E berdad tocante angelnan

Birando familiarisá cu un persona generalmente ta incluí siña algu tocante e persona ei su famia. Ta mescos cu yega na conocé Jehova Dios. Mas ta enbolbí cu simplemente siña su nomber. Tambe nos mester yega na conocé algu tocante su “famia” den cielu. (Compará cu Efesionan 3:14, 15.) Bijbel ta yama e angelnan “yunan” di Dios. (Job 1:6) Considerando nan papel importante den Bijbel, nos lo mester kier sa mas tocante nan pa comprendé nan lugá den e propósito di Dios.

UN SUBCULTURA nobo ta desaroyando. No solamente mas i mas hende ta bisa cu nan ta kere den angel; un cantidad aumentante ta afirmando cu nan a ser afectá pa nan den un of otro manera. Ora a puntra 500 mericano, “Bo a yega di sinti personalmente un presencia angelical den bo bida?” casi un tercer parti a contestá cu sí. Sorprendente tambe ta e cantidad di hóbennan cu ta bisa cu nan ta kere den angel—segun un encuesta na Merca, henter un 76 porciento! Claramente, hende ta interesá den angel. Pero con e pensamentu actual tocante angel ta cuadra cu e berdad di Bijbel?

Minimisando e Importancia dje Papel di Satanas

Ora nos ta papia di angel, nos no mester ignorá e angelnan malbado, criaturanan celestial cu manera Bijbel ta bisa a rebelá contra Dios. Esun principal di esakinan ta Satanas. Un buki popular yamá Ask Your Angels [Puntra Bo Angelnan] ta indicá cu Satanas ta meramente “un característica di Dios” cu ta yuda hende fortalecé nan “músculonan spiritual” atrabes di tentacion constante. Apesar di Satanas su “intencionnan amoroso,” e autornan ta bisa, atrabes di siglonan el a ser identificá ekibocadamente cu maldad. Nan ta agregá cu Satanas i Jesus, “aunke nan no ta exactamente complemento di otro, por lo ménos ta n’e mésun banda, ta partinan integral dje mésun persona.” Esakinan ta afirmacionnan asombroso, pero kico Bijbel ta bisa?

Bijbel ta haci cla cu Satanas no ta “un característica di Dios” sino un enemigu di Dios. (Lucas 10:18, 19; Romanonan 16:20) E ta desafiá Jehova su soberania, i su intencionnan pa cu hende ta leu di ta “amoroso.” E ta baha su rabia cruelmente riba Dios su sirbidornan terenal. E ta acusá nan dilanti Dios di dia i anochi!a (Revelacion 12:10, 12, 15-17) Satanas ta dicididu pa corumpí nan cueste loke cueste. Su persecucion sin misericordia dje hustu homber Job a exponé su actitud insensibel pa cu sufrimentu humano.—Job 1:13-19; 2:7, 8.

Leu di ta “n’e mésun banda,” Satanas i Jesus ta enemigu absoluto i completo di otro. Sí, tabata indudablemente Satanas kende a inducí Herodes pa decretá un matansa masal di mucha—tur esei den un esfuerso pa eliminá e mucha chikitu Jesus! (Mateo 2:16-18) I Satanas su atakenan implacabel a sigui te na Jesus su morto. (Lucas 4:1-13; Juan 13:27) Pues, en bes di ta “partinan integral dje mésun persona,” Jesus i Satanas ta completamente opuesto di otro. Profecia di Bijbel ta mustra cu nan enemistad ta inevitabel. (Génesis 3:15) Apropiadamente, ta e Jesus resucitá cu lo destruí Satanas n’e debido tempu di Dios.—Revelacion 1:18; 20:1, 10.

Oracion na Ken?

Algun partidario dje movementu di angel ta recomendá meditacion i otro técnicanan afin di comunicá cu e angelnan. “Un peticion sincero pa contacto cu cualkier miembro dje famia celestial lo no ser ignorá,” un buki ta bisa. “Pidi i lo bo ser contestá.” Miguel, Gabriel, Uriel i Rafael ta entre e angelnan cu e buki ta recomendá pa bo consultá cuné.b

Sin embargo, Jesus a siña su siguidornan pa resa na Dios, no n’e angelnan. (Mateo 6:9, 10) Di igual manera, Pablo a skirbi: “Den tur cos mediante oracion i súplica huntu cu gradicimentu, duna di conocé boso peticionnan na Dios.” (Filipensenan 4:6) P’esei, den nan oracionnan, cristiannan no ta acercá ningun otro persona excepto Jehova, i nan ta haci esei den e nomber di Jesucristo.c—Juan 14:6, 13, 14.

Angelnan Ta Sin Denominacion?

Segun Eileen Elias Freeman, kende ta presidente di AngelWatch Network [Red di Observacion di Angel], “angelnan ta ariba di tur religion, tur filosofia, tur credo. En realidad, angelnan no tin religion manera nos conocé.”

Sin embargo, Bijbel ta mustra claramente cu angelnan fiel sí tin un religion; nan ta adorá e Dios berdadero, Jehova, kende no ta tolerá rivalidad for di otro diosnan. (Deuteronomio 5:6, 7; Revelacion 7:11) Pues, un angel asina a describí su mes na apostel Juan como “un co-esclabo” di esnan cu ta obedecé Dios su mandamentunan. (Revelacion 19:10) Ningun caminda den Bijbel nos ta lesa di angelnan fiel cu ta apoyando cualkier otro forma di adoracion. Nan ta duna Jehova debocion exclusivo.—Exodo 20:4, 5.

“E Tata di Mentira”

Hopi dje asina yamá encuentronan angelical ta enbolbé comunicacion cu e mortonan. “Mi a haña e sintimentu cu mi tio a haña un manera pa alcansá mi i laga mi sa cu finalmente e tabata felis,” un muher yamá Elise ta bisa despues di a ricibí loke el a considerá tabata un señal. Terri, di igual manera ta recordá un amigu stimá cu a muri. “Un siman despues dje entiero,” e ta bisa, “el a yega cerca mi den loke ami a kere tabata un soño. El a bisá mi cu mi no tin nodi lamentá su morto, pasobra e tabata felis i na pas.”

Pero Bijbel ta declará cu e mortonan “no ta conciente di nada en absoluto.” (Eclesiástes 9:5) Tambe e ta bisa cu ora un persona muri, “den e dia ei su pensamentunan di berdad ta perecé.” (Salmo 146:4) Sin embargo, Satanas, ta “e tata di mentira.” (Juan 8:44) E ta esun cu a originá e engaño cu e alma humano ta sigui biba despues di morto. (Compará cu Ezekiel 18:4.) Awe hopi hende ta kere esaki, locual ta cuadra cu Satanas su propósito, pasobra e ta invalidá e necesidad pa fe den e resureccion—un doctrina fundamental di cristianismo. (Juan 5:28, 29) Pues, buscamentu di informacion cerca e mortonan of hañamentu di mensahe aparentemente for di nan ta un otro faceta atrobe dje movementu di angel cu no ta ser aprobá dor di Dios.

Acercamentu na Angel of na Demoño?

Hopi dje movementu actual di angel ta laba den cosnan oculto. Considerá Marcia su experencia. “For di september pa december 1986,” e ta bisa, “mi a cuminsá ricibí mensahenan for di ‘mas ayá cu e tercer dimension.’ Mi a mira aparicionnan i mi tabatin soñonan increibel di un ‘bida anterior.’ Mi a tuma contacto cu amigunan cu a muri i mi tabatin hopi otro experencia síkico den cua mi tabata sa cosnan tocante hende cu mi a caba di topa. Tambe mi a ser bendicioná cu e don di skirbi sin intencion conciente i mi a transmití mensahenan for di personanan sin curpa físico. Algun cu mi nunca a yega di topa den nan bida terenal, tabata entregá mensahenan na otro hende atrabes di mi.”

E uso di adivinacion como un medio pa “comunicá” cu angelnan no ta extraordinario. Un fuente abiertamente ta animá su lectornan pa empleá piedra mágico, wega di carta di destino, moneda chines di I Ching, lesamentu di plant’i man i astrologia. “Permití bo ser di mas interior guiá bo n’e palabra divino corecto,” e autornan ta skirbi, “i confia cu un angel lo topá bo ei.”

Segun Bijbel, sin embargo, kico cu ‘topá bo aya’ siguramente no ta un dje angelnan di Dios. Pakico? Pasobra adivinacion ta directamente contrario cu Dios, i adoradornan berdadero—den cielu i riba tera—no tin nada di haber cuné. Sí, den Israel adivinacion tabata un ofensa capital! “Tur cu ta haci e cosnan aki ta algu detestabel pa Jehova,” e Ley a declará.—Deuteronomio 13:1-5; 18:10-12.

“Un Angel di Lus”

No mester sorprendé nos cu e Diabel por haci adivinacion parce beneficioso, asta angelical. Bijbel ta bisa cu Satanas “ta sigui transformá su mes den un angel di lus.” (2 Corintionan 11:14) E asta por inventá señalnan i despues haci nan sali berdad, engañando esnan cu ta observá pa kere cu e señal ta bini for di Dios. (Compará cu Mateo 7:21-23; 2 Tesalonicensenan 2:9-12.) Pero tur Satanas su obranan—sin importá con birtuoso of con malicioso nan por parce—ta sirbi un dje dos propósitonan aki: pone hende bai contra Jehova of simplemente ciega nan mente pa asina ‘e iluminacion dje glorioso bon nobo tocante Cristo no lusa nan.’ (2 Corintionan 4:3, 4) E último método aki di engaño hopi biaha ta esun mas eficas.

Considerá e relato bíblico di un criá den e promé siglo. Su pronósticonan a trece hopi ganashi pa su doñonan. Pa hopi dia el a sigui e disipelnan, bisando: “E hombernan aki ta esclabonan dje Dios Haltísimo, kendenan ta anunciando na boso e caminda di salbacion.” Su palabranan tabata cierto. Sin embargo, e relato ta bisa nos cu e tabata poseí, no pa un angel, sino pa “un demoño di adivinacion.” Despues di algun tempu, Pablo “a bira i a bisa e spiritu: ‘Mi ta mandá bo den e nomber di Jesucristo pa sali for di dje.’ I el a sali afó mesora.”—Echonan 16:16-18.

Pakico Pablo a expulsá e spiritu aki? Al fin i al cabo, el a percurá hopi entrada p’e doñonan dje hobencita poseí pa demoño. Cu podernan sobrenatural, e criá por a bisa cunukeronan ki tempu pa planta, mosanan ki ora pa casa, i mineronan unda pa busca oro. Figurá bo, e spiritu aki asta a impulsá e hobencita pa papia algun palabra dje berdad, alabando e disipelnan públicamente!

No obstante, e tabata “un demoño di adivinacion.” Como tal, e no tabatin derecho di haci proclamacionnan tocante Jehova i su percuracion pa salbacion. Su abla faborabel, tal bes pa duna crédito n’e pronósticonan dje criá, a distraé mirónes for di Cristo su siguidornan berdadero. Cu bon motibu, Pablo a spierta e corintionan: “Boso no por ta participando dje ‘mesa di Jehova’ i dje mesa di demoñonan.” (1 Corintionan 10:21) No ta un sorpresa anto cu e cristiannan di promé siglo a destruí tur nan bukinan cu tabata asociá cu adivinacion.—Echonan 19:19.

Un “Angel Bulando Meimei di Cielu”

Manera nos a mira, Bijbel ta exponé hopi dje movementu actual di angel como siendo estrechamente ligá cu e Adversario di Dios, Satanas e Diabel. Esaki ta nificá cu angelnan santu no ta enbolbí den asuntunan humano? Al contrario, actualmente nan ta realisando un trabou poderoso riba tera. Cua esei ta? Pa contestá esei, nos tin cu acudí n’e buki bíblico di Revelacion. E angelnan ta ser mencioná mas biaha den e buki aki cu den cualkier otro buki di Bijbel.

Na Revelacion 14:6, 7, nos ta lesa e registro di apostel Juan di un vision profético cu el a ricibí: “Mi a mira un otro angel bulando meimei di cielu, i e tabatin bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo, bisando na bos haltu: ‘Teme Dios i dun’é gloria, pasobra e ora di huicio mediante dje a yega, i pues adorá Esun cu a traha e cielu i e tera i laman i fonteinnan di awa.’ ”

E texto aki ta resaltá e trabou di mas principal dje angelnan awe. Nan ta enbolbí den un asignacion di un prioridad masha haltu—esun di declará e bon nobo dje Reino di Dios. Tabata relacioná cu e trabou aki cu Jesus a primintí su siguidornan: “Mi ta cu boso tur dia te na e conclusion dje sistema di cosnan.” (Mateo 28:18-20) Den ki manera Jesus ta cu su siguidornan? Un manera ta dor di percurá yudansa angelical pa nan p’e trabou monumental aki por ser cumplí.

Testigonan di Jehova ta dedicá mas cu mil miyon ora pa aña predicando e bon nobo dje Reino di Dios. Segun cu nan ta haci e trabou aki, nan ta mira evidencia di guia angelical. Den nan ministerio di cas-pa-cas, hopi biaha a sosodé cu nan ta drenta den contacto cu individuonan cu net tabata pidiendo den oracion pa un hende yuda nan comprendé e propósitonan di Dios. Guia angelical, huntu cu e propio iniciativa dje Testigonan, a resultá den cientos di miles di persona cu ta yega na conocé Jehova cada aña!

Bo ta scucha n’e angel bulando meimei di cielu? Ora Testigonan di Jehova yama na bo cas, pakico no considerá mas plenamente cu nan e mensahe angelical aki?

[Notanan]

[Kuadro na página 8]

KEN E ANGELNAN TA?

CONTRARIO na loke hopi hende ta kere, angelnan no ta e almanan defuntu di hende cu a muri. Bijbel ta declará claramente cu e mortonan “no ta conciente di nada en absoluto.” (Eclesiástes 9:⁠5) Di unda, anto, e angelnan a bini? Bijbel ta indicá cu nan a ser creá individualmente pa Dios promé cu e fundamentu dje tera. (Job 38:​4-7) E tamaño dje famia celestial di Dios por ta di cientos di miyones di angel, tal bes miles di miyones of mas! Algun angel a uni cu Satanas den su rebelion.​—⁠Daniel 7:10; Revelacion 5:11; 12:​7-9.

Siendo cu Jehova ta un Dios di ordu, no ta un sorpresa cu su inmenso famia angelical ta organisá.​—⁠1 Corintionan 14:⁠33.

• E angel di mas principal, tantu na poder como auto­ridad, ta e arcangel, Jesucristo, yamá tambe Miguel. (1 Tesalonicensenan 4:16; Hudas 9) Bou di su autoridad tin serafin, kerubin i angelnan.

• Serafinnan ta sirbi n’e trono di Dios. Nan asignacion evidentemente ta enbolbé declará Dios su santidad i tene su pueblo limpi.​—⁠Isaías 6:​1-3, 6, 7.

• Kerubinnan tambe ta ser mirá den Jehova su presencia. Como cargadornan of escoltanan dje trono di Dios, nan ta apoyá Jehova su mahestad.​—⁠Salmo 80:1; 99:1; Ezekiel 10:1, 2.

• Angelnan (nificando “mensaheronan”) ta agentenan di Jehova. Nan ta cumpli cu e boluntad divino, sea cu esei ta ­enbolbé liberacion dje pueblo di Dios of e likidacion dje malbadonan.​—⁠Génesis 19:​1-26.

[Plachi na página 7]

Bo ta scucha n’e angel bulando meimei di cielu?