Pakico Adoracion Berdadero Ta Ricibi e Bendicion di Dios

“Boso, alabá Jah! Salbacion i gloria i poder ta pertenecé na nos Dios, pasobra su huicionan ta berdadero i hustu.”—REVELACION 19:1, 2.

1. Con Babilonia e Grandi lo yega na su fin?

“BABILONIA E GRANDI” a cai den bista di Dios i awor ta enfrentá extincion. Profecia di Bijbel ta indicá cu e muher di mala bida religioso aki cu alcanse mundial pronto lo ser ehecutá dor di su freinan político; su fin lo ta di ripiente i rápido. Jesus su revelacion na Juan a contené e palabranan profético aki: “Un angel fuerte a hisa un piedra manera un piedra grandi di mulina i a tir’é den laman, bisando: ‘Asina cu un lansamentu rápido Babilonia e gran stad lo ser tirá abou, i nunca mas lo e ser hañá atrobe.’”—Revelacion 18:2, 21.

2. Con Jehova su sirbidornan lo reaccioná riba e destruccion di Babilonia?

² Algun elemento dje mundu di Satanas lo lamentá e destruccion di Babilonia e Grandi, pero ni Dios su sirbidornan celestial ni esnan terenal siguramente lo no lamentá esei. Nan gritu gososo na Dios lo ta: “Boso, alabá Jah! Salbacion i gloria i poder ta pertenecé na nos Dios, pasobra su huicionan ta berdadero i hustu. Pasobra el a ehecutá huicio riba e gran muher di mala bida cu a corumpí e tera cu su fornicacion, i el a venga e sanger di su esclabonan na su man.”—Revelacion 18:9, 10; 19:1, 2.

Ki Fruta Religion Berdadero Mester Producí?

3. Ki preguntanan ta rekerí un contesta?

³ Siendo cu e tera mester ser hací limpi di religion falsu, ki clase di adoracion lo permanecé? Con nos por determiná awe cua grupo religioso lo sobrebibí e destruccion di Satanas su imperio mundial di religion falsu? Kico ta e fruta hustu cu e grupo aki mester producí? Tin por lo ménos dies marca di identificacion pa distinguí Jehova su adoracion berdadero.—Malakías 3:18; Mateo 13:43.

4. Kico ta un promé rekisito pa adoracion berdadero, i con Jesus a pone e ehempel en coneccion cu esaki?

⁴ Promé i riba tur otro cos, cristiannan berdadero mester apoyá e soberania pa cua Jesus a muri—e soberania di su Tata. Jesus no a entregá su bida pa ningun causa político, tribal, étnico of social. El a pone e Reino di su Tata dilanti tur aspiracion político of revolucionario dje hudiunan. El a contestá Satanas su oferta pa poder mundial cu e palabranan: “Bai for di mi, Satanas! Pasobra ta pará skirbí, ‘Ta Jehova bo Dios bo tin cu adorá, i ta na dje so bo tin cu rindi sirbishi sagrado.’” E tabata sa for dje Scritura Hebreo cu Jehova ta e Soberano berdadero riba henter e tera. Cua grupo religioso ta apoyá inekibocablemente Jehova su gobernacion mas bien cu e sistemanan político dje mundu aki?—Mateo 4:10; Salmo 83:18.

5. (a) Con adoradornan berdadero mester mira e nomber di Dios? (b) Kico ta mustra cu Testigonan di Jehova ta onra e nomber ei?

⁵ Un di dos rekisito ta cu adoracion berdadero mester engrandecé i santificá e nomber di Dios. E Todopoderoso a revelá su nomber, Jehova (traducí como Yahweh den algun version di Bijbel), na su pueblo Israel, i e ta ser usá miles di biaha den e Scritura Hebreo. Asta promé cu esei, Adam, Eva i otronan tabata conocé e nomber, aunke nan no semper a respet’é. (Génesis 4:1; 9:26; 22:14; Exodo 6:2) Miéntras traductornan di cristiandad i di hudiu generalmente a omití e nomber divino for di nan Bijbelnan, Testigonan di Jehova a duna e nomber ei su debido posicion i respet den e Traducción del Nuevo Mundo de las Santas Escrituras. Nan ta onra e nomber ei, mescos cu e cristiannan di promé a haci. Santiago a duna e siguiente testimonio: “Simeon a conta cabalmente con Dios pa promé biaha a dirigí su atencion n’e nacionnan p’e saca for di nan un pueblo pa su nomber. I cu esaki e palabranan dje Profetanan ta concordá, . . . ‘pa esnan cu ta resta dje hendenan por busca Jehova cu sinceridad, huntu cu hende di tur e nacionnan, hende cu ta yamá pa mi nomber, Jehova ta bisa, cu ta haciendo e cosnan aki.’”—Echonan 15:14-17; Amos 9:11, 12.

6. (a) Kico ta un di tres rekisito pa adoracion berdadero? (b) Con Jesus i Daniel a enfatisá gobernacion di Reino (Lucas 17:20, 21)

⁶ Un di tres rekisito pa adoracion berdadero ta cu e mester engrandecé e Reino di Dios como e único solucion legítimo i factibel pa humanidad su problemanan di gobernacion. Jesus claramente a siña su siguidornan pa pidi p’e Reino ei bini, p’e gobernacion di Dios tuma mando riba e tera. Daniel a ser inspirá pa profetisá tocante e último dianan: “E Dios di shelu lo establecé un reino cu hamas lo ser reducí na ruina. . . . Lo e aplastá i pone un fin na tur e reinonan [mundano, político] aki, i e mes lo permanecé pa tempu indefiní.” Ken a mustra mediante nan curso di accion den e siglo 20 aki cu nan ta duna sosten exclusivo n’e Reino ei—e religionnan di Babilonia e Grandi of Testigonan di Jehova?—Daniel 2:44; Mateo 6:10; 24:14.

7. Con adoradornan berdadero ta mira Bijbel?

⁷ Un di cuater rekisito pa haña e aprobacion di Dios ta cu e sirbidornan berdadero di Dios mester apoyá Bijbel como e Palabra inspirá di Dios. P’esei nan lo no bira víctima di esnan cu ta criticá su autenticidad, cu ta purba reducí Bijbel na un simpel obra literario humano cu tur e deficiencianan cu esei lo a enbolbé. Testigonan di Jehova ta kere cu Bijbel ta e Palabra inspirá di Dios, net manera Pablo a skirbi Timoteo: “Tur e Scritura ta inspirá di Dios i ta probechoso pa siña, pa reprendé, pa rectificá cosnan, pa disipliná den husticia, p’e homber di Dios por ta plenamente competente, completamente ekipá pa tur bon obra.”a P’esei, Testigonan di Jehova ta aceptá Bijbel como nan guia, nan manual p’e bida di tur dia, i nan fuente di speransa pa futuro.—2 Timoteo 3:16, 17.

E Religion Identificá pa Amor, No Odio

8. Kico ta un di cincu rekisito pa adoracion berdadero?

⁸ Con Jesus a distinguí su berdadero siguidornan? Su contesta ta hiba nos na un di cincu marca vital di identificacion di adoracion berdadero. Jesus a bisa: “Mi ta duna boso un mandamentu nobo, pa boso stima un e otro; mescos cu ami a stima boso, pa boso tambe stima un e otro. Cu esaki tur lo sa cu boso ta mi disipelnan, si boso tin amor entre boso.” (Juan 13:34, 35) Con Jesus a demostrá su amor? Dunando su bida como un sacrificio di rescate. (Mateo 20:28; Juan 3:16) Pakico amor genuino ta un cualidad esencial pa cristiannan berdadero? Juan a splica: “Stimánan, laga nos sigui stima otro, pasobra amor ta bini for di Dios . . . Esun cu no ta stima no a yega na conocé Dios, pasobra Dios ta amor.”—1 Juan 4:7, 8.

9. Ken a demostrá berdadero amor, i con?

⁹ Ken den nos tempu a desplegá e clase di amor aki, asta ora nan tabata confrontá cu odio racial, nacional of étnico? Ken a pasa e prueba supremo, asta te na morto, pa nan amor prevalecé? Nos por bisa cu ta e pastornan i soeurnan católico cu a admití di ta carga parti dje responsabilidad p’e genocido cu a tuma lugá na Ruanda na 1994? Ta e ortodoxnan di Serbia of e católiconan di Croacia cu a participá den “purificacion étnico” i otro actonan no-cristian den e guera civil ei den e paisnan di Balkan? Of ta e clero católico of protestant cu a waya e vlamnan di prehuicio i odio na Nort Irlanda durante e último par di décadanan? Siguramente Testigonan di Jehova no por ser acusá di a participá den ningun conflicto asina. Nan a preferá di sufri den prizonnan i camponan di concentracion, asta te na morto, cu traicioná nan amor cristian.—Juan 15:17.

10. Pakico cristiannan berdadero ta keda neutral?

¹⁰ Un di seis rekisito pa adoracion cu ta aceptabel pa Dios ta esun di neutralidad relacioná cu asuntunan político dje mundu aki. Pakico cristiannan mester keda neutral den política? Pablo, Santiago i Juan ta duna nos motibu sólido p’e posicion ei. Apostel Pablo a skirbi cu Satanas ta “e dios dje sistema di cosnan aki,” kende ta ciegando mente dje incrédulonan usando tur medio posibel, incluyendo política divisivo. Disipel Santiago a declará cu “amistad cu e mundu ta enemistad cu Dios,” i apostel Juan a bisa cu “henter e mundu ta drumí den poder dje malbado.” P’esei, un cristian berdadero no por comprometé su debocion na Dios dor di enbolbé su mes den Satanas su mundu corupto di política i poder.—2 Corintionan 4:4; Santiago 4:4; 1 Juan 5:19.

11. (a) Con cristiannan ta mira guera? (b) Ki base bíblico tin p’e posicion aki? (2 Corintionan 10:3-5)

¹¹ En bista dje dos rekisitonan anterior, un di shete ta bira obvio, esta, cu berdadero adoradornan cristian no mester participá den guera. Siendo cu e religion berdadero ta un hermandad mundial basá riba amor, anto nada por dividí of trastorná ‘henter e asociacion ei di . . . rumannan den e mundu.” Jesus a siña amor, no odio; pas, no guera. (1 Pedro 5:9; Mateo 26:51, 52) E mésun “malbado,” Satanas, kende a inducí Cain pa mata Abel, ta sigui sembra odio entre humanidad i provocá conflicto i dramamentu di sanger riba e base di divisionnan político, religioso i étnico. Cristiannan berdadero ‘no ta siña di guera mas,’ sin importá e prijs cu nan tin cu paga. Den un manera figurativo, ya nan a ‘bati nan spada na ploeg i nan lansa na sker di corta mata.’ Nan ta producí e fruta pacífico dje spiritu di Dios.—1 Juan 3:10-12; Isaías 2:2-4; Galationan 5:22, 23.

Dios Ta Bendicioná Conducta i Siñansa Puru

12. (a) Kico ta e di ocho rekisito, pero ki divisionnan religioso bo por mencioná? (b) Con Pablo a resaltá e di ocho rekisito aki?

¹² Unidad cristian ta e di ocho rekisito di adoracion berdadero. Sin embargo, cristiandad su religionnan divisivo no a contribuí na esei. Hopi asina yamá denominacionnan principal a parti na pida pida den un variedad di sectanan, i esei a resultá den confusion. Tuma, por ehempel, e religion bautista na Merca, cu ta partí entre Bautistanan di Nort (Iglesianan Bautista Mericano) i Bautistanan di Sur (Hunta di Bautista di Sur) i tambe decenas di otro gruponan bautista cu ta resultado di desunionnan. (World Christian Encyclopedia, página 714) Hopi division a originá for di diferencianan di doctrina of mando di iglesia (por ehempel, presbiteriano, episcopal, congregacional). E divisionnan di cristiandad ta ser igualá dor di esnan di religionnan pafó di cristiandad—sea ta budismo, islam of hinduismo. Kico apostel Pablo a consehá e cristiannan di promé? “Awor mi ta exhortá boso, rumannan, p’e nomber di nos Señor Jesucristo pa boso tur papia di acuerdo, i pa no tin division entre boso, sino pa boso ta aptamente uní den e mésun mente i den e mésun forma di pensa.”—1 Corintionan 1:10; 2 Corintionan 13:11.

13, 14. (a) Kico ta nificá ‘ser santu’? (b) Con adoracion berdadero ta ser tené limpi?

¹³ Cua ta un di nuebe rekisito pa religion cu Dios ta aprobá? Un principio bíblico ta ser expresá na Levítico 11:45: “Boso tin cu resultá di ta santu, pasobra ami ta santu.” Apostel Pedro a ripití e rekisito aki ora el a skirbi: “Di acuerdo cu e Santu cu a yama boso, boso tambe bira santu den tur boso conducta.”—1 Pedro 1:15.

¹⁴ Kico e necesidad aki pa ta santu ta encerá? Cu Jehova su adoradornan mester ta spiritualmente i moralmente limpi. (2 Pedro 3:14) No tin lugá pa pecadornan deliberá no-repentí, cu mediante nan conducta ta mustra menosprecio p’e sacrificio di rescate di Cristo. (Hebreonan 6:4-6) Jehova ta rekerí p’e congregacion cristian ser tené limpi i santu. Con esei ta ser lográ? En parte, dor dje proceso hudicial di scomulgá esnan cu di otro manera lo contaminá e congregacion.—1 Corintionan 5:9-13.

15, 16. Ki cambionan hopi cristian a haci den nan bida?

¹⁵ Promé cu hopi hende a conocé e berdad cristian, nan a hiba un bida moralmente desenfrená, concentrá riba placer egoista i interes propio. Pero e palabra tocante Cristo a cambia nan, i nan a obtené pordon pa nan picánan. Pablo a expres’é den un manera poderoso ora el a skirbi: “Kico! Boso no sa cu personanan inhustu lo no heredá e Reino di Dios? No sea engañá. Ni fornicadornan, ni idólatranan, ni adúlteronan, ni hombernan wardá pa propósitonan innatural ni hombernan cu ta drumi cu homber, ni ladronnan, ni personanan haragan, ni burachénan, ni zundradornan, ni practicantenan di extorsion lo heredá e Reino di Dios. I sin embargo esei ta loke algun di boso tabata. Pero boso a ser labá limpi.”—1 Corintionan 6:9-11.

¹⁶ Ta bisto cu Jehova ta aprobá di esnan cu ta repentí di nan conducta no-bíblico, ta combertí i ta bira berdadero siguidornan di Cristo i su siñansanan. Nan berdaderamente ta stima nan próhimo mescos cu nan mes i ta demostrá esei den hopi manera, tal como dor di persistí den un ministerio cu ta ofrecé e mensahe di bida na tur cu lo tende.—2 Timoteo 4:5.

“E Berdad Lo Haci Boso Liber”

17. Kico ta un di dies rekisito pa adoracion berdadero? Duna ehempel.

¹⁷ Tin un di dies rekisito cu Jehova tin pa esnan cu ta ador’é den spiritu i den berdad—siñansa puru. (Juan 4:23, 24) Jesus a bisa su siguidornan: “Boso lo conocé e berdad, i e berdad lo haci boso liber.” (Juan 8:32) E berdad di Bijbel ta libra nos for di doctrinanan cu ta desonrá Dios, manera e inmortalidad di alma, fiernu di candela i purgatorio. (Eclesiástes 9:5, 6, 10; Ezekiel 18:4, 20) E ta libra nos for di cristiandad su misterio babilónico di “Santísima Trinidad.” (Deuteronomio 4:35; 6:4; 1 Corintionan 15:27, 28) Obedencia n’e berdad di Bijbel ta resultá den hende amoroso, interesá den otro, bondadoso i misericordioso. Cristianismo berdadero hamas a promové inkisitornan vengativo i intolerante, manera Tomás de Torquemada, of instigadornan odioso di guera, manera e promotornan papal dje crusadanan. Sin embargo, Babilonia e Grandi a producí e clase di fruta aki atrabes di historia, for di por lo ménos e tempu di Nimrod te awor.—Génesis 10:8, 9.

Un Nomber cu Ta Distintivo

18. (a) Ken ta yena e dies rekisitonan pa adoracion berdadero i con? (b) Kico nos individualmente mester haci pa heredá e bendicion cu tin nos dilanti?

¹⁸ Ken awe realmente ta cumpli cu e dies rekisitonan aki di adoracion berdadero? Ken ta conocí i reconocí dor di otronan pa nan registro di integridad i conducta pacífico? Rond mundu Testigonan di Jehova ta conocí p’e echo cu nan ‘no ta parti dje mundu.’ (Juan 15:19; 17:14, 16; 18:36) Jehova su pueblo tin e onor di carga su nomber i di ser su Testigonan, mescos cu Jesucristo tabata un testigo fiel pa su Tata. Nos ta carga e nomber santu ei, conciente di nos responsabilidad pa biba na armonia cu loke e ta representá. I, como su Testigonan, ki un prospecto glorioso tin nos dilanti! Esei ta pa ser parti di un famia humano uní obediente, adorando e Soberano Universal den un paradijs restorá aki riba tera. Pa ricibí un bendicion asina, laga nos sigui identificá nos mes claramente cu e adoracion berdadero i carga e nomber Testigonan di Jehova cu orguyo “pasobra su huicionan ta berdadero i hustu”!—Revelacion 19:2; Isaías 43:10-12; Ezekiel 3:11.

[Nota]

Con Lo Bo Contestá?

◻ Con Jehova su sirbidornan ta mira e destruccion di Babilonia e Grandi?

◻ Cua ta rekisitonan clave pa adoracion berdadero?

◻ Con e berdad ta hací bo liber?

◻ Ki onor special nos tin como Testigonan di Jehova?

[Plachi na página 17]

Testigonan di Jehova ta predicando i siñando e bon nobo dje Reino di Dios

[Plachi na página 18]

Cristiannan berdadero semper a keda neutral pa loke ta política di mundu i guera

[Rekonosementu]

Avion: Pa cortesia di Ministerio di Defensa, Lónden