Bo Tin un Angel Wardado?

BO TA kere cu bo tin un angel wardadó? Hopi hende ta kere cu nan tin un. Relacioná cu esaki, hende ta bisa cu un cierto señora den parti west di Cánada tin un don special cu tin di haber cu angel. Si bo dun’é bo nomber completo huntu cu 200 dollar canades, e ta bisa cu e por pon’é bo den contacto cu bo angel wardadó. Promé, e ta meditá dor di concentrá riba un vlam di candela. Despues, e ta haña un vision den cua bo angel ta dun’é un mensahe pa pasa pa bo. Como regalo, e señora ta duná bo un dibuho dje figura di bo angel.

Pa algun hende, esaki kisas ta parce mashá e cuenta tocante Rey Louis IX di Francia. Supuestamente el a cumpra pluma masha caru cu, segun nan di, a cai for dje halanan di Miguel Arcangel. Aunke hopi hende tin nan dudanan den e storia ei, ningun momento so nan no ta duda dje pretensionnan dje señora canades.

Fasinacion cu Angel

Den añanan recien tabatin bastante interes den angel. Television, película, buki, revista i boletin di noticia ta conta nos tocante angelnan cu ta trankilisá esnan cu ta gravemente enfermo, cu ta consolá hende na luto, cu ta impartí sabiduria i cu ta scapa individuonan for di morto. Na Merca, tur siman rond di 20 miyon televidente ta wak un seri na television cu ta mustra con angelnan ta intervení den bida di hende. Un libreria tin un lista di mas cu 400 buki cu ta enfocá riba angel.

Un buki recien ta conta experencia tocante con angelnan wardadó a salba bida di soldánan den combate. Stickernan riba bumper di auto ta declará cu angelnan wardadó ta protehá e automobilista. Organisacion, conferencia i seminarionan ta promové e estudio di angel i, segun nan ta bisa, nan ta yuda hende comunicá cu angel.

Eileen Freeman ta escritor di tres buki tocante angel i publicadó di un revista dedicá exclusivamente na nan. E ta declará: “Mi ta kere cu pa cada angel den shelu tin un angel wardadó riba Tera, un ser kende su tareanan ta no solamente pa alabá Dios den e region celestial, sino realmente cuida sernan humano i otro formanan di bida riba Tera. Nos cada un tin un angel wardadó asigná na nos ora nos ser concibí i e ta cuida nos durante nos crecementu den matris, durante nos nacementu, durante nos bida den e mundu aki, te ora e angel guia nos for dje fronteranan dje mundu aki pa drenta e gloria celestial.” Esaki ta un bon descripcion dje punto di bista popular di angel wardadó.

Den e tempu di ansha i dificultad aki, ta un consuelo pa kere cu nos tin un angel wardadó, kende su tarea ta pa protehá nos. Kico Bijbel, e Palabra di Dios, ta bisa tocante esaki? Nos mester purba comunicá cu angel? Nan ta interesá den nos normanan moral i creencianan religioso? Ki yudansa nos por spera for di nan? E siguiente artículo lo contestá e preguntanan aki.