ser expresá den su Palabra, e Bijbel. Nan ta vigilá sucesonan mundial cu ta relacioná cu profecia bíblico i nan ta aplicá e conseho razonabel di Bijbel na problemanan contemporáneo.—Santiago 3:17.

Na 1994, Testigonan na Groenlandia a haci un esfuerso special pa ofrecé E Toren di Vigilancia i Spierta! na mas tantu hende cu ta posibel. Durante zomer, nan a haci areglonan pa bishitá algun di e comunidadnan di mas remoto na Groenlandia. Un grupo di proclamadornan di Reino a biaha cu boto mas cu 4.000 kilometer a lo largo dje costa west te na Qaanaaq (Thule), alcansando algun dje comunidadnan di mas na nort dje globo. Nan biahe a dura siete siman. Na e costa oost, un pareha Testigo a alcansá e comunidad na Ittoqqortoormiit i pa promé biaha a cubri esei sistemáticamente cu e bon nobo.

Mas na principio dje aña ei, durante e luna di april, 7.513 copia di E Toren di Vigilancia i Spierta! a ser lagá cu e hendenan di Groenlandia. Esei ta nificá cu, como averahe, cada un di e 127 publicadornan di Reino a laga 59 revista—1 revista pa cada 7 habitante di Groenlandia. E luna ei, Spierta! tabatin un seri di artículo bou dje tema principal “Cancer na Pechu—E Temor di Tur Muher.” Un Testigo, kende a laga 140 revista, a laga copianan dje Spierta! ei cu un reportera di television. Un par di dia despues, un programa di noticia na television a presentá e artículonan riba cancer na pechu. E reportera a mustra e revista na television, mustrando vários página segun cu e tabata elogiá e calidad dje traduccion na idioma groenlandes. Tambe el a resaltá e sugerencianan práctico cu Spierta! a duna como cuido di salú preventivo.

E Testigo cu originalmente a laga e revistanan cu e reportera a ser entrevistá den e mésun programa ei di television. El a contestá un cantidad di pregunta tocante Testigonan di Jehova i a papia tocante e distribucion amplio dje revistanan e luna ei. Tambe el a comentá riba e sabiduria práctico hañá den Bijbel i a indicá cu tal conseho razonabel por yuda nos enfrentá cu éxito e problemanan di awendia.

E programa a concluí cu un entrevista dje presidente dje Sociedad di Cancer di Groenlandia. E presidente a remarcá cu nunca el a mira un material asina excelente i informativo riba e tópico aki den su idioma. Anto el a invitá tur esnan interesá den e tópico di cancer na pechu pa lesa e artículonan di Spierta! El a bisa cu tin bon motibu pa ta gradicidu na Testigonan di Jehova pa nan iniciativa.

Mescos cu na Groenlandia, Testigonan di Jehova rond mundu ta sigui predicá e bon nobo “den tur creacion cu ta bou di cielu.” (Colosensenan 1:23; Echonan 1:8) Usando literatura bíblico, incluyendo E Toren di Vigilancia i Spierta!, nan ta yuda tur clase di hende enfrentá cu éxito problemanan actual i tambe ta duna nan un speransa pa un mihó futuro.

[Mapa na página 8]

(For fully formatted text, see publication)

Qaanaaq (Thule)

Ittoqqortoormiit

Nuuk (Godthåb)