Tur Dios Su Palabra Profético Lo Ser Realisá!
1 Semper Testigonan di Jehova tabata interesá den profecia bíblico. P’esei, nos a keda emocioná ora nos a haña sa cu e tema dje congreso di distrito dje aña aki lo tabata “Dios Su Palabra Profético.” Nos tabata ansioso pa sa ki “alimento n’e debido tempu” Jehova tabatin prepará pa nos. (Mat. 24:45) I e no a desapuntá nos.
2 Puntonan Sobresaliente dje Congreso: E discurso clave di diabierne, “Presta Atencion na Dios Su Palabra Profético,” a incluí un consideracion iluminador dje relato di transfiguracion. (Mat. 17:1-9) E discurso a enfatisá cu n’e momento aki nos ta na drempel dje mihó tempu ya cu nos ta hopi, hopi leu den e tempu di fin, i e sistema nobo ta djis nos dilanti! Un manera importante cu nos mester presta atencion na e Palabra di Dios ta dor di les’é cu regularidad. E simposio “Haña Deleite den Lesa e Palabra di Dios” a duna sugerencianan práctico pa haci nos lesamentu di Bijbel mas probechoso i dushi.
3 Diasabra atardi nos a repasá motibunan pakico nos mester ta convencí cu nos ta bibando den e último dianan. Bo ta corda nan tur? Diadomingo mainta, e profecia di Habacuc a haña bida, ora nos a haña sa cu nos tempu ta parce esun di Habacuc mashá, i cu sucesonan sumamente importante lo tuma lugá djis aki ora Jehova destruí e malbadonan i salba e hustunan. Bo a capta e punto dje drama bíblico tocante Jacob cu Esau? Nos tin cu busca Jehova su bendicion den un manera activo, resistiendo e spiritu di apatia i indiferencia.
4 Un Buki Nobo Intrigante: Esta emocioná nos a keda ora nos a haña e buki nobo Presta Atencion na e Profecia di Daniel! Sin duda, bo a cuminsá lesa e buki fasinante aki caba. E orador cu a present’é a bisa: “Cu excepcion di un par di detaye, tur e profecianan den e buki di Daniel a cumpli.” Esei no ta enfatisá e urgencia di nos tempu?
5 E programa di congreso a fortalecé mashá nos conviccion cu tur e promesanan di Dios cu no a cumpli ainda, lo ser realisá. Nos a ser stimulá pa sigui declará Dios su palabra profético na otro hende!