Bo Ta Corda?

Bo a disfrutá dje lesamentu di e edicionnan recien di E Toren di Vigilancia? Si ta asina, lo bo hañ’é interesante pa recordá lo siguiente:

▫ Ta posibel pa alcansá berdad religioso?

Jesucristo a bisa: “Boso lo conocé e berdad, i e berdad lo haci boso liber.” (Juan 8:32) Jesus no solamente a trece padilanti cu ta posibel pa alcansá e berdad, sino a mustra cu hañando e berdad ta ser rekerí den nos adoracion na Dios. El a bisa un muher samaritano: “Berdadero adoradornan lo adorá e Tata cu spiritu i cu berdad.” (Juan 4:23)​—⁠15/4, página 5.

▫ Ken Robert Estienne tabata, i di ki manera el a laga su marca?

Robert Estienne tabata un imprimidor kende a biba den siglo 16. El a dedicá su bida na e publicacion dje Scritura Santu i a haci esfuerso pa revelá e palabranan dje Bijbel manera nan a ser skirbí originalmente. Su sistema pa dividí e texto bíblico den versículonan numerá ta e sistema universalmente usá awe.​—⁠15/4, página 10, 14.

▫ Con nos ta beneficiá for di lesamentu diario di Bijbel?

E Scritura constantemente ta haña un nificacion nobo pa nos, i profecianan relacioná cu e último dianan ta bira mas impresionante den lus di loke nos a mira, tende i experenciá personalmente. Segun cu nos propio experencia den bida ta ser ampliá i nos ta enfrentá problemanan cu éxito, nos ta apreciá mas plenamente e conseho bíblico. (Proverbionan 4:18)​—⁠1/5, página 14.

▫ Con bo por corda textonan bíblico?

Segun bo ta lesa e Bijbel, marca textonan selectá cu abo kier corda, of skirbi nan over riba karchinan i pone e karchinan aki caminda lo bo mira nan tur dia. Segun cu bo ta purba memorisá e versículonan, meditá riba nan i haci uso di nan. No purba memorisá demasiado texto den un solo biaha, tal bes solamente un of dos cada siman.​—⁠1/5, página 16, 17.

▫ Ki informacion e Evangelio di Lucas ta contené adicionalmente na loke e otro escritornan di Evangelio a percurá?

Aunke hopi di loke Lucas a registrá ta similar na e relato di Mateo, 59 porciento ta distinto. Lucas a registrá seis milager cu ta den su buki so i el a raportá mas cu dos biaha e cantidad ei di ilustracionnan di Jesus cu no a ser mencioná dor di otro escritornan di Evangelio.​—⁠15/5, página 12.

▫ Ki rayo sobresaliente di lus di e berdad a ser revelá na 1935?

E aña ei e pueblo di Jehova a bin comprendé cu e multitud grandi mencioná na Revelacion 7:​9, 14 a referí, no na un clase celestial secundario, sino na esnan kende nan speransa ta terenal. (Juan 10:16)​—⁠15/5, página 20.

▫ Den ki maneranan práctico nos por consolá esnan cu a perde un persona stimá?

Scucha. Trankilisá e persona. Sea disponibel. Tuma e iniciativa ora ta apropiado. Skirbi un carta of tarheta consolador. Haci oracion cu nan. (Santiago 5:16) Sigui yuda nan.​—⁠1/6, página 13, 14.

▫ Kico rumannan spiritual por haci pa yuda esnan bibando den famianan dividí pa motibu di religion perseverá?

Papia regularmente palabranan animador, positivo i consolador cu nan. (1 Tesalonicensenan 5:14) Esaki ta actua manera un refrescamentu pa nan mente i curpa. Ora ta práctico i apropiado, incluí nan den bo actividadnan teocrático i social. Incluí nan den bo oracionnan. (Romanonan 1:9; Efesionan 1:16)​—⁠1/6, página 29.

▫ Ki recompensanan ta bini di ehercé pacenshi ora nos ta participá den e ministerio di veld?

Pacenshi ta yuda e publicador di Reino wanta cualkier indiferencia of oposicion. En bes di discutí cu doñonan di cas rabiá, ministernan cu pacenshi lo ta capas pa duna un contesta suave of bai for dje cas trankilamente, reteniendo asina pas i goso. (Mateo 10:​12, 13) Ademas, esnan semehante di carné lo ser atraí n’e mensahe di Reino.​—⁠15/6, página 12.

▫ Pakico conocé berdad bíblico ta asina balioso?

Conociendo e berdad ta libra nos for di mentira, ilusion i supersticion. Ora nos ta biba na armonia cuné, e berdad ta fortalecé nos pa wanta tempu difícil i ta yena nos cu speransa cu ta permití nos permanecé firme bou di prueba.​—⁠1/7, página 8.

▫ Cua responsabilidad principal e congregacion cristian ungí a tuma over for di Israel natural?

E privilegio di duna testimonio di Jehova su grandesa entre e nacionnan. (Isaías 43:21; 1 Pedro 2:⁠9)​—⁠1/7, página 19.

▫ Kico ta ser implicá dor dje palabranan di apostel Pedro cu un esposo mester ‘asigná onor’ na su esposa? (1 Pedro 3:⁠7)

E esposo cu ta onra su esposa no ta humiy’é of rebah’é. Mas bien, e ta demostrá mediante su palabra i obranan​—⁠den privá i den público​—⁠cu e ta apreci’é. (Proverbionan 31:​10-31)​—⁠15/7, página 19.

▫ Pakico por bisa cu ta amoroso pa expulsá un malechor no-repentí for dje congregacion cristian?

Scomulgacion ta un expresion di amor pa Jehova i su camindanan. (Salmo 97:10) E ta mustra amor pa esnan cu ta sigui un curso hustu pasobra e ta kita for di meimei di nan un persona cu lo por ehercé un mal influencia riba nan; esaki tambe ta protehá e puresa dje congregacion. (1 Corintionan 5:​1-13)​—⁠15/7, página 25.

▫ Con por identificá awe e “esclabo fiel i discreto” cu Jesus a papia di dje na Mateo 24:​45-47?

Nan ta ser identificá particularmente dor dje trabou cu nan ta haci percurando publicacionnan basá riba e Bijbel, dor di siña i predicá tocante e “bon nobo aki dje reino,” i dor di nan pegamentu estrecho na e Palabra di Dios, e Bijbel. (Mateo 24:14; 28:​19, 20)​—⁠1/8, página 16.