Un Pregunta Ku Ta Interesá Hopi Hende

HENDE tin diferente punto di bista tokante bida i morto. Algun ta pensa ku despues di morto, nan ta sigui biba, podisé den un otro forma òf otro kaminda. Tin hende ta pensa ku nan lo nase di nobo pa nan hiba un otro bida. Anto otronan ta pensa ku morto ta fin di tur kos.

Kisas bo tin bo mes pensamentu riba e tópiko akí, dependiendo di e manera ku bo a lanta òf di kaminda bo ta biba. Komo ku hende tin diferente opinion tokante kiko ta sosodé despues di morto, unda nos por haña informashon konfiabel i korekto tokante e tema akí?

Pa hopi siglo, lidernan religioso a siña hende e doktrina ku alma ta inmortal. Kasi tur religion prinsipal, manera kristian, hindú, hudiu, mòslem i otronan, ta kere den un alma inmortal ku ta sigui biba despues ku e kurpa muri i ku ta pasa pa e region di spiritu. Di otro banda, budistanan ta kere ku ora un hende nase di nobo vários biaha, e forsa, òf energia mental, por alkansá un estado di felisidat total ku yama Nirvana.

E doktrinanan akí ta pone mayoria di hende rònt mundu kere ku morto ta hiba na un bida den un otro mundu. Pues pa hopi hende, morto ta un parti importante di e siklo di bida ku, segun nan, ta parti di e boluntat di Dios. Pero kiko Beibel ta bisa tokante esaki? Sea asina bon di lesa e siguiente artíkulo. E kontesta por sorprendé bo.