E Punto Di Bista Biblico

Kico Tin Tras di Bruheria?

“HACIDO DI BRUHA.” Kico e palabra ei ta lanta den bo mente? Bo ta mira un heks ta haci bruha pa mara hende cu maldicion of bo ta mira muhernan inmoral asociando cu Satanas? Contrali na e stereotipo ei, hopi hende cu awe ta yama nan mes hacidó di bruha ta parce hende comun i coriente. Tin di nan ta profesionalnan respetá, manera abogado, maestro, escritor i verpleegster. Mundialmente tabatin un renacementu di movementunan religioso cu ta na rand di ocultismo, manera por ehempel religionnan di naturalesa i neopaganismo.a “Bo por bai unda cu ta na Rusia e dianan aki, i bruheria ta un parti diario di bida,” segun un funcionario di polis dje pais ei. Na Merca tin segun cálculo, 50.000 pa 300.000 hacidó di bruha, of “wiccano,”b manera algun ta yama nan mes.

Awendia hende ta usa e palabra “hacidó di bruha” den sentido general i e por nificá diferente cos pa diferente persona. Ta parce cu e aumento moderno den bruheria ta relacioná principalmente cu un tipo di religion basá riba naturalesa compañá pa adoracion di diosa i cu un creencia firme den podernan síkico. Algun hacidó di bruha ta solitario, nan ta practicá nan ritualnan nan so, i ta observá e cambionan di temporada, e fasenan di luna i otro fenómeno natural. Otronan, den grupo di generalmente 13 hacidó di bruha, ta adorá i ta mara hende cu maldicion.

Ta berdad cu den occidente, e manera cu público ta wak bruheria awe a cambia radicalmente for dje actitudnan cu den Edad Medio a pone hende kima hacidónan di bruha. Sin embargo, de bes en cuando ainda tin explosionnan di violencia desenfrená contra hacidónan di bruha. Por ehempel, na cuminsamentu di october 1998 na Indonesia, gèngnan a usa machete pa ehecutá sin ningun base legal mas cu 150 hende cu nan a sospechá di ta hacidó di bruha. Na Sur Africa nan a raportá entre aña 1990 pa 1998 mas cu 2.000 caso di violencia contra hacidónan di bruha, di cua 577 nan a mata. En bista di tal extremonan—cu ta varia di interes den bruheria pa odio contra hacidónan di bruha—con cristiannan mester mira e asuntu?

Necesidadnan Cu No Ta Ser Satisfacé

Kico ta impulsá hende pa practicá bruheria moderno? Nan ta bisa cu un factor ta un respet profundo pa naturalesa i bida. De facto, tin di nan ta ansioso pa splica cu den e ritualnan di nan adoracion no tin sacrificio di bestia. Otronan ta bisa cu nan ta mete cu bruheria como parti di nan búskeda pa haña hende cu ken nan por compartí frankesa, confiansa i interesnan spiritual en comun. Segun un hacidó di bruha moderno: “Tur hende cu mi conocé den e movementu pagano ta asina amigabel i franco . . . Nan ta hende maraviyoso.” I hopi di nan ta nenga di ta mete cu Satanas, declarando firmemente cu den nan structura religioso no tin un dios cu ta completamente malbado.

Pa hopi di nan, e motibu principal pakico nan a bira hacidó di bruha ta pasobra nan a sinti un bashí spiritual i tabata decepcioná cu religionnan convencional. Phyllis Curott, un sumo sacerdotisa di wicca, papiando di su grupo di bruheria, ta bisa: “Nos niun no tabata satisfecho cu e siñansa i prácticanan dje religionnan den cua nos a lanta.” Curott ta splica cu hacidónan di bruha moderno ta purba contestá preguntanan manera: ‘Con nos por bolbe descubrí loke ta sagrado?’ Pero ta bruheria ta e caminda cu ta hiba na berdadero spiritualidad?

Na Unda Ta Haña Berdadero Spiritualidad?

Bijbel ta mustra bon cla cu Jehova ta e único Dios berdadero i e Soberano Universal. (Salmo 73:28; 1 Pedro 1:15, 16; Revelacion 4:11) E ta invitá tur hende pa busk’é ‘i realmente hañ’é.’ (Echonan 17:27) Pues anto, nos por haña berdadero spiritualidad solamente dor di adkerí conocimentu exacto dje Dios berdadero, Jehova. Nos por logra esaki dor di studia su Palabra, Bijbel Santu. E escritor bíblico Santiago ta sigurá nos: “Hala cerca Dios, i lo e hala cerca boso.”—Santiago 4:8.

Sin embargo, e Palabra di Dios ta spierta nos contra un fuente malicioso di spiritualidad malbado. (1 Juan 4:1) E ta identificá Satanas e Diabel, e enemigu principal di Jehova, i su demoñonan como e fuente di gran parti dje spiritualidad ekibocá cu ta prevalecé awe.c Segun Bijbel, Satanas “a ciega mente” di hopi hende. En realidad e ta “gañando henter e tera habitá,” incluso esnan cu ta metí den bruheria, sea nan ta bisa cu nan ta adorá Diabel of no. Di con ta asina?—2 Corintionan 4:4; Revelacion 12:9.

Hopi dje práctica i ritualnan asociá cu bruheria moderno ta sorprendentemente similar na e aspectonan misterioso di satanismo. P’esei, asta curiosidad supuestamente inocente, por hiba fácilmente na ocultismo. Sí, den e manera aki hopi hende a bira víctima dje influencia malbado di Satanas.

No mester pasa por haltu dje echo cu tin biaha practicantenan di bruheria moderno ta ser atraí na dje pasobra nan ta hambrá pa poder of vengansa. Jennifer, un hacidó di bruha moderno, a bisa: “Tin hende cu por yama nan mes hacidó di bruha i ta us’é pa propósitonan diabólico.” En todo caso, tantu hacidónan di bruha benigno como vengativo ta core peliger di cai completamente bou di control di Satanas i e demoñonan. Tin hacidó di bruha cu kisas ta nenga cu tal sernan spiritual malbado ta existí, pero esaki ta haci nan asta mas vulnerabel pa nan engaño.—Compará cu 1 Corintionan 10:20, 21.

Bijbel ta condená divinacion, bruheria, magia, mara hende cu maldicion i cualkier intento pa comunicá cu morto. E ta declará bon cla: “Tur hende cu ta haci e cosnan aki ta algu detestabel pa Jehova.” (Deuteronomio 18:10-12) Ta claro cu cristiannan ta decididu pa “obra loke ta bon pa cu tur,” i den nan ministerio nan a yuda hopi hende libra for di tur forma di spiritismo. (Galationan 6:10; Echonan 16:14-18) No obstante, cristiannan berdadero ta evitá tur loke tin di haci cu adoracion falsu, incluso cualkier forma di bruheria.—2 Corintionan 6:15-17.

[Notas]

[Plachi Rekonosementu na página 18]

Plachi Book of Devils, Demons and Witchcraft/Ernst and Johanna Lehner/Dover