Presentando Foyeto pa Busca Esnan Interesá
1 Foyetonan ta instrumentonan poderoso. Den solamente 32 página, un foyeto por establecé berdadnan bíblico firmemente i tumba razonamentu i siñansanan contrario n’e conocimentu di Dios.—2 Cor. 10:5.
2 Despues di a lesa e foyeto Testigo di Jehova ta haci unidamente e boluntad di Dios den tur e mundo, un homber a ser impulsá pa skirbi: “Nunca mi no a mira un organisacion asina. . . . Ta maraviyoso pa haña hende cu ta tuma Dios su boluntad asina na serio den e época aki di asina tantu hipocresia religioso.” Un dokter di bruha na Africa a studia e foyeto Disfruta di bida riba tera pa semper! Ki efecto esei tabatin riba dje? El a stop su práctica di bruheria i a manda e muhernan cu e tabata biba cuné bai, cu excepcion di su promé casá. Anto el a casa cuné legalmente.
3 E foyeto Bo Mester Kere den Trinidad? ta un instrumento dje berdad bon-documentá, razonabel i eficas. Comentando riba dje, un escritor religioso p’e korant The Sunday Gleaner na Jamaica, a bisa: “E publicacion . . . ta un obra maestro dje Testigonan i awor ningun trinitario—of binatario—no ta ‘safe.’ E foyeto ta montoná cita riba cita for di fuentenan histórico i teológico pa mustra cu e doctrina di Trinidad no tabata sacá for di Bijbel. . . . Ta masha difícil p’e escritor religioso aki mira con e miembro di iglesia comun—of asta esun ariba loke ta comun—por contestá e argumentonan imponente i imperativo compilá dor dje Testigonan contra e punto di bista cu Jesus ta Dios.”
4 Usa Nan Bon: Pa ser eficas, mester laga e instrumentonan atractivo i autoritativo aki cu hende cu lo lesa nan. Siendo cu nos tin vários foyeto, cada un tratando cu un tema diferente, nos mester trata na ofrecé esun cu nos ta haña mas apropiado p’e individuo cu nos ta dunando testimonio. Conociendo nos foyetonan i teniendo un variedad di nan na man lo hacié mas fácil pa nos usa nan bon, sea den sirbishi di veld, na cas of otro caminda.
5 Por ehempel, si bo ta papiando cu un persona cu ta confundí tocante cristiandad su doctrina di Trinidad of cu kisas ta pensa cu Jesus ta Dios, cua foyeto lo bo usa? Si un persona ta cuestioná pakico un Dios amoroso a permití asina tantu sufrimentu, cua foyeto lo satisfacé su necesidad? Si un persona ta expresá preocupacion tocante e necesidad pa un gobiernu cu ta beneficiá pueblo, cua por ta e foyeto apropiado p’e?
6 Ademas di sa cua foyeto pa usa, trata na lanta apetit dje persona pa su contenido. Si circunstancianan permití, señalá na un comentario of plachi cu lo por stimulá su interes pa lesa e material. Of lo bo por lesa un of dos paragraf cuné, buscando e textonan citá i considerá e material. Hopi studio di Bijbel excelente a cuminsá asina.
7 Nos foyetonan ta percurá contestanan bíblico i ta duna speransa na esnan cu ta suspirá i keha tocante e cosnan repugnante cu ta ser hací den mundu. (Compará cu Ezekiel 9:4.) Hende cu ta semehante na carné lo respondé n’e mensahe cu tal literatura ta contené. Nos tin e privilegio di haci bon uso dje foyetonan den tur rasgo di nos ministerio segun nos ta busca esnan interesá.