Augustus Lo Ta un Luna Sobresaliente?
1 Aña 1963 tabata un aña sobresaliente p’e pueblo di Jehova. Bo sa pakico? N’e aña ei e cantidad di publicadó mundial a yega un miyon. Si bo tabata den e berdad n’e tempu ei, kisas bo ta corda con emocioná nos tabata di tin asina tantu hende ta predicá e mensahe di Reino! Awor, Merca so tin e cantidad ei di publicadó. Sin embargo, tur luna na Merca tin un promedio di 90.000 publicadó cu no ta raportá nan sirbishi di veld. Na islanan ABC, e cantidad ta un 60 publicadó.
2 Aceptá e Desafio: Miéntras cu na Merca nan lo purba alcansá e máximo di un miyon publicadó durante augustus, nos aki na islanan ABC lo haci esfuerso pa yega e máximo di 2.200 publicadó. Si nos esfuersonan resultá, augustus di berdad lo ta un luna sobresaliente! Nos por alcansá e meta aki? Nos por, si nos tur haci nos parti.
3 Esnan cu ta planea pa bai cu vakansi por dedicá algun tempu n’e ministerio promé cu nan bai. Hiba cu bo algun tratado, foyeto of revista, di manera cu bo por duna testimonio na hende cu bo ta topa durante bo vakansi. Ademas, na bo destinacion bo por disfrutá di sali den sirbishi di veld cu e publicadónan local.
4 Si bo ta malu of incapacitá, tog bo por tin un participacion den e ministerio. Tal bes bo por duna testimonio na dokter, verpleegster of bishitantenan. Kisas bo por predicá via carta of telefon.
5 Sin duda, algun ruman lo apreciá si nan por haña yudansa pa participá den sirbishi di veld den augustus. Anciano, sirbidó ministerial i conductornan di studio di buki mester haci areglo pa por duna e yudansa aki. Di tur manera, no lubidá di entregá bo raport di sirbishi di veld unbes na fin di luna, pa asina por contá bo como publicadó na augustus.
6 Apreciá e Privilegio: E ministerio ta un ‘encargo excelente.’ (2 Tim. 1:14) Nos ta apreciá e privilegio cu nos a ricibí di predicá e bon nobo. (1 Tes. 2:4) Ora nos considerá tur loke Jehova a haci pa nos, esei mester impulsá nos pa henter aña participá continuamente den e trabou di mas importante aki. Nos no mester permití nada stroba nos di predicá regularmente. Laga nos haci augustus un luna sobresaliente den Jehova su sirbishi, i sea dicididu pa tur luna cu sigui despues, nos duna testimonio di Jehova!—Sal. 34:1.