Busca Esnan cu Ta Corectamente Dispuesto
1 Un propósito dje trabou di predicá ta pa haña esnan cu ta “corectamente dispuesto pa bida eterno.” (Echo. 13:48) Distribucion dje revistanan Toren di Vigilancia i Spierta! a resultá di ta un manera excelente pa logra esaki, ya cu nos revistanan ta haci hende conciente dje speransa di Reino. Nos lo ofrecé e revistanan durante april. Ta di spera cu caminda haña hende interesá, nos por cuminsá studionan bíblico for dje buki Conocimentu cu Ta Hiba na Bida Eterno. Ata aki algun sugerencia cu por duná bo éxito:
2 Ora di usa e “Toren di Vigilancia” di 1 di april, lo bo por presentá “Alabá e Rey di Eternidad!,” cu ta enfocá riba e discurso público dje congreso di districto di aña pasá, i bisa:
◼ “Hopi hende cu nos papia cuné tin fe den Dios. Otronan ta haña ta difícil pa kere den dje. Kico abo ta opiná? [Permití contesta.] Nos ta rondoná cu evidencia concreto dunando prueba cu mester tin un Dios. [Lesa Salmo 104:24.] Ora nos mira un cámara of un computer, nos ta admití un bes cu e mester a ser producí dor di un diseñador inteligente. Lo ta razonabel pa bisa cu cosnan hopi mas complicá, manera e tera i nos como hende, a originá pa casualidad?” Usa un paragraf for dje artículo pa mustra un motibu válido pa kere den Dios.
3 E “Toren di Vigilancia” di 15 di april ta contené e artículo “Pakico Adoracion Berdadero Ta Ricibí e Bendicion di Dios.” Promé cu present’é, lo bo por puntra:
◼ “Cu e cientos di religionnan cu ta existí den mundu, bo ta kere nan tur por ta aceptabel pa Dios? [Permití comentario.] Jesus a predicí cu apesar dje afirmacionnan di hopi persona religioso, esnan cu no ta haciendo e boluntad di Dios lo ser rechasá. [Lesa Mateo 7:21-23.] Ta importante pa nos identificá e religion berdadero cu Jesus a siña di dje.” Bai na e subtema “Ki Fruta Religion Berdadero Mester Producí?,” cuminsando na página 16, i considerá un ehempel pa ilustrá e punto.
4 Ora di destacá e tópico principal di e “¡Despertad!” di 22 di april, “Ora Lo No Tin Guera Mas,” lo bo por pensa pa bisa:
◼ “Den e siglo aki tabatin cientos di gueranan, incluyendo dos guera mundial. Sin embargo, casi tur lider mundial ta bisa cu nan kier pas. Tur hende cu mi conocé ta bisa mescos. Si tur hende kier pas, pakico nan no por logr’é? [Permití contesta.] Kico bo ta kere ta necesario pa nos mira berdadero pas riba tera?” Despues dje doño di cas su contesta, bai na página 8 i 9 i lesa textonan manera Salmo 46:8, 9. Usando e plachinan i textonan citá, mustra con e Reino di Dios lo trece pas mundial cu lo dura pa semper. Anto puntra e doño di cas si e ta deseá na lesa e revista, i haci areglo pa bolbe.
5 Si bo ta haña hopi hende cu ta bisa cu nan ta ocupá, lo bo por purba esaki:
◼ “Nos ta interesá pa yuda hende cu ta hiba un bida ocupá i cu ta haña poco tempu pa refleccioná riba e aspecto spiritual di bida. Nos revistanan, E Toren di Vigilancia i Spierta!, ta diseñá pa percurá informacion breve tocante cuestionnan importante cu ta afectá abo i bo famia. Lo mi kier laga e copianan aki pa bo lesa.”
6 Corda duna esnan cu aceptá e revistanan oportunidad pa contribuí. Nan siguramente lo beneficiá di lesa E Toren di Vigilancia i Spierta!, cuanan ta trece “bon nobo di algu mihó.”—Isa. 52:7.