Un Miho Manera

TESTIGONAN DI JEHOVA ta preocupá p’e menguamentu di spiritualidad den e mundu i p’e inmoralidad i insiguridad religioso cu ta plamá den sociedad. Como resultado, nan sa ser yamá fundamentalistanan. Pero esei ta cierto? No. Aunke nan tin conviccionnan religioso firme, nan no ta fundamentalista den e sentido cu e término a bin ta ser usá. Nan no ta presioná lidernan político pa promové un cierto punto di bista, i nan no ta recurí na demostracionnan i violencia contra esnan cu ken nan no ta di acuerdo. Nan a haña un mihó manera. Nan ta imitá nan Lider, Jesucristo.

Testigonan di Jehova ta convencí cu ta existí berdad religioso i cu e ta ser hañá den Bijbel. (Juan 8:32; 17:17) Pero Bijbel ta siña cristiannan pa ta bondadoso, amabel, suave i razonabel—cualidadnan cu no ta duna espacio pa fanatismo. (Galationan 5:22, 23; Filipensenan 4:5) Den e buki bíblico di Santiago, cristiannan ta ser animá pa cultivá “e sabiduria di ariba,” cu ta ser describí como “na promé lugá decente, despues pacífico, razonabel, cla pa obedecé, yen di misericordia i bon fruta.” Santiago a agregá: “E fruta di husticia tin su simia sembrá den condicionnan pacífico pa esnan cu ta haci pas.”—Santiago 3:17, 18.

Testigonan di Jehova ta corda cu Jesus tabata profundamente interesá den e berdad. El a bisa Poncio Pilato: “P’esaki mi a nace, i p’esaki mi a bini na mundu, pa mi duna testimonio dje berdad.” (Juan 18:37) Aunke e tabata un defensor intrépido dje berdad, e no a trata na imponé su conviccionnan riba otro hende. Mas bien, el a apelá na nan mente i curason. E tabata sa cu su Tata celestial, un Dios “bon i recto,” lo a dicidí con i na ki tempu pa eliminá falsedad i inhusticia for dje cara dje tera. (Salmo 25:8) P’esei, e no a trata na reprimí esnan cu no tabata di acuerdo cuné. Al contrario, tabata e lidernan religioso ortodox di su tempu cu a trata na reprimí Jesus.—Juan 19:5, 6.

Testigonan di Jehova tin conviccionnan firme tocante doctrinanan religioso, i nan ta manifestá balornan sólido den e asuntu di normanan moral. Mescos cu apostel Pablo, nan ta convencí cu tin solamente “un Señor, un fe, un bautismo.” (Efesionan 4:5) Tambe nan ta conciente di Jesus su palabranan: “Smal ta e porta i pertá e caminda cu ta hiba na bida, i poco ta esnan cu ta hañ’é.” (Mateo 7:13, 14) Tog, nan no ta purba forsa otronan sigui nan creencianan. Mas bien, nan ta imitá Pablo i ta “roga” tur esnan cu ta deseá esei pa “bira reconciliá cu Dios.” (2 Corintionan 5:20) Esaki ta e mihó manera. E ta e manera di Dios.

Fundamentalismo religioso, manera e palabra ta ser usá awe, ta masha diferente. Fundamentalistanan ta usa hopi strategia—incluyendo violencia—pa imponé nan principionan riba sociedad. Haciendo esei, nan ta bira un parti integral dje sistema político. Sin embargo, Jesus a bisa cu su siguidornan no mester ta “parti dje mundu.” (Juan 15:19; 17:16; Santiago 4:4) Na armonia cu e palabranan ei, Testigonan di Jehova ta keda estrictamente neutral den controversianan político. I, manera e corant italiano Fuoripagina a reconocé, nan “no ta forsa nada riba ningun hende; tur hende ta liber pa aceptá of rechasá loke nan ta bisa.” E resultado? E Testigonan su mensahe pacífico di Bijbel ta atraé tur clase di hende, asta esnan cu un tempu tabata fundamentalista.—Isaías 2:2, 3.

Un Mundu cu Balornan Sólido

E Testigonan ta reconocé cu hende no por resolvé e problemanan cu ta preocupá fundamentalistanan. Bo no por forsa un persona kere den Dios of aceptá bo conviccionnan religioso personal. Pensando cu un cos asina ta posibel a hiba na algun dje cosnan di mas horibel di historia, manera e Crusadanan, e Inkisicionnan di Edad Media i e “combertimentu” dje indjannan di continente mericano. Sin embargo, si bo ta confia den Dios, lo bo ta dispuesto pa laga cosnan den su man.

Segun Bijbel, Dios a fiha un límite n’e tempu cu e ta permití hende kibra su leynan i asina causa dolor i sufrimentu. E tempu ei a casi expirá. Ya caba, Jesus ta gobernando como Rey den e Reino celestial di Dios, i pronto e Reino ei lo drenta den accion pa eliminá gobiernunan humano i tuma over e gobernacion di tur dia riba humanidad. (Mateo 24:3-14; Revelacion 11:15, 18) E resultado lo ta un paradijs mundial den cua pas i husticia lo ta abundante. N’e tempu ei lo no tin insiguridad tocante con e Dios berdadero mester ser adorá. “E hustunan mes lo poseé e tera, i nan lo biba pa semper riba dje.” (Salmo 37:29) Balornan eterno manera bondad amoroso, berdad, husticia i amabilidad lo triunfá p’e bienestar di henter humanidad obediente.

Mirando padilanti n’e tempu ei, e salmista ta bisa den estilo poético: “En cuanto bondad amoroso i apego n’e berdad, nan a topa otro; husticia i pas—nan a sunchi otro. Apego n’e berdad mes lo brota for di e tera mes, i husticia mes lo wak abou for di shelu mes. Tambe, Jehova, di su parti, lo duna loke ta bon, i nos propio tera lo duna su fruta. Dilanti dje husticia mes lo cana, i lo e traha di su pasonan un caminda.”—Salmo 85:10-13.

Aunke nos no por cambia e mundu, como hende individual, nos por cultivá balornan piadoso asta awe. Pues, nos por purba ser e clase di persona cu Dios lo kier como su adoradornan den e mundu nobo ei. E ora ei nos lo ta entre e mansunan na cua e salmista a referí: “E mansunan mes lo poseé e tera, i nan berdaderamente lo haña nan deleite exkisito den e abundancia di pas.” (Salmo 37:11) Dios ta apoyá i ta bendicioná esnan cu ta haci su boluntad, i e ta primintí cosnan maraviyoso pa nan futuro. Apostel Juan a bisa: “Mundu ta pasa bai i tambe su deseo, pero esun cu ta haci e boluntad di Dios ta permanecé pa semper.”—1 Juan 2:17.

[Plachi na página 7]

Lampi na página 3, 4, 5 i 6: Printer’s Ornaments/dor di Carol Belanger Grafton/Dover Publications, Inc.

[Rekonosementu pa Potrèt na página 6]

Testigonan di Jehova ta invitá tur persona pa familiarisá nan mes cu e bon nobo dje Reino di Dios