“Siña Nos Con pa Haci Oracion”

“SEÑOR, siña nos con pa haci oracion.” E peticion ei a ser hací dor di un dje disipelnan di Jesucristo. (Lucas 11:1) E disipel no-identificá obviamente tabata un homber cu aprecio profundo pa oracion. Awe adoradornan berdadero di igual manera ta reconocé e importancia di oracion. Al fin i al cabo, oracion ta e medio via cua nos tin e oportunidad di ser tendé dor dje Personahe di Mas Haltu den universo! I djis pensa! E “Tendedor di oracion” ta duna atencion personal na nos preocupacion i ansiedadnan. (Salmo 65:2) Mas importante, mediante oracion, nos ta duna gradicimentu i alabansa na Dios.—Filipensenan 4:6.

No obstante, e palabranan “siña nos con pa haci oracion” ta lanta algun pregunta serio. Rond mundu diferente religion ta usa hopi método pa acercá Dios. Pero tin un manera corecto i un manera robes di haci oracion? Como contesta, laga nos tira un bista promé na algun dje custumbernan religioso popular cu ta enbolbé oracion. Nos lo enfocá riba esnan cu ta ser practicá den Latinoamérica.

Imágennan i “Santunan Patron”

Generalmente, paisnan latinoamericano ta profundamente religioso. Por ehempel, rond México bo por observá e custumber popular di resa na “santunan patron.” En berdad, ta usual cu pueblonan mexicano tin “santunan patron” pa cua nan ta tene festival riba cierto dianan. Católiconan mexicano ta resa tambe na un gran variedad di imágen. Sin embargo, pa dicidí cua “santu” ta ser inbocá ta dependé di e tipo di peticion cu e adorador ta deseá na haci. Si un persona ta buscando un hende pa casa cuné, lo e por cende un bela pa “San” Antonio. Un persona cu ta cla pa cuminsá un biahe den auto lo por encargá su mes na “San” Cristóbal, patron di biaheronan, particularmente di automobilistanan.

Sin embargo, di unda custumbernan asina a originá? Historia ta mustra cu ora e spañónan a yega México, nan a haña un poblacion dedicá n’e adoracion di diosnan pagano. Den su buki Los Aztecas, Hombre y Tribu, Victor Wolfgang von Hagen ta bisa: “Tabatin diosnan personal, cada mata tabatin su dios, cada actividad tabatin su dios of diosa, asta suicidionan tabatin un dios. Yacatecuhtli tabata e deidad dje comerciantenan. Den e mundu politeista aki, tur e diosnan tabatin tendencianan i funcionnan claramente definí.”

E parecido dje diosnan aki na “santunan” católico tabata asina notabel cu ora e conkistadornan spañó a purba “cristianisá” e nativonan, esakinan simplemente a cambia nan lealtad for di nan ídolonan pa “santunan” di iglesia. Un artículo den The Wall Street Journal a reconocé e orígen pagano dje catolicismo cu ta ser practicá den algun parti di México. El a mencioná cu den un área, mayoria dje 64 “santunan” cu e poblacion ta venerá ta corespondé cu “diosnan specífico dje mayanan.”

New Catholic Encyclopedia ta argumentá cu “entre e santu i e hendenan riba tera cu ta resa na dje a desaroyá un laso íntimo di confiansa, . . . un laso cu, leu di stroba e relacion cu Cristo i cu Dios, ta enrikesé i profundisá e relacion ei.” Pero con un laso cu ta claramente un sobrá di paganismo por profundisá un persona su relacion cu e Dios berdadero? Oracionnan cu ta ser ofrecé na “santunan” asina realmente ta agradá Dios?

E Orígen di Rosario

Un otro custumber popular ta enbolbé e uso di rosario. Diccionario Enciclopédico Hispano-Americano ta describí e rosario como un “cadena di cincuenta of shent’i cincuenta kralchi separá dies-dies dor di otro kralchi di tamaño mas grandi i uní na su dos puntanan dor di un crucifiho, actualmente cu tres kralchi promé cuné.”

Splicando con e rosario ta ser usá, un publicacion católico ta bisa: “E Santu Rosario ta un forma di oracion verbal i mental tocante e Misterionan di nos redencion. E ta consistí di 15 sesion. Cada sesion ta consistí di recitá un Nos Tata, dies Ave Maria, i un Gloria Patri. Durante cada sesion ta meditá riba un misterio.” E misterionan ta doctrinanan of siñansanan cu católiconan mester sa, den e caso aki refiriendo na e bida, sufrimentu i morto di Cristo Jesus.

The World Book Encyclopedia ta bisa: “E promé formanan di resa cu un rosario a cuminsá den cristianismo durante Edad Media, pero ta te den añanan 1400 i 1500 el a bira ampliamente conocí.” E uso di rosario ta algu exclusivamente di catolicismo? No. Diccionario Enciclopédico Hispano-Americano ta declará: “Adoracion islámico, lamaista i budista ta usa cadenanan di kralchi similar.” En berdad, Encyclopedia of Religion and Religions ta comentá: “Hende a sugerí cu e mohamedanonan a bin cu nan rosario for dje budistanan, i cristiannan for dje mohamedanonan den e época dje Crusadanan.”

Algun hende ta argumentá cu e rosario ta sirbi meramente como un yudansa di memoria ora mester ripití un cantidad di oracion. Pero uso di rosario ta agradá Dios?

Nos no tin nodi speculá of debatí si custumbernan asina ta apropiado of válido. Jesus a duna un contesta autoritativo n’e peticion pa siña su siguidornan con pa haci oracion. Loke el a bisa lo iluminá i kisas sorprendé algun lector.

[Plachi na página 3]

Católiconan comunmente ta usa rosario. Kico ta su orígen?