Bo Ta Wak e Aparencia Exterior So?
1 Den nos ministerio público, nos promé impresion di algun hende lo por pone nos vacilá pa compartí e bon nobo cu nan. Por ehempel, con lo bo a reaccioná si un homber cu cara masha cerá, semper ta keda wak bo tur desconfiá ora bo yama na cas di su bisiña cu ta mustra interes den e berdad? Un ruman muher pionero cu a experenciá esaki a dicidí di acercá e homber i papia cuné. E homber a cumind’é cu mal airu. Pero, sorprendentemente, el a scucha e mensahe di Bijbel i un poco excitá el a bai eens pa studia. Como cu e ruman aki no a husga e persona pa su aparencia exterior, caminda a habri pa e homber aki i su esposa siña e berdad.
2 Un otro ruman muher, a spanta na promé instante dje aparencia di un yoncuman cabei largu, pero el a sigui dun’é un testimonio breve ki ora cu e mucha homber a drenta e tienda caminda e tabata traha. Su esfuersonan a duna fruta, i awor e yoncuman ta un Testigo bautisá. Kico lo yuda nos pa nos no core concluí cu hende asina lo no respondé faborabel?
3 Imitá e Ehempel di Jesus: Jesus tabata sa cu lo el a duna su bida pa tur hende. P’esei, e aparencia exterior di hende no a descurash’é. El a realisá cu asta esnan di mal reputacion moral por tabata dispuesto pa cambia, si duna nan e debido yudansa i incentivo. (Mat. 9:9-13) El a purba yuda tantu ricu como pober. (Mat. 11:5; Mar. 10:17-22) P’esei, laga nos no husga e hendenan cu nos ta topa den e ministerio a base di nan aparencia exterior, i asina ciega nos mes pa loke kisas ta un bon condicion di curason. (Mat. 7:1; Juan 7:24) Kico por yuda nos imitá e ehempel sobresaliente di Jesus?
4 Mediante nos studio di Bijbel, nos a bin comprendé cu e Palabra di Dios tin e poder di cambia un hende su manera di pensa, su conducta i su personalidad. (Efe. 4:22-24; Heb. 4:12) P’esei, aunke nos ta tene cuidou, nos mester tin un actitud positivo dor di duna tur hende testimonio i laga sobrá den man di Jehova, Esun cu ta lesa curason di hende.—1 Sam. 16:7; Echo. 10:34, 35.
5 Laga cu e manera imparcial cu nos ta compartí e bon nobo cu tur clase di hende, sin importá nan aparencia exterior, contribuí na e gran trabou di cosecha den e último dianan aki.—1 Tim. 2:3, 4.