Publicando Bon Nobo di Algu Mihó
1 Pa 117 aña E Toren di Vigilancia a sirbi como un defensor di berdad bíblico. Actualmente, 18.950.000 copia di cada edicion ta ser imprimí na 125 idioma. Spierta! tambe pa hopi tempu a boga p’e Palabra di Dios, i awor e tin un circulacion di 15.730.000 copia na 80 idioma.—Compará cu Colosensenan 1:23.
2 Revistanan Ta Satisfacé un Necesidad Spiritual: E Toren di Vigilancia i Spierta! a beneficiá miyones di hende di curason sincero dor di yuda satisfacé nan necesidad spiritual. Artículonan cu ta edificá bo fe ta ser publicá. Por ehempel, den E Toren di Vigilancia di 1 di februari, 1996, nos a studia informacion tratando cu e necesidad di confia den Jehova i den su Palabra. E edicion di 1 di mart, 1996, di E Toren di Vigilancia a animá nos pa keda ocupá den e sirbishi di Jehova i pa keda den expectativa di dje. Ki stimulante tabata e consideracion detayá dje profecia di Sofonías! Tambe tabatin e consideracion di lealtad cristian, cu tabata algu cu a fortalecé nos fe, den E Toren di Vigilancia di 15 di mart, 1996. E edicion di 15 di mei, 1996, a enfatisá e importancia di lesa i studia e Palabra di Dios riba un base regular. E artículonan aki a sirbi pa profundisá nos comprendimentu dje Palabra di Dios, i a realsá nos aprecio pa su Reino.
3 Tambe e revistanan aki ta contené artículonan práctico i oportuno en cuanto conducta piadoso, moralidad cristian i otro temanan di vital importancia. Nan ta trata seriamente cu e berdadero cuestionnan cu ta afectá nos bida. Como resultado, nos ta disfrutá awor di un calidad di bida superior miéntras cu nos ta spera e cumplimentu dje promesanan di Dios di algu asta mas mihó den futuro.—Isa. 48:17; 1 Tim. 6:19.
4 Un repaso breve di loke ta ser bisá na página 4 di cada edicion di Spierta! ta duna nos bon motibu pa recomendá e revista aki como excelente material di lesa pa hende na tur parti, tantu hóben como bieu. Ei tin pará skirbí: “Spierta! ta pa iluminacion di henter e famia. E ta mustra con pa trata cu problemanan djawe. E ta presentá noticia, ta conta tocante hende di hopi pais, ta examiná religion i ciencia. Pero e ta haci mas. E ta profundisá asuntunan i ta señalá n’e berdadero nificacion di sucesonan di actualidad, sin embargo en cuanto política, e semper ta keda neutral i no ta halsa un rasa riba otro. Di mayor importancia, e revista aki ta aumentá confiansa den e promesa dje Creador di un mundu nobo di pas i siguridad cu ta cerca di reemplasá e actual sistema di cosnan malbado i ingobernabel.”
5 Compartí e Revistanan cu Otronan: Sea generoso den distribuí E Toren di Vigilancia i Spierta! (Compará cu 1 Timoteo 6:18.) Tin huntu cu bo copianan disponibel di manera cu bo por ofrecé nan na ken cu bo topa pa casualidad. (Ecl. 11:6) Nos tur, incluyendo publicadornan hóben of nobo, por tin un pleno participacion den distribuí revista e luna aki dor di usa presentacionnan breve basá riba e artículonan oportuno cu tin den e edicionnan actual. Familiarisá bo bon cu nan contenido, i ofrecé nan cu sinceridad i conviccion.
6 E Toren di Vigilancia i Spierta! ta contené informacion cu tur persona tin mester di dje. Distribuyendo nan ta un dje mihó maneranan cu nos por yuda otronan haña sa e bon nobo di cu algu mihó ta bini pronto!