Yuda Esnan Inexperenciá Comprendé
1 Mediante e trabou di haci disipel, nos ta siña otronan loke Dios ta rekerí di nan. (Mat. 28:19, 20) Rond mundu mas cu cincu miyon Testigo ta haciendo un esfuerso tremendo pa logra esei. Exito no ta ser midí n’e cantidad di oranan cu a predicá, ni n’e literatura lagá ni n’e studionan di Bijbel cu a cuminsá. Nos ta logra nos obhetivo ora hende comprendé i actua riba loke nan siña.
2 Yudando otronan spiritualmente ta enbolbé “haci esnan inexperenciá comprendé.” (Sal. 119:130) Curasonnan ta ser tocá i hende ta ser motivá solamente ora nan “capta e sentido di dje.” (Mat. 15:10) Segun cu nos trabou ta expandé i ta intensificá, nos ta ripará mas i mas e necesidad pa papia i siña cu simplesa. Ta p’esei Sociedad a publicá e foyeto Kico Dios Ta Rekerí di Nos? E ta contené un curso completo di studio cu ta cubri tur e siñansanan fundamental dje Bijbel. E lesnan ta corticu, e palabranan simpel, i e instruccion fácil pa comprendé, poniendo cu tur clase di hende lo haña e foyeto aki atractivo.
3 Durante e lunanan di april cu mei lo ofrecé abonament riba e revistanan. Sin embargo, ta ser recomendá cu den caso cu e doño di cas ya caba tin abonament riba tur dos e revistanan lo bo por ofrecé e foyeto. Un biaha mas nos kier enfatisá pa ofrecé e revistanan riba diasabra. Hiba e foyeto pa hende cu den pasado a yega di tuma literatura cu smak. Corda cu e por ta specialmente práctico pa siña mucha, hende cu ta papia un idioma stranhero, i esnan cu no por lesa masha bon.
4 Usa un Introduccion Simpel: Ora di presentá e foyeto Rekerí, referí na página 2, caminda e ta splica cu “e foyeto aki ta diseñá como un curso di studio di Bijbel.” Bai na §3 na página 3 i mustra pakico e persona tin cu studia Bijbel. Lanta su interes cu algun título di les cu ta revelá berdadnan simpel di Bijbel. Demostrá con e foyeto aki ta haci siñamentu un placer, i ofrecé e doño di cas pa dun’é yudansa personal.
5 Conducí un Studio Progresivo: Nos meta ta pa haci mas cu djis conducí studionan—nos kier haci disipelnan cu lo bira apoyadornan firme di adoracion berdadero. Den algun siman por cubri e foyeto i lo mester hiba direct na un studio for dje buki Conocimentu. (Mira e nota na pia di página 31.) For di cuminsamentu mes, yuda e studiante identificá e organisacion di Jehova. (Mira e buki Razonamiento, página 276-7 [na ingles, página 283-4].) Enfatisá e balor di reunionnan di congregacion, i splica cu dor di asistí na nan, nan lo haña un comprendimentu extenso dje manera con pa practicá adoracion berdadero.—Heb. 10:24, 25.
6 Un pleno participacion den e trabou special aki durante april i mei sigur lo duna nos e goso cu ta resultá di yuda esnan sincero pa “adkerí comprendimentu” cu ta hiba na bida.—Pro. 4:5.