Usa Tratado pa Cuminsá Combersacion
1 Bo no ta di acuerdo cu pa bo duna un testimonio eficas ta dependé hopi di bo iniciativa pa cuminsá combersacion? E desafio ta pa bisa algu cu ta capta interes dje persona i ta enbolb’é den e combersacion. Pero con bo por haci esaki den un manera eficas?
2 Hopi publicadó a ripará cu dor di expresá algun palabra bon scogí i ofrecé un di nos tratadonan basá riba Bijbel, nan por cuminsá combersacion. E temanan ta atractivo, e pinturanan ta colorido i yamativo. Un tratado no ta duna un persona e impresion abrumador di cu e tin hopi informacion pa lesa. Tog, e mensahenan breve i al caso den e tratadonan ta capta atencion i por usa nan pa cuminsá un studio di Bijbel.
3 E sintimentunan personal di un Testigo tabata: “Den e mundu druk aki, hopi bes hende no kier tuma masha tempu pa lesa, pero e tratadonan ta net suficiente largu pa duna un mensahe importante i tog no asina largu pa alehá hende asta promé cu nan tira un bista riba dje. Mi a lesa hopi dje tratadonan i cu tempu mi a siña e berdad.” Nunca subestimá e poder dje Palabra di Dios, cu e mensahenan breve imprimí aki ta splica.—Heb. 4:12.
4 Cuater Paso Fácil: Hopi publicadó a logra éxito dor di usa un método simpel. (1) Mustra e persona algun tratado i puntr’é cua di nan ta interes’é. (2) Despues cu e persona scoge unu, hacié un pregunta bon prepará cu ta resaltá un punto principal dje tratado. (3) Pa contestá e pregunta, lesa un paragraf of texto apropiado for dje tratado. (4) Si su reaccion ta faborabel, sigui considerá e contenido dje tratado of referí na un les den e foyeto Rekerí of na un capítulo den e buki Conocimentu cu ta duna mas informacion riba e tema ei. Dje manera aki bo por cuminsá un studio directamente. E siguiente sugerencianan lo yuda bo prepará loke bo por bisa ora di usa cuater dje tratadonan.
5 Bo por usa e tema dje tratado “Ken Realmente Ta Goberná e Mundu?” como un pregunta.
◼ Si e persona cu ken bo ta combersá contestá “Dios” of “mi no sa,” lesa e promé dos frasenan na página 2 i e promé paragraf na página 3. Resaltá 1 Juan 5:19 i Revelacion 12:9. Sea cu e persona ta duda cu Satanas e Diabel ta existí of no, of e ta reconocé cu e tin influencia riba mundu, bo por sigui e liña di razonamentu bou dje subtema “Un Indicacion for di Condicionnan Mundial,” pa sigui e combersacion. Si e persona mustra interes, ofrecé pa splik’é di unda Diabel a bini, mediante e puntonan na página 3 i 4 dje tratado.
6 E tratado “Ki speranza tin pa stimánan cu a fayecé?” lo por lanta interes mesora. Lo bo por cuminsá un combersacion dor di puntra:
◼ “Bo ta kere cu un dia nos lo por mira nos sernan kerí cu a muri atrobe?” Despues cu e persona contestá, señalá n’e di dos paragraf na página 4 dje tratado i lesa Juan 5:28, 29. Anto splica cu e texto ei ta yuda nos comprendé e informacion bou dje promé subtema den e tratado. Ofrecé pa consider’é huntu.
7 E tratado “Disfrutá di Bida di Famia” ta atraé tur clase di famia. Ora di us’é, bo por bisa:
◼ “Probablemente bo ta di acuerdo cu famia ta bou di atake awe. Kico bo ta kere hende por haci pa fortalecé e banchi di famia?” Despues cu e persona contestá, dirigí su atencion n’e puntonan den e promé paragraf na página 6. Scoge un dje textonan citá na página 4 i 5 dje tratado, i splica su nificacion. Anto ofrecé un studio di Bijbel grátis.
8 Lo bo por usa e tratado “Pakiko bo por konfia e Beibel” cu e presentacion aki:
◼ “Mayoria hende a tende dje historia di Cain cu Abel, cu nos ta haña den e promé buki di Bijbel. E relato di Génesis ta referí tambe na e esposa di Cain. Bo a yega di puntra bo mes di unda el a bini?” Usa e último paragraf na página 2 dje tratado pa duna e contesta. Splica cu e tratado ta considerá tambe Bijbel su comentarionan importante di loke nos futuro ta encerá. Cuminsá cu e di tres paragraf na página 5, i sigui cu e consideracion usando e textonan cu ta apoyá esaki.
9 Atrabes di tempu, distribucion di tratadonan bíblico a duna prueba di ta un medio eficas pa presentá e bon nobo. Dor cu nan ta fácil pa hiba unda cu bo ta bai, bo por usa nan eficasmente den bo actividad di cas-pa-cas i ora bo ta duna testimonio informal. Tratado ta hunga un papel importante den cumpli cu nos ministerio. Haci sigur di cana cu un variedad, i usa nan liberalmente pa cuminsá combersacion.—Col. 4:17.