Fundamentalismo—Kico E Ta?

UNDA fundamentalismo a cuminsá? Na fin di siglo pasá, teólogonan liberal tabata cambiando nan creencianan pa acomodá crítica textual di Bijbel i teorianan científico, manera evolucion. Como resultado, hende su confiansa den Bijbel a ser sagudí. Lidernan religioso conservativo na Merca a reaccioná estableciendo loke nan a yama e elementonan fundamental di fe.a Na cuminsamentu di siglo 20, nan a publicá un consideracion dje elementonan fundamental aki den un seri di volúmen titulá The Fundamentals: A Testimony to the Truth (E Elementonan Fundamental: Un Testimonio dje Berdad). For dje título aki ta bini e término “fundamentalismo.”

Den e promé mitar di siglo 20, fundamentalismo tabata den noticia de bes en cuando. Por ehempel, na 1925, fundamentalistanan religioso a hiba John Scopes corte, un maestro di scol di Tennessee, Merca, den loke a bira conocí como e huicio di Scopes. Kico tabata su crímen? E tabata siña su alumnonan evolucion, i esei tabata contra ley di estado. Den e dianan ei, algun hende a kere cu fundamentalismo lo tabata di corto duracion. Na 1926, Christian Century, un revista protestant, a bisa cu fundamentalismo tabata “bashí i artificial” i “faltando totalmente e cualidadnan di logro constructivo of sobrebibencia.” Ki ekibocá e evaluacion ei tabata!

Desde añanan ’70, fundamentalismo ta constantemente den noticia. Profesor Miroslav Volf, di Fuller Theological Seminary, California, Merca, ta bisa: “Fundamentalismo no solamente a sobrebibí, sino tambe a florecé.” Awe, e palabra “fundamentalismo” ta aplicá no solamente na movementunan protestant sino tambe na esnan den otro religionnan, manera catolicismo, islam, hudaismo i hinduismo.

Un Reaccion Riba Nos Tempu

Pa ki motibu fundamentalismo a plama? Esnan cu ta studi’é ta atribuí esei, por lo ménos en parte, n’e insiguridad moral i religioso di nos tempu. Den añanan mas promé mayoria comunidad a biba den un atmósfera di siguridad moral basá riba creencianan tradicional. Awor e creencianan ei ta ser desafiá of rechasá. Hopi intelectual ta declará firmemente cu Dios no ta existí i cu hende ta so den un universo indiferente. Hopi científico ta siña cu humanidad ta e resultado di evolucion dirigí dor di casualidad, no dor dje accionnan di un Creador amoroso. Un mentalidad permisivo ta prevalecé. E mundu ta plagá cu un pérdida di balornan moral na tur nivel di sociedad.—2 Timoteo 3:4, 5, 13.

Fundamentalistanan ta anhelá p’e siguridadnan di pasado, i algun di nan ta haci esfuerso pa trece nan comunidadnan i nacionnan bek na loke nan ta kere ta fundeshinan moral i doctrinal corecto. Nan ta haci tur loke ta na nan alcanse pa forsa otronan biba segun un código moral i sistema di creencianan doctrinal “corecto.” Un fundamentalista ta fuertemente convencí cu é tin rason i cu otronan ta robes. Profesor James Barr, den su buki Fundamentalism, ta bisa cu fundamentalismo “hopi biaha ta ser considerá un término hostil i despreciabel, cu ta sugerí prehuicio, intolerancia, oposicion contra plamamentu di conocimentu i un actitud di mente cerá.”

Siendo cu ningun hende ta gusta pa nan ser yamá hende cu prehuicio, intolerante of cu mente cerá, no ta tur hende ta di acuerdo ken ta un fundamentalista i ken no. Sin embargo, tin cierto aspecto cu ta caracterisá fundamentalismo religioso.

Identificando un Fundamentalista

Fundamentalismo religioso ta generalmente un intento pa preservá loke hende ta kere ta e tradicionnan original of creencianan religioso di un cultura i pa oponé loke ta ser percibí como un spiritu seglar di mundu. Esei no kier men cu fundamentalistanan ta oponé tur loke ta moderno. Algun ta usa comunicacion moderno di un manera masha eficas pa promové nan punto di bista. Pero nan ta lucha contra e seglarisacion di sociedad.b

Algun fundamentalista ta dicididu pa no solamente preservá pa nan mes un structura tradicional di doctrina of moda di biba, sino pa imponé esakinan riba otronan, pa cambia structuranan social pa nan conformá cu e fundamentalista su creencianan. P’esei, e fundamentalista católico lo no limitá su mes na rechasá aborto. Probablemente lo e presioná e legisladornan di su pais pa promové leynan pa haci aborto ilegal. Na Polonia, segun e corant La Repubblica, afin di logra pa un ley antiaborto ser aprobá, Iglesia Católico a conducí “un ‘guera’ den cua el a utilisá tur su poder i influencia.” Haciendo esei, e autoridadnan di iglesia tabata actuando hopi parecido n’e fundamentalistanan. E Coalicion Cristian Protestant na Merca ta bringa “gueranan” similar.

Fundamentalistanan ta caracterisá nan mes specialmente pa nan conviccionnan religioso profundamente ancrá. Di manera cu un fundamentalista protestant lo ta un proponente convencí di e interpretacion literal di Bijbel, probablemente incluyendo e creencia cu e tera a ser creá den seis dia literal. Un fundamentalista católico no ta duda cu papa di Roma ta infalibel.

Ta comprendibel, anto, pakico e término “fundamentalismo” ta crea e imágen di fanatismo iracional i pakico esnan cu no ta fundamentalista ta preocupá ora nan mira fundamentalismo plama. Como personanan individual, kisas nos no ta eens cu fundamentalistanan i ta keda di shok dor di nan maniobranan político i nan accionnan tin biaha violento. En berdad, fundamentalistanan di un religion por ta hororisá p’e accionnan di esnan di un otro religion! Tog, hopi hende pensativo ta preocupá tocante e cosnan cu ta provocá e plamamentu di fundamentalismo—e creciente indiferencia moral, e pérdida di fe i e rechaso di spiritualidad den sociedad moderno.

Fundamentalismo ta e único contesta riba e tendencianan aki? Si esei no ta e caso, kico ta e alternativa?

[Nota]

[Komentario na página 5]

Na 1926, un revista protestant a definí fundamentalismo como “bashí i artificial” i “faltando totalmente e cualidadnan di logro constructivo of sobrebibencia”