Nos Mester Ta Maestro, No Simplemente Predicadó
1 Hende a yega di comentá cu “Testigonan di Jehova literalmente a cubri e tera cu nan testificacion.” Con esaki tabata posibel? No cu poder humano, sino mediante e spiritu di Dios cu ta operá riba su sirbidónan segun cu nan ta haci uso di vários percuracion pa cumpli cu nan comision di predicá i siña.—Zac. 4:6; Echo. 1:8.
2 E página imprimí ta un medio eficas pa efectuá nos trabou di predicá. Atrabes di añanan Testigonan di Jehova a imprimí i distribuí biyones di buki, foyeto, revista i tratado, pa yuda haci e bon nobo di Reino conocí. Informenan den e Anuario 1997 ta mustra cu produccion di literatura a alcansá nivelnan récord. Te cu awor, mas cu 91 miyon ehemplar dje Traducción del Nuevo Mundo a ser imprimí. Den un solo aña e cantidad di Toren di Vigilancia i Spierta! imprimí na Merca a subi cu 7,1 porciento. Na Alemania, produccion di revista a subi cu 35 porciento. Mas cu un tercer parti dje revistanan producí ei ta pa e campo ruso.
3 Pakico tin mester di asina tantu literatura? Mundialmente, tabatin un tremendo reaccion riba e animacion cu a ser duná pa testificá unda cu nos por haña hende. Dor cu mas di nos ta extendé nos trabou di testificá—den lugánan público, riba caya i den teritorio di negoshi—nos ta lagando mas literatura cu hende cu ta mustra interes. Hopi di e hendenan aki rara bes, pa no bisa nunca, tabatin e oportunidad di tende e mensahe di Reino promé. Pa cumpli cu e necesidad aki, congregacionnan ta tene un variedad di publicacion na stock pa usa den tur rasgo dje ministerio.
4 Kico Ta Nos Meta ora di Distribuí Literatura? Nos meta no ta pa djis laga literatura. E comision pa haci disipel ta enbolbé dos aspecto—predicá i siña. Promé, nos tin e privilegio di predicá e bon nobo di Reino, haciendo hende conciente cu esei ta e único speransa pa humanidad. (Mat. 10:7; 24:14) Nos literatura basá riba Bijbel ta un medio probá i eficas pa stimulá interes i compartí conocimentu tocante e Reino cu otronan.
5 Di dos, pa nos haci disipel, nos tin cu siña hende tur e cosnan cu Jesus a manda. (Mat. 11:1; 28:19, 20) Atrobe, e literatura ta hunga un papel importante den yuda nos inculcá e berdad den curason dje studiantenan, yudando nan pa bira disipel.
6 Esnan cu aceptá literatura por ta ‘tendedónan dje palabra,’ pero ta improbabel cu nan lo bira hacidónan di dje si laga nan pa nan cuenta. (Sant. 1:22-25) Poco hende lo bira disipel un dia a ménos cu un persona guia nan. (Echo. 8:30, 31) Nan tin mester di un maestro pa siña nan proba pa nan mes e berdad cu ta ser hañá den e Scritura. (Echo. 17:2, 3) Nos meta ta pa yuda nan progresá te n’e punto di dedicacion i bautismo i entrená nan pa bira adecuadamente cualificá pa siña otronan.—2 Tim. 2:2.
7 E Mayor Necesidad Ta pa Mas Maestro: Ora nos ta predicá, nos ta declará e bon nobo públicamente. Sin embargo, siña ta encerá instruí un persona progresivamente. Miéntras cu predicacion ta haci otronan conciente dje mensahe di Reino, siñamentu ta yuda hende aceptá e bon nobo i actua riba dje. (Luc. 8:15) Un maestro ta haci mas cu proclamá; e ta splica, razoná cu bon argumento, ta duna evidencia i ta persuadí.
8 Mas tantu di nos posibel mester ta maestro, no simplemente predicadó. (Heb. 5:12a) Distribucion di literatura ta un parti vital di nos trabou, pero cu nos ta logra e di dos obhetivo di nos ministerio finalmente ta dependé di loke nos ta haci como maestro. Aunke nos por ta contentu ora nos por a laga literatura, pa efectuá nos ministerio plenamente, nos no mester mira lagamentu di literatura como nos meta final. (2 Tim. 4:5) Lagamentu di literatura ta un medio eficas pa habri e oportunidad pa siña otronan e berdad.
9 Haci Rebishita pa Cuminsá Studio di Bijbel: Probablemente nos tur a laga un cantidad di buki, foyeto i revista, compilando un lista di rebishita. Nos mester programá un ora regular pa bai bek pa stimulá e interes. Nos propósito principal no ta pa djis laga mas literatura, sino pa animá hende pa lesa i beneficiá di loke nan tin caba. Cuantu progreso spiritual nos mes lo a haci si un hende no a bolbe bes tras bes pa yuda nos adkerí conocimentu exacto?—Juan 17:3.
10 Bai bek cerca tur persona cu a mustra interes cu e meta pa cuminsá un studio di Bijbel sea cu e foyeto Kico Dios Ta Rekerí di Nos? of e buki Conocimentu cu Ta Hiba na Bida Eterno. E dos publicacionnan aki ta presentá e mensahe di Reino den un forma fácil pa comprendé. E foyeto Rekerí ta contené un curso di studio completo, abarcando e siñansanan básico di Bijbel. E buki Conocimentu ta haci posibel pa bo siña un persona e berdad cu mas detaye, pero tog den un forma simpel, cla i breve.
11 E programa simplificá di siñamentu, manera e ta ser splicá den e suplemento di Nos Ministerio di Reino di juni 1996, ta hacié fácil pa e maestro instruí i pa e studiante siña. Tene un copia dje suplemento ei na man pa repasá métodonan i técnicanan di siñansa cu a proba di ta eficas. Algun dje sugerencianan cu e ta duna ta, entre otro, con pa mustra un berdadero interes personal den e studiante, cuantu material pa abarcá den un solo sesion, con pa trata cu preguntanan cu no ta pertenecé n’e tópico, con tantu maestro como studiante por prepará di antemano p’e studio, i con pa dirigí e studiante n’e organisacion di Jehova. Dor di sigui e sugerencianan aki, mas di nos, incluyendo esnan mas nobo, lo por conducí studionan progresivo.
12 Informenan di Bon Exito den Veld: E foyeto Rekerí i e buki Conocimentu a resultá di ta yudansanan balioso den acelerá e proceso di haci disipel. Despues di ricibí e foyeto Rekerí, un ruman homber na Bolivia a us’é mesora pa cuminsá un studio cu un homber. Cuater luna despues n’e congreso di distrito, e studiante aki tabata entre e felis candidatonan pa bautismo!
13 Despues di completá nan studio for dje buki Conocimentu hopi persona ta ser impulsá pa dedicá nan bida na Jehova. Den un congregacion na Angola, e cantidad di studionan di Bijbel cu e publicadónan ta conducí a aumentá di 190 pa 260 i asistencia na reunion a bira dòbel, di 180 pa 360, den solamente cuater luna despues cu a cuminsá usa e buki Conocimentu den e área ei. Djis despues, tabata necesario pa forma un otro congregacion.
14 Despues di a cuminsá cu su promé studio den e buki Conocimentu, un ruman homber a bisa cu conducí for di dje ta “simpel si e conductor djis haci e preguntanan, lesa algun texto cu ta aplicabel i haci sigur cu e studiante ta comprendé.” Aunke semper el a pensa cu ta solamente publicadónan masha cualificá lo por conducí studionan di Bijbel progresivo i cu nunca lo e por a hacié, el a realisá cu e por, anto a bisa: “Si ami por, tur hende por.”
15 Ta dor di conducí studionan di Bijbel como parti di nos ministerio, nos ta logra e meta di haci disipel. Esnan cu a desaroyá e abilidad di participá den e aspecto aki dje ministerio ta hañ’é realmente satisfaciente i ricamente recompensador. Laga cu por ser bisá di nos cu nos tambe ta “predicando e reino di Dios . . . i siñando cosnan tocante e Señor Jesucristo cu e mayor frankesa di expresion.”—Echo. 28:31.