Un Manera Emoshonante pa Prediká na Lugánan Públiko
1. Kiko kongregashonnan ku tin áreanan kaminda hopi hende ta kana pasa ta ser animá pa hasi?
1 Kongregashonnan ku tin áreanan kaminda hopi hende ta kana pasa ta ser animá pa organisá e trabou di prediká na lugánan públiko, usando sea mesa òf stènt portátil di literatura. Si usa stènt portátil, por lo ménos un publikadó mester para òf sinta banda di dje. Pero den kaso di e mesa mester tin dos publikadó pa atend’é. Ta bon pa e publikadónan ku haña e asignashon akí ta amabel i aserkabel. Si un persona aserká e stènt, un di e publikadónan por kuminsá kòmbersá kuné, kisas bisando: “Bo a yega di puntra bo mes kiko Beibel ta bisa tokante e tópiko ei?” Mientrastantu, un òf dos publikadó por keda den bisindario di e stènt i duna testimonio informal.
2. Konta un eksperensia ku ta demostrá e importansia di prediká na lugánan públiko usando un mesa di literatura.
2 E manera nobo akí a duna bon resultado. Hopi hende a kuminsá studia Beibel. Por ehèmpel, un mucha muhé ku ta bai universidat a disidí di skirbi un tésis tokante Testigunan di Yehova, pero e no por a haña un Salòn di Reino. E siguiente siman el a mira un mesa di literatura na e kèmpus. El a kuminsá un estudio di Beibel, i awor e mes ta un publikadó batisá ku ta partisipá den e manera di prediká akí.
3. Kon e publikadó ku a partisipá den e manera di prediká na lugánan públiko ta sinti?
3 Un ruman muhé ku a disfrutá di e manera akí di prediká a bisa: “Algun hende ta para pa kue e edishon resien di e revistanan. Tin otro ku nunka a tende di Testigunan di Yehova. Mi ta mira ku nos por yuda hopi hende ku e método akí.” Un otro ruman muhé a komentá: “Esaki ta un manera emoshonante pa prediká pasobra ta e hende ta bini serka bo, maske ta pa kuriosidat.”
4. Dikon ta bon pa pone e mesa òf stènt di literatura na e mesun lugá, e mesun dia i ora?
4 Ta bon pa pone e mesa òf stènt na e mesun lugá, e mesun dia i ora. Asina, e hendenan ta kustumbrá di mir’é i kisas ta haña smak pa hala serka i hasi pregunta òf tuma literatura. Bo kongregashon a organisá predikashon na lugánan públiko? Si ta asina, kisas abo por partisipá den e manera agradabel i produktivo akí di “proklamá e Reino di Dios tur kaminda.”—Luk. 9:60.