Informe di Proclamadonan di Reino

“Tur Dia den e Plasa”

APOSTEL Pablo a probechá di tur oportunidad pa plama e mensahe di Reino. Pa e por a busca te haña esnan merecedor, el a razoná “den e snoa cu e hudiunan . . . i tur dia den e plasa cu esnan cu pa casualidad tabata presente.”—Echonan 17:17.

Desde e promé siglo E.C., un celo asina tabata típico pa berdadero adoradónan di Jehova. (Mateo 28:19, 20) Awe tambe, Testigonan di Jehova ta usa un variedad di método den e trabou cu nan ta haci celosamente pa yuda hende di curason onrado gana un conocimentu exacto dje berdad. (1 Timoteo 2:3, 4) E siguiente experencia for di Australia ta ilustrá esaki.

Cincu dia pa siman, Sid cu Harold ta tuma turno pa atendé un stènd chikitu pa exhibí literatura bíblico na un stacion di trein na Sydney. Pa rond di cincu aña caba, nan ta compartiendo e bon nobo dje Reino di Dios den e forma aki. Sid, kende tin 95 aña di edad, ta splica: “Ora m’a haci 87 aña, mi no por a core auto mas. Esaki a dal mi duru pasobra mi tabata gusta e actividad di duna testimonio públicamente. Un dia, ora mi tabata cerca di un área turístico popular cu yama Echo Point na Katoomba, mi a mira un artista ta bende cuadronan di paisahe. Mi a observá e cuadronan i a pensa den mi mes: ‘Mi tin pinturanan mihó cu eseinan den mi tas di sirbishi—i pa un prijs hopi ménos cu eseinan!’ P’esei m’a dicidí di arma un stènd di exhibicion chikitu, pon’é na un lugá popular i ofrecé peatonnan e revistanan bunita ilustrá cu Testigonan di Jehova ta distribuí.

Cuater aña pasá, mi a muda e stènd pa Sydney, i Harold a djoin mi. Beurt pa beurt nos ta atendé e stènd i ta traha cu nos congregacion local.” Harold, cu awor tin 83 aña, ta bisa: “Di dialuna pa diabierne, tin masha poco hende na cas. Pues e forma aki di compartí e mensahe di Reino ta hiba nos caminda e hendenan ta. Naturalmente, nos ta haña mihó resultado. E cantidad di literatura cu nos ta laga ta bastante sobresaliente p’e pais aki.”

Sid ta bisa: “Aunke durante añanan nos a establecé nos mes den cuater of cincu lugá diferente, no ta dura mashá pa nos bira conocí. Algun hende ta bini cerca nos pa busca literatura. Otronan tin pregunta pa cua nan kier contesta. I algun kier djis combersá un ratu. Esaki ta e único momentonan cu mi rebishitanan ta bini cerca mi,” e ta bisa hariendo chikí-chikí.

“Hopi hende ta ègt interesá den Bijbel,” Harold ta agregá. “Den un luna, cuater hende a cuminsá studia Bijbel cu Testigonan como resultado dje echo cu nan a ricibí literatura for di nos i pa motibu cu nos por a contestá nan preguntanan for di Bijbel. Experencianan manera esei ta animá nos masha hopi mes.”

Mescos cu Sid cu Harold—i mescos cu apostel Pablo—tur caminda Testigonan di Jehova ta usa tur medio posibel pa plama nan mensahe vital. P’esei, e “bon nobo” ta sigui ser predicá “den tur e tera habitá.”—Mateo 24:14.