Para Completo i cu Conviccion Firme

Yudando Hóbennan cu Instruccion Oportuno

EPAFRAS tabata un cristian di promé siglo cu a biaha pa Roma. Pero tog, pa un bon motibu, e tabata blo pensa riba Colósas, un stad den Asia Menor. El a predicá e bon nobo aya i sin duda a yuda algun colosense bira disipel di Jesucristo. (Colosensenan 1:7) Epafras tabata profundamente interesá den e compañeronan creyente na Colósas, pasobra for di Roma apostel Pablo a skirbi nan: “Epafras . . . ta manda su cumindamentu pa boso, semper haciendo su esfuerso pa boso den su oracionnan, pa boso finalmente para completo i cu conviccion firme den henter e boluntad di Dios.”—Colosensenan 4:12.

Asina tambe, mayornan cristian djawe ta haci oracion ferviente p’e bienestar spiritual di nan yunan. E mayornan aki ta haci esfuerso pa inculcá amor pa Dios den curason di nan chikitinnan pa esakinan por bira firme den fe.

Hopi hóben cristian a pidi yudansa pa trata cu e problemanan cu nan ta topa na scol of otro caminda. Un hobencita di 15 aña a bisa: “Nos problemanan ta birando mas serio. Bida ta hinca miedu den bo curpa. Nos mester di yudansa!” E peticionnan dje hóbennan ei i e oracionnan di mayornan deboto a haña contesta? Sí! “E esclabo fiel i discreto” a percurá instruccion basá riba Bijbel. (Mateo 24:45) Aki nos ta mira algun literatura cu a yuda cientos di miles di hóben “para completo i cu conviccion firme.” Laga nos considerá un par dje publicacionnan aki.

“Mira . . . 15.000 Testigo Nobo!”

Na augustus 1941, un auditorio di 115.000 persona a reuní na St. Louis, Missouri, Merca, p’e congreso di mas grandi cu Testigonan di Jehova a yega di tene te cu e tempu ei. Riba e último dia dje congreso—“Dia di Mucha”—rond di 15.000 mucha cu tabata sintá pegá cu e plataforma a scucha atentamente ora Joseph F. Rutherford a papia riba e tema “Yunan dje Rey.” Casi na final di su discurso, Rutherford, kende e tempu ei tabatin 71 aña, a bisa cu un tono paternal:

“Muchanan, boso tur . . . cu a bai di acuerdo . . . pa obedecé Dios i su Rey, por fabor lanta para.” E muchanan a lanta para pareu. “Mira,” ruman Rutherford a sclama, “mas cu 15.000 testigo nobo dje Reino!” A sigui un tremendo aplauso. E orador a agregá: “Boso tur cu ta bai haci tur boso posibel pa conta otronan tocante e Reino di Dios . . . , bisa Sí.” E muchanan a respondé cu un “Sí!” resonante. Despues el a mustra e buki nobo Yunan (na ingles, Children), cu henter e auditorio a ricibí cu un aplauso largu.

Despues dje discurso conmovedor aki, un fila largu di hóben a cana subi riba plataforma caminda ruman Rutherford a duna nan un ehemplar dje buki nobo di regalo. E esena a pone tur hende su wowo yena cu awa. Un testigo ocular dje ocasion a bisa: “Ta un curason di piedra so lo no a sinti nada mirando hóbennan [ta mustra] pleno confiansa i fe den nan Dios, Jehova.”

N’e asamblea memorabel ei, 1.300 hóben a bautisá como símbolo di nan dedicacion na Jehova. Hopi di nan a keda firme den fe te n’e dia djawe. Nan ta sostené congregacionnan local, ta boluntario di Betel of ta sirbi como misionero den estranheria. En berdad, “Dia di Mucha” i e buki Yunan a haci un impresion duradero riba hopi curason yong!

“Ta Como si Fuera Nan Ta Yega Net na Tempu”

Durante añanan ’70 di siglo 20, Testigonan di Jehova a publicá tres buki mas cu a alcansá curason di cientos di miles di hóben. Esakinan tabata Scuchando e Gran Maestro, Bo hubentud—sacando mayor probecho foi dje i Mi buki di relato bíblico. Na 1982, a cuminsá publicá e seri “Hóbennan Sa Puntra . . .” den e revista Spierta! E artículonan aki a toca curason apreciativo di tantu hóben como adulto. “Tur anochi mi ta gradicí Dios cu el a laga publicá nan,” un hóben di 14 aña a bisa. “Mi stima e artículonan,” un hóben di 13 aña a comentá, “ta como si fuera nan ta yega net na tempu.” Tantu mayornan como ancianonan cristian nombrá ta di acuerdo cu e artículonan aki tabata oportuno i probechoso.

Pa 1989, a publicá rond di 200 artículo “Hóbennan Sa Puntra . . .” den Spierta! N’e Congreso di Distrito “Debocion Piadoso” dje aña ei, a presentá e buki Loke hovenan sa puntra—Contesta práctica. El a yuda hóbennan permanecé firme den fe? Tres hóben a skirbi: “E buki aki ta un instrumento balioso cu ta yuda nos comprendé nos problemanan i sa con pa trata cu nan. Danki pa boso interes den nos bienestar.” Hopi lector yong rond mundu ta di acuerdo.

“El A Calma Nos Hamber”

Na 1999, Testigonan di Jehova a producí un otro forma di instruccion oportuno pa hóbennan: e video Hóbennan Sa Puntra—Con Mi Por Haña Berdadero Amigu? Esaki a generá hopi entusiasmo. “E video aki a touch mi curason profundamente,” un hobencita di 14 aña a bisa. “Lo e bira un parti regular di nos alimentacion spiritual,” un mama soltero a declará. “Ta emocionante pa sa cu nos mihó Amigu, Jehova, ta ègt stima e hóbennan cu ta den su organisacion mundial i ta percurá pa nan,” un mucha muher a bisa.

Kico e video a logra? Hóbennan ta bisa: “El a yuda mi vigilá mi asociacion, cera mas cu e rumannan di congregacion, i haci Jehova mi amigu.” “El a duna mi curashi pa enfrentá mi pareunan.” “El a haci mi firme den mi determinacion pa sirbi Jehova lo mihó cu mi por.” I un parehá casá a skirbi: “Danki di curason pa duna nos e ‘alimento’ aki. El a calma nos hamber.”

E “esclabo fiel i discreto” ungí a cumpli cu e comision cu Dios a dun’é, i el a percurá alimento spiritual oportuno pa tur esnan cu kier acept’é. I esta un goso pa mira con e instruccion bíblico ei ta yudando hóbennan djawe “para completo i cu conviccion firme den henter e boluntad di Dios”!