Siña Otro Hende Beneficiá Nan Mes
1 Jehova kier pa tur hende beneficiá nan mes. (Isa. 48:17) E sa kico ta duna nos berdadero felicidad. Su deseo sincero ta pa hende evitá calamidad i disfrutá di bida dor di presta atencion na su mandamentunan. Nos ta beneficiá nos mes mashá dor di hiba nos bida manera Dios ta manda. (Sal. 34:8) Con nos por siña otro hende haci mescos?
2 Kico Hende Kier? Kico ta interesá doñonan di cas caminda bo ta biba? No ta siguridad di nan cas, un matrimonio sólido, futuro di nan yunan i cosnan por estilo? Ora nan tin problema, unda nan ta acudí pa yudansa? Por ta nan ta confia den nan mes, of den programanan cu ta mustra bo con pa yuda bo mes of den e guia di otro hende. Pero, hopi di nan ta keda tur tolondrá dor dje ideanan inconsistente i impráctico cu nan ta haña tocante con pa beneficiá nan mes. Nos tin cu convencé nan cu e guia cu e Palabra di Dios ta ofrecé ta hopi mas mihó. (Sal. 119:98) Nos por haci esaki dor di mustra nan con nan por mehorá e calidad di nan bida for di awor mes, si nan haci esfuerso pa studia Bijbel i aplicá loke e ta bisa.—2 Tim. 3:16, 17.
3 Un Mihó Bida di Famia: Poco hende ta realisá con bon e conseho inspirá na Efesionan 5:22–6:4 ta, den duna resultado pa resolvé problemanan di famia. Esaki tabata e caso di un pareha cu, despues di dies aña di matrimonio, a dicidí cu nan ta bai separá. Sin embargo, e rumannan a cuminsá un studio di Bijbel cu e señora, i a siñ’é principionan bíblico relacioná cu bida casá. No a tarda hopi cu e esposo a ripará e cambionan cu su señora tabata haci segun cu el a aplicá principionan bíblico, i e esposo a djoin e studio. Despues el a bisa: “Awor nos a haña e base pa un bida di famia berdaderamente felis.”
4 Berdadero Propósito den Bida: Ora un hóben drogadicto a busca yudansa cerca e Testigonan, nan a siñ’é cu Jehova ta interesá den dje personalmente. E di: ‘Mi a siña cu e Creador tin un propósito pa hende i ta ofrecé bida eterno na esnan cu tin su aprobacion. Bo no por imaginá con felis mi a sinti mi ora mi a haña sa esaki. Awe mi ta gosa di bon salú, pas mental i un relacion íntimo cu Dios.’
5 Tur hende por beneficiá dje yudansa práctico cu tin den e Palabra di Dios. Dor di us’é como nos guia, nos ta confirmá cu e caminda di Jehova ta hopi mas superior cu e camindanan di mundu. (Sal. 116:12) Nos tin e privilegio di transmití e mensahe aki na otro hende, i siña nan beneficiá nan mes. Ora nos ta haci esei, nos lo mira hopi resultado excelente.