E Plamamentu di Fundamentalismo
FUNDAMENTALISMO—djis un par di década pasá, esaki no tabata mas cu un movementu minoritario den protestantismo. Pero e situacion a cambia drásticamente! Bruce B. Lawrence, un comentarista riba religion, a skirbi cu 30 aña pasá, poco hende lo a premirá cu na fin di siglo 20, fundamentalismoa lo a bira un tópico di discusion asina importante i asta obsesionante pa medionan di comunicacion i investigacion universitario.
Sin embargo, esei ta loke a sosodé. Reportahenan den corant di demostracionnan violento riba caya, asesinato, movementunan antiaborto, manipulacionnan político dor di gruponan religioso di presion i kimamentu público di bukinan considerá blasfemoso ta recordatorionan constante dje accionnan di fundamentalistanan. Mondo Economico, un corant financiero semanal na Italia, a declará cu casi tur caminda fundamentalismo ta “usando religion como un agencia pa accion agresivo den política.”
Hopi biaha fundamentalistanan ta ser pintá como hende extremo i fanático, planeando conspiracionnan i lansando atakenan terorista. E crecementu di gruponan manera Comunione e Liberazione den catolicismo romano, Gush Emunim den hudaismo i e Coalicion Cristian den protestantismo norteamericano ta alarmá hende. Pakico fundamentalismo ta plamando? Kico ta motiv’é? Acaso e ta “e vengansa di Dios,” manera e sociólogo frances Gilles Kepel ta indicá den e título di su buki?
[Nota]
a Un fundamentalista ta un persona cu ta pega estrictamente na balornan religioso tradicional i conservativo. Lo considerá e nificacion di “fundamentalismo” mas ampliamente den e siguiente artículo.
[Rekonosementu pa Potrèt na página 3]
Nina Berman/Sipa Press