Pregunta di Lektor

Si un kristian ta tende stèm, esei ta nifiká outomátikamente ku e ta bou di atake di demoño?

Nò. Ounke tin informe ku demoñonan sa manifestá nan mes di e forma ei, hopi hende ku ta tende stèm òf eksperensiá otro sensashonnan ineksplikabel i molestoso a haña sa, despues di investigashon, ku nan tin un problema médiko.

Asta den promé siglo ta parse ku hende a rekonosé ku tin bes problema di salú i atakenan di demoño sa produsí e mesun síntomanan. Na Mateo 17:14-18 (NW), nos ta lesa di un hóben ku Hesus a kura. Ounke e mucha hòmber a manifestá síntomanan severo di epilepsia, realmente ta demoño a pon’é sufri. Sin embargo, na un okashon mas promé ora e hendenan a trese multitut di hende malu pa Hesus kura, tabatin entre nan ‘hende poseí pa demoño i epiléptikonan.’ (Mateo 4:24) Aparentemente hende a mira ku algun persona ku epilepsia no tabata poseí pa demoño. Nan tabatin un problema físiko.

Tin informe ku ta bisa ku hende ku ta sufri di skisofrenia, un malesa ku hopi bes por ser tratá ku remedi, ta tende stèm òf eksperensiá otro síntomanan ku lo por parse algu sobrenatural.a Tambe tin otro kondishonnan físiko ku por kousa konfushon mental i pone hende pensa eróneamente ku ta trata di atake di demoño. P’esei, ounke un persona ku ta tende stèm òf eksperensiá sensashonnan molestoso lo no kier deskartá atake di demoño, mester animá e persona aki definitivamente pa investigá si no tin un splikashon médiko pa loke e ta eksperensiando.

[Nota]