Kico Bo Sa di Bruheria?

BRUHERIA! Kico e palabra ei ta trece na bo mente?

Pa hopi hende, esei ta cos di supersticion i fantasia cu bo no mester tuma muchu na serio. Pa nan, bruheria ta biba solamente den mundu di fantasia—heks bieu bistí cu mantel i capuchon, cu ta tira hala di raton djanochi den un wea grandi cu ta herebé, cu ta pone hende bira sapu i cu anochi ta bula den shelu riba pal’i basora cu un harí skerpi i malicioso.

Pa otro hende sí, bruheria no ta cos di haci wega cuné. Algun investigadó ta bisa cu mas cu mitar dje poblacion di mundu ta kere cu ta existí heks i cu nan por influenciá bida di otro hende. Miyones di hende ta kere cu bruheria ta algu malu i peligroso, i cu nos mester tin hopi miedu di dje. Por ehempel, un buki tocante religion africano ta bisa: “Creencia den e funcion i peligernan di magia pretu i bruheria tin rais profundo den e bida africano . . . Hacidó di bruha ta e hendenan mas odiá den nan comunidad. Te n’e dia djawe tin lugá i ocasion caminda e resto dje pueblo ta bati nan mata.”

Pero den paisnan occidental hende a bolbe cuminsá mira bruheria como algu respetabel. Buki, television i película a contribuí hopi na reducí e miedu di bruheria. E analista di diberticion David Davis, ta comentá: “Di ripiente, hacidónan di bruha ta mas yong i mas atractivo, sigur hopi mas atractivo. Hollywood ta bon den probechá di loke ta na moda. . . . Dor di bini cu hacidó di bruha mas atractivo i mas agradabel, nan por atraé un público mas grandi, incluso hende muher i mucha mas chikitu.” Hollywood sa con pa combertí cualkier tendencia den un negoshi lucrativo.

Algun hende ta bisa cu bruheria a bira un dje movementunan spiritual cu ta creciendo mas rápido na Merca. Den henter e mundu desaroyá, un creciente cantidad di hende, inspirá pa gruponan feminista i decepcioná cu religionnan convencional, ta busca satisfaccion spiritual den vários forma di bruheria. Realmente, tin asina tantu forma di bruheria cu hende ta asta diferenciá di opinion riba nificacion dje palabra “hacidó di bruha.” Sin embargo, hopi bes hende cu ta bisa cu nan ta hacidó di bruha ta identificá nan mes cu wicca. Un diccionario ta definié como “un religion di naturalesa pagano cu a originá den partinan west di Europa dje periodo pre-cristian i cu a rebibá den siglo 20.”a Consecuentemente, hopi ta referí na nan mes tambe como pagano of neopagano.

Atrabes di historia, hende a odia, persiguí, torturá i asta mata hacidó di bruha. Nada straño anto cu practicantenan moderno di bruheria ta ansioso pa mehorá nan imágen. Den un encuesta, nan a puntra decenas di hacidó di bruha ki mensahe nan tabatin mas gana di expresá n’e público. Nan contesta, cu e investigadó Margot Adler a resumí, tabata: “Nos no ta malbado. Nos no ta adorá Diabel. Nos no ta haci daño na hende ni seducí nan. Nos no ta peligroso. Nos ta hende comun i coriente mescos cu boso. Nos tin famia, trabou, speransa i soñonan. Nos no ta un culto. Nos no ta hende misterioso. . . . Boso no tin nodi tene miedu di nos. . . . Nos ta mes hende cu boso, mas di loke boso ta kere.”

E mensahe ei ta hañando mas i mas aceptacion. Pero esaki ta nificá cu no tin motibu pa ta preocupá tocante e práctica di bruheria? Laga nos considerá e pregunta ei den e siguiente artículo.

[Nota]