Kon pa Prediká ku Stènt di Literatura

Prediká ku garoshi òf mesa portátil di literatura ta hala hopi persona ku bon kurason na e bèrdat. (Huan 6:44) P’esei, a animá ansianonan pa organisá e trabou di prediká na lugánan públiko den teritorio di nan kongregashon kaminda hopi hende ta kana pasa. Debí ku e stèntnan ta portátil generalmente no tin nodi di pidi pèrmit di outoridatnan. Ken por partisipá? Publikadónan ku ta prudente, representabel i ku tin bon abilidat di kòmbersá. Den e artíkulo akí, nos lo trata algun kos ku nos mester hasi i loke nos no mester hasi. Esaki sigur lo yuda publikadónan pa por tin mas éksito den e rasgo akí di sirbishi.

Hasi Esaki:

Sea atento, amabel i kla pa yuda e personanan ku pasa. Algun publikadó ta smail i ta kumindá e personanan na un manera amigabel. Ora un hende keda para wak e stènt, bo por bis’é: “Si bo ke bo por bai ku un di nan.”
Keda na un distansia for di e stènt. Na algun lugá, publikadónan ta haña ku ta mihó pa para un òf dos stap for di e stènt. Di otro banda, algun ta haña ku ora nan ta muchu serka di e stènt, hende ta vasilá pa para. P’esei, nan ta preferá di para un tiki mas leu i warda te ora un hende yega serka di e stènt. Unabes un persona mustra interes, purba di kuminsá un kòmbersashon kuné. Kisas bo por puntr’é: “Bo a yega di hasi bo mes e pregunta ei?”
Usa Beibel mas tantu posibel.
Mustra e persona ku tuma un di e publikashonnan ku nos ta usa pa duna estudio, manera e buki Beibel Ta Siña, kon un kurso di Beibel ta bai. Anto si ta posibel, usa un tablet òf smartphone pa mustr’é e vidio Dikon Analisá Loke Beibel Ta Bisa?
Tuma dato di e personanan interesá si sirkunstansia permití. Si e persona no ta biba den bo teritorio, yena e formulario Por Fabor Atendé (S-43) i entreg’é mas pronto posibel na e sekretario.