Jehova A Resulta di Ta cu Mi
MANERA MAX HENNING A RELAT’E
Tabata aña 1933, i Adolf Hitler a caba di subi na poder na Alemania. Sin embargo, e rond di 500 Testigonan di Jehova den e área di Berlin no a vacilá. Hopi hóben a bira pionero, esta minister di tempu completo, i algun asta a aceptá asignacionnan na otro paisnan europeo. Ami i mi amigu Werner Flatten tabata puntra otro: “Pakico nos ta totobiá, perdiendo nos tempu? Pakico nos no ta sali i traha pionero?”
OCHO dia despues cu mi a nace na 1909, mayornan di criansa amoroso a tumá mi pa cria. Na 1918 nos famia a haña un sla duru ora mi ruman muher chikitu di criansa a muri di ripiente. Djis despues di esei e Studiantenan di Bijbel, manera Testigonan di Jehova tabata conocí e tempu ei, a yama na nos porta, i mi mayornan di criansa gustosamente a aceptá e berdad di Bijbel. Tambe nan a siñá mi apreciá cosnan spiritual.
Mi a concentrá riba mi educacion seglar i mi a bira loodgieter. Pero mas importante, mi a tuma mi posicion spiritualmente. Ami cu Werner a cuminsá traha pionero dia 5 di mei, 1933. Nos tabata bai cu baiskel na un pueblo rond di 100 kilometer pafó di Berlin, unda nos tabata keda i predicá pa dos siman. Anto nos tabata regresá Berlin pa percurá pa cosnan necesario. Despues nos tabata bai bek na nos teritorio di predicacion pa dos siman atrobe.
Nos a aplicá pa sirbi den un otro pais, i na december 1933 nos a ricibí un asignacion na loke e tempu ei tabata Yugoslavia. Sin embargo, promé cu nos por a bai Yugoslavia, nos asignacion a cambia pa Utrecht na Hulanda. Djis despues mi a ser bautisá. Den e dianan ei e rumannan tabata pone ménos énfasis riba bautismo; e ministerio tabata e cos importante. Awor dependencia riba Jehova a bira un rasgo constante den mi bida. Mi a haña hopi consuelo den e palabranan dje salmista bíblico: “Mira! Dios ta mi yudante; Jehova ta entre esnan cu ta sostené mi alma.”—Salmo 54:4.
Trahando Pionero na Hulanda
No hopi tempu despues cu nos a yega Hulanda, nos a ser re-asigná n’e stad di Rotterdam. E tata i un yu homber den e famia cerca ken nos a keda tambe tabata pionero. Un par di luna despues, e rumannan a cumpra un cas grandi na Leersum, un pueblo no muchu leu for di Utrecht, como residencia pa pionero, i ami cu Werner a muda bai ei.
Miéntras cu nos tabata biba den e cas di pionero ei, nos tabata bai cu baiskel na teritorionan den cercania i tabata usa un auto di shete pasahero pa teritorionan mas leu. N’e tempu ei, tabatin solamente un shen Testigo asina den henter Hulanda. Awe, 60 aña despues, e teritorio cu nos a traha for dje cas di pionero ei tin mas cu 4.000 publicador den mas o ménos 50 congregacion!
Nos a traha duru, te cu 14 ora pa dia den e ministerio, i esei a tene nos contentu. Un meta principal tabata pa laga mas tantu literatura posibel. Generalmente nos tabata laga mas cu shen foyeto pa dia cerca esnan interesá. Hacimentu di rebishita i conducí studionan di Bijbel ainda no tabata un parti di nos actividad regular.
Un dia ami cu mi partner tabata trahando den e pueblo di Vreeswijk. Segun cu e tabata dunando testimonio na un homber n’e porta di un forti militar, mi a usa e tempu pa lesa mi Bijbel. E tabata tur marcá cu liña corá i blou. Mas despues, un carpinté cu tabata trahando riba un dak den cercania a avisá e homber n’e porta cu ami probablemente tabata un sorto di spion. Como resultado, e mésun dia ei mi a ser arestá ora mi tabata dunando testimonio na un comerciante, i mi Bijbel a ser confiscá.
Mi a ser hibá corte. Ei, nan a acusá mi cu e liñanan den mi Bijbel tabata un esfuerso pa traha un mapa dje forti. Mi a ser declará culpabel, i e hues a sentenciá mi na dos aña di prizon. Sin embargo, e caso a ser apelá, i mi a ser absolvé. Ki contentu mi tabata pa haña mi libertad, pero mi tabata asta mas contentu ora nan a debolbé mi mi Bijbel cu tur su notanan!
Durante e zomer di 1936, ami cu Richard Brauning, un dje pioneronan den e cas, a pasa e zomer predicando den e parti nort dje pais. E promé luna, nos a pasa 240 ora den e ministerio i a laga gran cantidad di literatura. Nos tabata biba den un tent i a percurá pa tur nos propio necesidadnan, labando nos pañanan nos mes, cushinando, etcétera.
Despues mi a ser transferí p’e boto yamá Lightbearer (Cargador di Lus), cu a bira bon conocí den e parti nort di Hulanda. Cincu pionero tabata biba riba e boto, i cuné nos por a alcansá un cantidad di teritorio isolá.
Privilegionan Adicional
Na 1938, mi a ser asigná pa ser un sirbidor di zona, manera superintendentenan di circuito di Testigonan di Jehova tabata ser yamá e tempu ei. Pues mi a bandoná Lightbearer i a cuminsá bishitá congregacionnan i Testigonan isolá den tres provincia.
Baiskel tabata nos único medio di transporte. Hopi biaha a tuma henter un dia pa biaha di un congregacion of grupo di persona interesá pa otro. Entre e stadnan cu mi a bishitá tabatin Breda, unda mi ta biba awor. N’e tempu ei, Breda no tabatin congregacion i tabatin solamente un pareha Testigo di edad avansá.
Miéntras mi tabata sirbiendo e rumannan na Limburg, mi a ser invitá pa contestá hopi pregunta cu un trahador di mina, yamá Johan Pieper, a hací mi. El a tuma un posicion firme p’e berdad di Bijbel i a bira un predicador yen di curashi. Cuater aña despues el a ser arestá i cerá den un campo di concentracion, unda el a pasa tres aña i mei. Despues di su libertad el a cuminsá predicá celosamente atrobe, i awe ainda e ta un fiel anciano. E congregacion chikitu ei di 12 Testigo na Limburg awor a crece bira 17 congregacion cu rond di 1.550 publicador!
Bou di Poder i Dominio Nazi
Na mei 1940 e nazinan a invadí Hulanda. Mi a ricibí un asignacion n’e oficina di sucursal dje Sociedad Watch Tower na Amsterdam. Nos tabatin cu hiba nos trabou a cabo cu hopi cautela, algu cu a haci nos apreciá e proverbio bíblico: “Un berdadero compañero . . . ta un ruman cu ta nacé pa ora tin angustia.” (Proverbionan 17:17) E dushi laso di unidad cu a bona durante e tempu di tension aki tabatin un efecto profundo riba mi desaroyo spiritual, i el a ekipá mi p’e dianan asta mas difícil cu tabatin mi dilanti.
Mi asignacion tabata pa supervisá e entrega di literatura n’e congregacionnan, loke generalmente couriernan tabata haci. E soldatnan di Gestapo constantemente tabata busca hombernan hóben pa haci trabou forsá na Alemania, di manera cu nos a usa ruman muher cristian como courier. Cu tempu Wilhelmina Bakker, conocí como Nonnie, a ser mandá pa nos for di Den Haag, i mi a hib’é caminda nos superintendente di sucursal, Arthur Winkler, tabata scondí. Pa trata na hala ménos atencion posibel, mi a bisti manera un cunukero hulandes, asta cu klomp, i mi a escoltá Nonnie cu tram. Despues mi a haña sa cu tabata difícil p’e tene su harí aden, ya cu segun e mi tabata juist masha riparabel.
Dia 21 di october, 1941, e depósito di literatura i papel na Amsterdam a ser redá n’e nazinan. Durante e razia di Gestapo, Winkler i Nonnie a ser arestá. Ora nan a ser entregá na prizon, nan a tende dos agente di Gestapo papia tocante con nan tabata persiguiendo “un tersio corticu cabei scur” kende nan a perde den e cayanan colmá di hende. Tabata bisto cu nan tabata papia tocante mi, di manera cu Winkler a logra manda un mensahe p’e rumannan. Mi a ser mandá inmediatamente na Den Haag.
Miéntras tantu, Nonnie a ser lagá liber for di prizon, i el a regresá na Den Haag pa traha pionero. Ei mi a top’é atrobe. Pero ora e sirbidor di congregacion na Rotterdam a ser arestá, mi a ser mandá pa tuma su lugá. Despues e sirbidor di congregacion di Congregacion Gouda a ser arestá, i mi a ser mandá ei pa reemplas’é. Finalmente, dia 29 di mart, 1943, mi a ser capturá. Miéntras mi tabata controlando nos stock di literatura bíblico, mi a ser sorprendí dor di un razia di Gestapo.
Ademas dje literatura bíblico plamá riba un mesa, tabatin tambe un lista di nomber di rumannan cristian, aunke esakinan tabata skirbí den code. Den angustia, mi a pidi Jehova den oracion p’e duná mi un manera pa mi protehá esnan cu ainda tabata liber pa predicá. Sin ser detectá, mi a logra pone mi man riba e lista di nomber i machik’é den mi plant’i man. Anto mi a pidi permit pa bai toilet, unda mi a skeur e lista i flush e.
Na momentonan difícil asina, mi a siña saca fortalesa for di Jehova su trato cu su pueblo den pasado i for di su promesanan di liberacion. Esaki ta un garantia inspirá cu semper a keda den mi mente: “Si no tabata pasobra Jehova a resultá di ta pa nos ora hende a lanta contra nos, anto nan lo a guli nos asta bibu.”—Salmo 124:2, 3.
Prizon i Camponan di Concentracion
Mi a ser hibá n’e prizon di Rotterdam, unda mi tabata gradicidu di tabatin mi Bijbel huntu cu mi. Tambe mi tabatin e buki Salvation (Salbacion), porcionnan dje buki Children (Yunan), i tempu na abundancia pa lesa tur e literatura aki. Despues di seis luna mi a bira hopi malu i tabatin cu ser hospitalisá. Promé cu mi a bandoná e prizon, mi a sconde e literatura bou di mi matras. Despues mi a haña sa cu un otro Testigo, Piet Broertjes, a ser transferí na mi cel i a descubrié. Asina e literatura a ser usá pa fortalecé otronan mas den e fe.
Ora mi a recuperá, mi a ser transferí na un prizon na Den Haag. Ora mi tabata ei mi a topa Leo C. van der Tas, un studiante di ley kende tabata den prizon pasobra el a resistí e ocupacion Nazi. E nunca a tende di Testigonan di Jehova, i mi tabatin oportunidad pa dun’é testimonio. Algun biaha e tabata lantá mi meianochi i haci pregunta. E no por a sconde su admiracion p’e Testigonan, specialmente despues di a haña sa cu nos lo por a sali liber si nos a djis firma un documento renunciando nos fe. Despues di guera, Leo a bira un abogado i a bringa decenas di casonan legal p’e Sociedad Watch Tower cu a enbolbé libertad di adoracion.
Dia 29 di april, 1944, mi a ser poné riba un trein pa un biahe agonisante di 18 dia pa Alemania. Dia 18 di mei e portanan dje campo di concentracion Buchenwald a cera mi tras. Bida tabata indescriptiblemente horibel te ora nos a ser librá dor dje forsanan Aliá casi un aña despues. Miles di hende a muri, hopi di nan dilanti nos wowonan. Ya cu mi a nenga di traha den un fábrica ei cerca cu a producí material di guera, nan a poné mi traha riba un beerput.
Un dia e fábrica a ser bombardiá. Hopi a core drenta e baraknan pa siguridad, miéntras cu otronan a core drenta mondi. Bomnan perdí a dal den e baraknan i bomnan cu ta ocasioná candela ora nan explotá a pega e mondi na candela. Tabata un bista teribel! Hopi hende a kima bibu! Mi a haña un bon lugá di sconde, i ora e candela a paga, bayendo bek n’e campo mi a cana pasa e incontabel curpanan morto.
Awe mayoria hende ta na altura dje horornan dje Holocausto Nazi. Mi ta gradicidu na Jehova cu el a fortalecé mi capacidad di pensa, di manera cu e horornan cu mi a experenciá no a dominá mi pensamentunan atrabes dje añanan. Ora mi pensa di mi periodo di encarcelacion, mi sintimentu di mas principal ta esun di goso di a wanta integridad na Jehova p’e gloria di su nomber.—Salmo 124:6-8.
Actividad Despues di Guera
Despues di mi liberacion i regreso na Amsterdam, mi a meldu directamente n’e oficina di sucursal pa un asignacion. Mi tabata ansioso pa ser informá riba kico a tuma lugá durante mi ausencia. Nonnie tabata trahando ei caba. Durante e último aña dje guera, el a sirbi como courier entregando literatura bíblico n’e congregacionnan. E no a ser arestá mas, aunke el a scapa hopi biaha na wowo di angua.
Mi a traha pionero pa un tempu corticu na Haarlem, pero na 1946, mi a ser pidí pa bai n’e sucursal na Amsterdam pa traha den e Departamento di Entrega. Yegando na fin di 1948, ami cu Nonnie a casa i nos a sali for di sucursal pa traha pionero huntu. Nos asignacion di pionero tabata na Assen. Diesdos aña mas promé ami cu Richard Brauning a pasa zomer ei, bibando den un tent i predicando. Mi a bin tende cu Richard a ser tirá mata na caminda pa un campo di concentracion.
Mi periodo di encarcelacion claramente a hiba mi salú atras. Seis aña despues cu mi a ser librá for di Buchenwald, malesa a tené mi na cama pa cuater luna. Añanan despues, na 1957, mi tabata malu cu tuberculósis pa un aña completo. Mi curpa a perde su vigor, pero mi spiritu di pionero tabata fuerte ainda. Durante mi malesa, mi a probechá di tur oportunidad pa duna testimonio. Mi ta kere cu e spiritu di pionero aki tabata un factor importante cu no a permití mi casonan di enfermedad transformá mi den un homber enfermo inútil. Ami cu Nonnie ta determiná pa pega n’e sirbishi di tempu completo tanten cu nos salú permití esei.
Despues di mi recuperacion, nos a ser asigná n’e stad di Breda. Esaki tabata 21 aña despues cu mi a bishitá e stad pa promé biaha como sirbidor di zona. Ora nos a yega na 1959, tabatin un congregacion chikitu di 34 Testigo. Awe, 37 aña despues, el a crece na seis congregacion cu mas di 500 Testigo, cu ta reuní den tres Salon di Reino! Na nos reunionnan local i na asambleanan, nos ta mira hopi persona cu a yega na un conocimentu dje berdad di Bijbel como resultado di algun esfuerso di nos. Hopi biaha nos tin e mésun sintimentu cu apostel Juan ora el a skirbi: “Mi no tin un motibu mas grandi pa duna gradicimentu cu e cosnan aki, pa mi tende cu mi yunan ta sigui cana den e berdad.”—3 Juan 4.
Awor nos a bira grandi. Mi tin 86 aña di edad i Nonnie tin 78, pero mi mester bisa cu trahamentu di pionero ta un ocupacion saludabel. Desde cu mi ta na Breda, mi a vence mayoria dje problemanan di salú cu mi a contraé durante mi encarcelacion. Tambe mi a disfrutá di hopi aña productivo den Jehova su sirbishi.
Mirando bek riba hopi aña di sirbishi productivo ta un fuente di goso pa nos tur dos. Tur dia nos ta pidi Jehova den oracion p’e duna nos e spiritu i fortalesa pa sigui den su sirbishi tanten cu nos ta na bida. Cu confiansa, nos ta expresá nos mes den e palabranan dje salmista: “Mira! Dios ta mi yudante; Jehova ta entre esnan cu ta sostené mi alma.”—Salmo 54:4.
[Plachi na página 23]
Pará banda dje tent cu nos a usa tempu nos tabata traha pionero den añanan ’30
[Plachi na página 23]
E boto cu nos a usa pa alcansá teritorionan isolá
[Plachi na página 23]
Den un entrevista durante un programa di congreso na 1957
[Plachi na página 24]
Cu mi esposa awe