Invitá Nan pa Bini
1 Un invitacion cu a sali hopi siglo pasá ta zona awor den 233 pais rond mundu: “Boso ban, i laga nos subi na e ceru di Jehova, . . . i lo e instruí nos tocante su camindanan, i nos lo cana den su bereanan.” (Isa. 2:3) Un di e mihó maneranan cu nos por yuda hende haci progreso spiritual cu ta hiba na bida eterno ta di dirigí nan n’e organisacion di Jehova.
2 Kisas algun publicadó ta vacilá pa invitá hende pa bin Salon di Reino promé cu esakinan manifestá un grado considerabel di progreso spiritual den nan studio di Bijbel na cas. Sin embargo, sa sosodé cu hende ta cuminsá asistí na reunionnan di congregacion asta promé cu un ruman cuminsá studia Bijbel cu nan. Nos no mester tarda pa invitá hende calurosamente na nos reunionnan i pa animá nan pa asistí.
3 Loke Bo Por Haci: Probechá di tur oportunidad pa informá hende tocante nos reunionnan local. Mencioná cu entrada n’e reunionnan ta grátis i cu no ta pasa colect. Splica con e reunionnan ta bai. Mustra nan cu einan ta studio di Bijbel ta tuma lugá, i cu e material di studio ta disponibel pa tur esnan presente por sigui e studio den nan mes ehemplar. Mencioná cu esnan cu ta asistí ta hende di tur antecedente i rango social dje becindario ei, i cu mucha di tur edad ta bon biní. Nos tin cu keda invitá nos studiantenan di Bijbel, i tambe ofrecé pa yuda nan asistí si esei ta necesario.
4 Un dje último cosnan cu a ser registrá den Bijbel ta un invitacion caluroso pa tuma di Jehova su provisionnan pa bida: “I e spiritu i e bruid ta sigui bisa: ‘Bin!’ . . . I laga ken cu tin sed bini; laga ken cu kier tuma e awa di bida grátis.” (Rev. 22:17) No tin otro manera, ta nos mester invitá otronan na nos reunionnan.
5 Isaías 60:8 ta describí proféticamente cientos di miles di alabadó nobo cu ta drentando awor den e congregacionnan di Dios su pueblo, manera palomba cu “ta bini bulando net manera un nubia, i mescos cu palomba n’e buracunan di nan kouchi.” Nos tur por invitá personanan recien interesá na nos reunionnan i laga nan sinti cu nan ta bon biní. Dje manera aki, nos lo ta cooperando cu Jehova miéntras cu e ta acelerá e trabou di reuní hende.—Isa. 60:22.