Sea Ansioso pa Predicá e Bon Nobo
1 “Mi ta anhelá pa mira boso . . . Di mi parti tin un deseo intenso di declará e bon nobo na boso tambe.” Asina aki apostel Pablo a expresá su mes na comienso di su carta na e rumannan na Roma. Di con Pablo tabata ansioso pa bishitá nan? E di: “Pa mi por haña algun fruta tambe entre boso . . . Pasobra mi no tin bergwensa dje bon nobo; loke en realidad ta e poder di Dios pa salbacion.”—Rom. 1:11-16.
2 Pablo a reflehá e mésun deseo ansioso aki ora di papia cu e ancianonan di Efeso. El a recordá nan: “For dje promé dia cu mi a pone pia den e distrito di Asia . . . , mi no a nenga . . . di siña boso públicamente i di cas pa cas. Sino mi a duna testimonio cabalmente tantu na hudiu como na griego.” (Echo. 20:18-21) Pablo tabata decididu pa plama e bon nobo di salbacion i adkerí fruta di Reino den henter su teritorio asigná. Esta un excelente actitud pa imitá!
3 Nos lo por puntra nos mes: ‘Ami ta mustra e mésun deseo ansioso ei pa declará e bon nobo den mi comunidad? En bes di mira e trabou di predicá como djis un deber, mi ta ansioso pa compartí e bon nobo cu mas tantu hende posibel? Mi a considerá mi circunstancianan huntu cu oracion? Mi a purba tur e posibilidadnan cu tin den nos teritorio, manera, predicá di cas pa cas, riba caya, den áreanan di negoshi, via telefon i informalmente?’
4 Sea Ansioso pa Participá Durante April: E luna di april ta un bon luna pa intensificá nos participacion personal den e trabou di predicá. Awor cu a reducí e rekisito di ora, lo mester ta posibel pa mas ruman traha pionero auxiliar. Kisas bo circunstancianan lo permití bo sirbi como pionero auxiliar durante april cu mei. Of kisas lo ta posibel pa bo inscribí como pionero regular, ya cu a ahustá e rekisito di ora. Si bo ta un publicadó di congregacion, lo bo por dedicá mas ora cu normal den sirbishi e luna aki i esun siguiente, i asina apoyá esnan cu sí por traha pionero? Esei lo haci Jehova su curason contentu!
5 Mescos cu Pablo, publicadónan di Reino mester sigui manifestá un deseo ansioso dor di extendé nan mes den e trabou di predicá. Haciendo tur loke nos por den e ministerio lo duna nos berdadero goso. Pablo tabatin e goso aki den su sirbishi sagrado. Nos ta haci bon di imitá su excelente ehempel.—Rom. 11:13; 1 Cor. 4:16.