Siña Otronan Loke Dios Ta Rekerí
1 Ainda nos por haña hopi hende cu spiritualmente a ser privá di “tende e palabranan di Jehova.” (Amos 8:11) Aunke algun hende ta kere cu Dios ta existí, nan no sa di su propósito i rekisitonan. Pues, tin un necesidad pa nos siña nan e berdad di Reino cu ta salba bida. Dor di ta aptamente ekipá i prepará pa duna testimonio na tur oportunidad, nos por haña esnan cu kier siña loke Jehova ta rekerí.
2 Durante april i mei, nos lo tin edicionnan masha oportuno di E Toren di Vigilancia i Spierta! pa distribuí. Ademas, pa promé biaha, nos lo presentá como oferta e foyeto Kico Dios Ta Rekerí di Nos? Su plachinan atractivo i preguntanan cu ta stimulá pensamentu ta pone cu tur clase di hende lo haña e foyeto aki atractivo. E sugerencianan cu ta sigui ta pa yuda nos usa nos excelente publicacionnan eficasmente.
3 Buscando pa Haña Hende: Den áreanan caminda hopi hende no ta na cas ora nos pasa di cas pa cas, ta resultando probechoso pa busca i papia cu hende unda cu por haña nan. E suplemento di Nos Ministerio di Reino di september 1996 a animá nos pa predicá e bon nobo tur caminda—riba caya, den transporte público, i den parkenan, lugánan di parkeer, i lugánan di negoshi. Tambe el a haci nos conciente dje necesidad pa crea oportunidadnan pa predicá informalmente. Como un ehempel di esaki, un ruman muher pionero a bai dierentuin i a bai cu un cantidad dje Spierta! di 8 di augustus, 1996, cu e serinan “Especienan den Peliger—Pakico Preocupá Bo?” Den un ora, el a laga 40 copia cu algun stimador di bestia masha apreciativo! Ki éxito abo a disfrutá di dje te asina leu predicando e bon nobo tur caminda? E Toren di Vigilancia i Spierta! como tambe e foyeto Rekerí ta specialmente apto pa tur clase di testificacion dor cu nan ta presentá informacion cu ta afectá bida di hende i ta stimulá e abilidad di pensa.
4 Cuminsando Combersacionnan: E último página di Nos Ministerio di Reino di october 1996 ta duna detaye en cuanto con pa prepará bo propio presentacion p’e revistanan Toren di Vigilancia i Spierta! E mésun sugerencianan lo ta eficas ora di prepará bo presentacion p’e foyeto Rekerí. Loke nos ta bisa por ta breve manera un par di frase of suficiente largu pa incluí un pensamentu bíblico. Ta importante pa scoge e palabranan di introduccion cuidadosamente, ya cu nan por determiná si e persona cu bo acercá lo sigui scucha. Algun ruman tabatin éxito cu e comentario aki di introduccion: “Mi a lesa un artículo cu a animá mi, i mi kier compartié cu bo.” Of bo por plantia un pregunta interesante pa hala e persona den un combersacion.
5 Si ta apropiado den bo área, lo bo por purba haci preguntanan manera esakinan den bo presentacionnan e luna aki:
◼ “Awe nos ta mira asina hopi grafiti, sushi i contaminacion. Kico lo ta necesario pa limpia e tera i hacié un mihó lugá pa biba?” Permití contesta, anto splica cu bo tin informacion cu ta sigurá nos na ki tempu i con e tera lo bira un hardin mundial. Compartí un informacion specífico, un texto bíblico breve, i un plachi colorido for di un revista actual, i despues ofrec’é n’e persona p’e lesa. Mencioná cu hopi di esnan cu ta gusta lesa nos publicacionnan ta contribuí pa nan. Promé cu bo terminá e combersacion, purba haci areglo pa un rebishita.
◼ “Bo ta kere cu tabata Dios su intencion pa nos biba rondoná pa problema manera esnan cu nos ta confrontá awe?” Despues cu e persona contestá, lo bo por bisa: “Probablemente bo ta conocé e oracion cu Jesus a siña su siguidornan pa haci, pidiendo pa e Reino di Dios bini. Bo a yega di pensa kico precis e Reino di Dios realmente ta?” Bai na les 6 den e foyeto Rekerí, i lesa e preguntanan cu ta na comienso dje les. Anto, segun cu bo ta lesa §1, señalá e contesta n’e promé pregunta. Splica cu e sobrá preguntanan ta ser contestá mes brevemente. Ofrecé e foyeto, mencioná e contribucion, i ofrecé pa topa atrobe pa compartí mas informacion tocante e Reino.
◼ “Hopi hende pensativo ta cuminsá mira e religionnan di mundu como e causa dje problemanan di hende mas bien cu e solucion. Kico abo ta pensa di esei?” Despues di scucha n’e punto di bista dje persona, mustra algu for di un dje revistanan actual cu lo por capta su interes tocante e fracaso di religion falsu of su destruccion cu ta acercando. Puntra si lo e kier les’é. Intercambiá nomber, i ofrecé pa bolbe haci contacto atrobe di manera cu bo por splica di ki manera religion berdadero no a laga humanidad na caya. Ki ora cu ta apropiado, splica con e persona interesá por haci un contribucion chikitu.
◼ “Cu asina tantu problema den bida di famia awe, bo a yega di puntra bo mes kico ta e secreto pa haña felicidad den famia?” Warda riba contesta, i splica cu den Bijbel, Dios ta revelá e berdadero secreto pa felicidad den famia. Kisas lo bo por lesa Isaías 48:17. Anto bai na les 8 den e foyeto Rekerí, i señalá algun dje versículonan di Bijbel mencioná cu ta percurá guia confiabel pa cada miembro dje famia. Lesa e lista di pregunta na cuminsamentu dje les. Puntra e persona si lo e kier lesa e contestanan. Si ta asina, dun’é e foyeto i splica cu nos ta aceptá un contribucion chikitu. Ofrecé pa bolbe bek na un otro ora pa compartí mas dje guia práctico cu Bijbel ta contené pa bida di famia felis.
6 E suplemento den Nos Ministerio di Reino di mart 1997 ta animá nos pa tuma un curashi pa haci rebishita. El a recomendá pa usa e foyeto Rekerí pa cuminsá studionan di Bijbel, si no ta n’e bishita inicial, anto n’e rebishita. Humanidad su necesidad di mas grandi ta pa siña loke Dios ta rekerí anto hacié. (Col. 1:9, 10) Nos lo beneficiá otronan mashá durante april i mei si nos por cuminsá siña nan loke nos sa tocante Jehova su rekisitonan pa bida.—1 Cor. 9:23.