Prediká Riba Kaya na un Manera Efikas

1. Kon ta un manera ku nos por imitá Hesus?

¹ Durante su ministerio riba tera, Hesus no tabatin miedu pa papia ku hende ku el a topa riba kaya i den lugánan públiko. (Luk. 9:​57-⁠61; Juan 4:⁠7) E kier a kompartí su mensahe importante ku mas tantu hende posibel. Den nos tempu, e trabou di prediká riba kaya ta un manera ekselente pa yuda hende haña sabiduria di Dios. (Pro. 1:⁠20) Si nos ta tuma inisiativa pa aserká hende i ta usa disernimentu, nos lo tin mas éksito ora nos ta prediká riba kaya.

2. Dikon nos mester tuma inisiativa den e trabou di prediká riba kaya?

² Tuma Inisiativa: Por lo general ta mihó pa abo tuma inisiativa pa aserká e personanan ku ta kana pasa, en bes di para òf sinta un kaminda i warda pa nan aserká bo. Ku un sonrisa riba bo kara, wak e persona den su kara, salud’é na un manera amigabel i keda ku un aktitut kalmu. Si bo ta traha huntu ku mas publikadó, generalmente ta mihó pa ún persona so aserká e persona ku ta kana pasa. Inisiativa ta nesesario tambe pa sigui kultivá e interes di e persona. Si ta apropiá, na final di e kòmbersashon, puntra e persona bondadosamente si bo por tuma kontakto kuné atrobe. Algun publikadó ku ta prediká riba kaya regularmente ta preferá di bai para òf sinta na e mesun lugá. Esaki ta duna nan e oportunidat di papia ku e mesun personanan bes tras bes i asina sigui kultivá nan interes.

3. Kon nos por usa disernimentu ora di prediká riba kaya?

³ Usa Disernimentu: Usa sano huisio ora di skohe unda pa para riba kaya i ken pa aserká. No ta nesesario pa aserká tur persona ku ta kana pasa. Ser un bon opservadó. Por ehèmpel, si bo ripará ku e persona tin purá, lo ta mihó pa lag’é pasa bai. Si bo ta prediká dilanti di un negoshi, sea diskreto pa bo no kousa preokupashon innesesario serka e doño di negoshi. Mayoria di biaha ta mihó pa bo prediká na un persona na momento ku e ta bandoná e negoshi i no ora ku e ta bai drenta e negoshi. Aserká hende na un manera ku bo no ta spanta òf sorprendé nan. Usa disernimentu tambe ora di ofresé literatura. Si e persona no mustra muchu interes, bo por ofres’é un tratado en bes di revista.

4. Dikon e trabou di prediká riba kaya ta efektivo i plasentero?

⁴ E trabou di prediká riba kaya ta duna nos e oportunidat di sembra hopi simia di e bèrdat den poko tempu. (Ekl. 11:⁠6) Kisas nos ta topa nèt e personanan ku nos no ta haña na kas ora nos ta prediká di kas pa kas. Pakiko no plania pa partisipá den e trabou di prediká riba kaya? Esaki ta un rasgo di sirbishi gososo i efektivo.