Tin Angelnan Meimei di Nos?

El a sosodé asina lihé. Absorbá den pensamentu i inconciente di su alrededor, Marilynn a cana trankil subi e spoorbaan di trein. Di ripiente, el a tende un zonidu duru. El a hisa cara wak, i a ripará mesora cu e tabata pará directamente den caminda di un trein cu tabata acercando! Marilynn a vries, paralisá di miedu. E trein tabata asina cerca cu e por a mira e wowonan blou i cara yen di teror dje conductor. Marilynn nunca a lubidá loke a sosodé siguientemente. “Tabata como si fuera un gigante a pushá mi for di patras,” el a bisa. “Mi a ser bentá for dje spoorbaan i a cai djis banda di dje riba e piedranan di carbon.” Un tiki heridá, Marilynn a lanta pa gradicí su rescatador—pero e no a mira ningun hende! Su conclusion? “Mi angel wardador a scapa mi bida,” Marilynn ta bisa. “Ken otro esei por tabata?”

UN MUNDU sképtico di ripiente ta parce obsesioná cu angelnan. Den añanan recien, sernan celestial tabata e tópico di programanan di television, película i asta un obra teatral di Broadway. Bukinan tocante angel ta haltu riba e lista di ‘best-sellernan’ religioso. Tin club, seminario i boletin di angel. Tayernan a ser formá pa yudá bo—manera un artículo ta splik’é—haña “apoyo angelical.”

Comerciantenan oportunista na nan cumbinencia ta probechá dje influencia di movementu di angel promoviendo un fluho interminabel di producto pa consumo. “Cualkier cos cu angel pintá ariba ta manera pan cayente,” un co-doño di un pacus na Merca ta bisa. Ademas di un diluvio di buki tocante angel, e ta mencioná “estatua, borstspel, popchi, T-shirt, poster i tarheta di angel”—tur acumulando loke un reportero ta yama “ganashinan celestial.”

Pero e partidarionan di angel ta insistí cu esaki no ta djis un moda pasahero. Pa apoyá nan pretension, nan ta presentá un testimonio tras di otro—encuentronan “di bida real” cu angelnan. Algun ta bisa cu nan a mira un angel den forma humano. Otronan a mira un lus, a tende un bos, a sinti un presencia, of a sinti un impulso cu tabata, segun nan, angelical. Hopi di nan, manera Marilynn, ta bisa cu un angel a scapa nan bida.

Kico ta sosodiendo? “Mi ta kere cu tin un rebibencia di spiritualidad,” Joan Wester Anderson ta bisa, kende a skirbi dos buki riba encuentronan “sobrenatural.” Alma Daniel, kende a yuda skirbi un otro buki, ta hiba e asuntu un stap mas aleu. E ta bisa cu angelnan tin e “instruccion awor pa haci nan mes conocí di manera cu mas i mas hende por ser alcansá. E motibu cu nos ta mirando asina tantu di nan ta pasobra nan kier pa ta asina. Nan ta haciend’e.”

Esaki ta realmente e caso? Of tin algu otro tras dje fasinacion actual cu angelnan? Pa haña sa, nos mester examiná e Palabra di Dios. Bijbel ta contené e berdad tocante angelnan, manera nos lo mira.

[Plachi Rekonosementu na página 2]

Página 3 i 4: The New Testament: A Pictorial Archive from Nineteenth-Century Sources, di Don Rice/Dover Publications, Inc.