Testificá na Unda cu Tin Hende
1 Reconociendo e papel cu e spiritu di Dios a hunga den su ministerio, apostel Pablo a declará: “Dios a sigui hacié crece.” Tambe el a reconocé: “Nos ta colaboradónan di Dios.” (1 Cor. 3:5-9) Esaki ta un privilegio maraviyoso. Con nos por demostrá públicamente cu nos ta apreciá di ta colaboradónan di Dios? Dor di declará e bon nobo na tur hende cu nos topa den e trabou di cas-pa-cas i na tur otro parti.
2 Nos a ser mandá pa “haci disipel di hende.” (Mat. 28:19) Si nos haña contacto cu solamente un par di hende ora nos ta participá den e ministerio, nos por desanimá lihé i sinti cu nos no a logra mashá. Na otro un banda, nos tin e mayor goso den nos ministerio ora nos por haña hopi hende i combersá cu nan. Esaki por ta un desafio basta grandi, como cu e ta rekerí iniciativa di nos parti pa bai caminda e hendenan ta pa nos por papia cu nan.
3 Ehempelnan Práctico: Nos por testificá na hende na marshe, den parkenan, na lugánan di descanso i stacionnan di bus. Ora bo ta core den transporte público, bo ta prepará pa duna un testimonio na caminda? Dos Testigo cu tabata coriendo den un bus yen-yen bayendo pa nan reunion pa sirbishi tabata combersá cu otro tocante e plachi di Paradijs den e buki Conocimentu, considerando e promesanan di Dios pa futuro. Manera nan a spera a sosodé, un yoncuman cu tabata pará cerca di nan a tende e combersacion i a keda impresioná cu loke el a tende. Promé cu el a baha for dje bus, el a aceptá un buki i a pidi pa un persona bishit’é na su cas.
4 Hopi publicadó a haña goso den duna testimonio informal. Un ruman muher a bai n’e centro comercial local un atardi i a acercá e hendenan cu a caba di haci nan cómpras pero cu no a parce di tin purá. El a laga tur e literatura cu e tabatin den su tas. Un homber cu tabata wardando den su auto a keda contentu di ricibí e revistanan for di dje. El a yega di bai reunion, i nan combersacion a rebibá su interes.
5 Ta un privilegio pa halsa e nomber di Jehova. Dor di demostrá nos celo pa e trabou di predicá, nos ta mustra cu nos no a keda sin cumpli cu e propósito di Dios su bondad inmerecí pa cu nos. Pasobra “awor ta e tempu specialmente aceptabel” pa yuda otronan, laga nos bai na unda cu tin hende i duna nan testimonio tocante Jehova su “dia di salbacion.”—2 Cor. 6:1, 2.