Duna Testimonio Efektivo na Lugánan Públiko
1 Meskos ku e promé disipelnan di Hesus, kristiannan djawe ta purba kompartí e bon nobo ku hende unda ku nan por ser hañá. (Echo. 16:13; 17:17; 20:20, 21) Debí na e esfuerso ku nan ta hasi pa prediká na lugánan públiko, nan ta haña hende interesá ku nunka nan lo no a haña den e ministerio di kas pa kas.
2 Nos mester usa disernimentu ora di duna testimonio na lugánan públiko. Hopi bes ta bon pa traha di un manera ku no ta hala atenshon. Por ehèmpel, si muchu hopi publikadó ta prediká den e mesun área òf ta bai na e mesun negoshinan, tin hende lo por sinti nan inkómodo pa motibu di nos presensia. Esaki ta rebahá e dignidat di nos trabou i por limitá nos efektividat. Kiko por hasi pa prevení esei? Algun kongregashon ku tin hopi lugá públiko kaminda nan por prediká, a ripará ku ta mihó pa organisá e lugánan aki den teritorionan spesífiko. (1 Kor. 14:40) Ademas, nos por yuda pa kos bai na òrdu dor di traha solamente e teritorionan asigná na nos kongregashon, a ménos ku e Komité di Sirbishi di Kongregashon tin un areglo spesífiko ku un otro kongregashon pa yuda nan.—Wak Nos Ministerio di Reino di novèmber 1998, pág. 6, §18-19.
3 Kon pa Aserká Hende: Ora Hesus a papia ku un señora na un pos, el a kuminsá ku un komentario breve i progresivamente el a amplia e kòmbersashon segun ku e señora a mustra interes. (Juan 4:7-26) E manera aki di aserká hende tambe ta efektivo den sierto situashon awe. Vários publikadó ta haña ku pa prepará bo mes mentalmente pa e predikashon públiko, ta bon pa usa un par di minüt pa saludá e hendenan i mustra interes personal den nan promé ku bo presentá e mensahe di Reino na nan. E publikadónan aki ta komentá riba un tópiko ku lokalmente hende ta interesá aden; hopi bes esei ta hiba na un kòmbersashon. Segun ku hende ta ekspresá nan preokupashonnan, e publikadónan aki ta skucha kuidadosamente. No ta dura hopi ku nan ta haña nan ta kompartí konsuelo for di e Palabra di Dios.—Rom. 15:4.
4 Kultivá Interes: Kada bes ku nos tin un bon kòmbersashon, nos tin ku purba hasi areglo pa kultivá e interes. Kon nos por hasi esei? Ora e kòmbersashon ta yegando su final, lo bo por saka bo buki di nota i bisa: “E kòmbersashon tabata dushi. Ta posibel ku nos por sigui kuné un otro dia?” Òf bisa: “Mi tin gana pa bo lesa un artíkulo ku mi tin sigur ku lo interesá bo. Mi tin mag di tres’é pa bo na bo kas òf trabou?” Tin publikadó ta djis puntra: “Mi por a haña bo number di telefon?” Hopi bes esaki ta duna bon resultado.
5 Hopi hende ku pa promé bes a wòrdu lokalisá na lugánan públiko a aseptá un estudio di Beibel. Por kondusí e estudionan ei na nan kas, trabou òf na un lugá públiko apropiá òf via telefon. Laga nos pone meta pa kuminsá estudionan di Beibel segun ku nos ta prediká di un manera efektivo na lugánan públiko.
[Questions]
1. Imitando e kristiannan di promé siglo, kon kristiannan djawe ta duna testimonio na lugánan públiko, i ku ki resultado?
2. Dikon disernimentu ta nesesario ora di prediká na lugánan públiko, i kon nos por yuda pa kos bai na òrdu?
3. Kua forma di aserká hende vários publikadó a haña efektivo ora di prediká na lugánan públiko?
4. Kon nos por kultivá e interes ku nos haña?
5. Ki meta nos mester tin ora nos ta prediká na lugánan públiko?