E Porta pa Traha Pionero A Habri pa Bo Awor?
1 Nos texto di aña 1999 ta recordá nos cu ainda nos ta den Jehova su “dia di salbacion.” (2 Cor. 6:2) Pero un djis aki su dia di salbacion lo terminá. E ora ei su “dia di huicio” lo cuminsá. (2 Ped. 2:9) Miéntras cu Jehova ta sigui ofrecé humanidad e oportunidad pa salbacion, esta emocionante ta pa mira cu cada bes mas i mas hende ta reaccioná faborablemente!
2 Jehova su pueblo ta haci esfuerso pa cumpli cu e desafio di alcansá esnan cu ta reaccioná faborabel promé cu ta muchu lat. Pa hopi publicadó di Reino, esaki a nificá drenta den e sirbishi di pionero. E porta pa traha pionero a habri pa bo awor? Di con nos ta puntra esei?
3 Aprecio cu Rumannan A Expresá: Manera Nos Ministerio di Reino di januari 1999 a anunciá, a baha e rekisito di ora tantu pa pionero regular como auxiliar. Pa cumpli cu e rekisito nobo, pioneronan regular tin cu dedicá 70 ora den e ministerio tur luna, pa un total di 840 ora pa aña di sirbishi. Pioneronan auxiliar lo pasa 50 ora den sirbishi pa luna. Ata aki un par dje hopi expresionnan di aprecio cu Sociedad a ricibí como resultado dje ahustenan aki:
“Esta un regalo maraviyoso for di nos Tata celestial!”
“No tin palabra pa expresá e emocionnan di goso, amor i gratitud pa e percuracion aki!”
“Awor lo ta hopi mas fácil pa cumpli cu nos schedule!”
“Nos ta haci oracion pidi pa awor hopi mas tantu ruman drenta den e ministerio di tempu completo i disfrutá dje bendicionnan cu ta bini di sirbi Jehova den un gran manera.”
4 Segun cu nos ta acercá e culminacion di Dios su dia di salbacion, ta bisto cu Jehova kier pa su pueblo duna un último gritu poderoso di alabansa. E magnitud i intensidad dje mensahe aki ta aumentá (1) dor dje aumento constante den e cantidad di proclamadónan di Reino i (2) dor cu cada publicadó ta purba aumentá loke e por haci den e predicacion di Reino. Jehova, esun “cu ta hacié crece,” a duna éxito na tur e dos maneranan ei dor di bendicioná e spiritu dispuesto di tur hende cu a aceptá salbacion.—1 Cor. 3:6, 7; Sal. 110:3.
5 No Keda sin Cumpli cu Su Propósito: Tabata relacioná cu Jehova su dia di salbacion cu Pablo a consehá compañeronan cristian: “Trahando huntu cuné [Jehova], nos tambe ta suplicá boso pa no aceptá e bondad inmerecí di Dios i keda sin cumpli cu su propósito.” Nos lo no “keda sin cumpli cu su propósito” si nos mira e tempu aki como “e tempu specialmente aceptabel” pa nos traha pa e salbacion di otro hende na tur oportunidad. (2 Cor. 6:1, 2) Awe, e palabranan di Pablo ta mas urgente ainda. Cristiannan cu ta demostrá un amor sincero pa Jehova ta mir’é como un privilegio pa participá mas pleno posibel den e ministerio cu el a asigná na nan. Abo por participá mas plenamente awor den e ministerio como un pionero regular?
6 Un Meta Razonabel: Pa islanan ABC, nos meta pa 1 di september ta: 100 pionero regular. Nos ta kere cu esaki ta un meta razonabel i alcansabel. Di con nos ta asina sigur? Na mart 1997 nos a mira 257 ruman traha pionero auxiliar, i na april 1998, 237 ruman a haci esei. E mayoria a raportá 60 ora, loke ta 10 ora so ménos cu e rekisito di ora nobo pa pionero regular! Si 24 so di esnan cu a traha pionero auxiliar, inscribí como pionero regular promé cu fin dje aña di sirbishi aki, nos lo por cuminsá september cu 100 of mas pionero di tempu completo!
7 Un Orario Ta Necesario: Ainda 70 ora pa luna den sirbishi di veld ta parce un poco fuera di bo alcanse? Kisas lo ta un yudansa pa cuminsá pensa den término di 17 ora pa siman. Usa e muestra di orarionan riba e siguiente página, i purba crea un orario di pionero regular cu ta pas cu bo circunstancia personal. Ora di traha e orario, papia cu pioneronan experenciá pa bo haña nan conseho i opinion en cuanto con nan ta balansá sirbishi di pionero cu responsabilidadnan personal i di famia. Puntra bo superintendente di circuito con e pioneronan den e circuito ta programá nan actividad di sirbishi pa siman. Anto acudí na Jehova pa e bendicioná bo plannan pa traha pionero.—Pro. 16:3.
8 Hacié un Proyecto di Famia: Bo a considerá pa haci e trabou di pionero un proyecto di famia? Como famia boso lo por sinta huntu i considerá con, cu planeamentu cuidadoso i bon cooperacion, un of dos miembro dje famia lo por traha pionero. Ta di comprendé cu, despues di a evaluá nan circunstancianan onestamente, algun ruman lo ripará cu nan no por traha pionero mesora. Si ta asina, pone e trabou di pionero como un meta pa futuro. Pero cuminsá planea pa yega na un fecha definí pa drenta den e trabou di pionero. Kisas bo por traha pionero auxiliar vários biaha durante e aña pa gradualmente bo yega n’e meta di sirbishi di pionero regular.
9 E casi 80 pioneronan regular cu actualmente ta riba lista na e tres islanan ABC tin diferente circunstancia. No ta tur tin bon salú, i mayoria tin obligacionnan financiero i di famia. Tin pionero cu ta riba e edad di 50 aña, otronan ta riba 65 aña. Tin cu ta soltero. Nan tur ta “cumprando e tempu oportuno” pa traha pionero, loke hopi biaha a nificá hiba un bida mas simpel i tog mas satisfecho.—Col. 4:5.
10 Abo Mester Simplificá? Simplificá bo bida por ta e yabi cu ta habri e porta pa bo traha pionero. Bo bida ta manera un cas grandi yen di kamber i mueblenan innecesario, cu ta rekerí hopi tempu, placa i trabou pa mantené? Si ta asina, adaptá na circunstancianan mas moderá lo por permití bo traha pionero. Bo por baha e cantidad di tempu cu bo ta dedicá na trabou seglar? Bo por cumpra tempu for di actividad inesencial of mustra mas balansa den e cantidad di tempu cu bo ta dedicá na recreo?
11 Bijbel ta consehá nos na 1 Timoteo 6:8: “Teniendo cuminda, paña i dak, nos lo keda contentu cu esakinan.” Keda contentu cu ménos, ta un factor importante pa nos haci tur nos posibel den e sirbishi di Jehova i e ta haci cu ta mas fácil pa nos pone interesnan spiritual na promé lugá. (Mat. 6:22, 33) Na página 104 dje Anuario 1998, den e informe riba Hapon, tabatin vários splicacion di con tin asina un excelente spiritu di pionero den e pais ei. Considerá un: “Por lo general ta cierto cu casnan hapones ta basta modesto, i pues ta rekerí masha tiki tempu pa mantené, i pa mayor parti, hende tradicionalmente ta tene nan bida simpel.” Esei no ta e esencia di 1 Timoteo 6:8?
12 Rond mundu, sirbidónan di Dios ta predicá e bon nobo cu mas i mas intensidad, promé cu Jehova su dia di salbacion yega na su fin. Ta di encomendá cu aña pasá tabatin tur luna un promedio di casi 700.000 ruman cu a participá den un of otro forma di sirbishi di pionero. Abo por ahustá bo bida pa asina djoin nan? Nos ta invitá bo pa examiná bo circunstancianan cuidadosamente huntu cu oracion ora bo ta contestá e pregunta: “E porta pa traha pionero a habri pa bo awor?”
[Blurb on page 3]
META: 100 PIONERO REGULAR!
[Box on page 4]
Muestra di Orario pa Pionero Regular
Tin mester: 17 ora pa siman
Un Dia den Siman i Fin di Siman
Dia Ora
Diabierne 8
Diasabra 6
Diadomingo 3
Total di Ora: 17
Dos Dia den Siman i Diasabra
Dia Ora
Diamars 7
Diahuebs 7
Diasabra 3
Total di Ora: 17
Tres Dia den Siman i Diadomingo
Dia Ora
Dialuna 5
Diarason 5
Diabierne 5
Diadomingo 2
Total di Ora: 17
Dos Anochi i Fin di Siman
Dia Ora
Dialuna 3
Diarason 3
Diasabra 8
Diadomingo 3
Total di Ora: 17
Crea Bo Mes Orario di Pionero Regular
Dia Ora
Dialuna
Diamars
Diarason
Diahuebs
Diabierne
Diasabra
Diadomingo
Total di Ora: 17