Usa Tratado pa Plama e Bon Notisia
1. Kon e pueblo di Dios a usa tratado?
1 Pa hopi tempu kaba e pueblo di Yehova a bin ta usa tratado bíbliko pa plama e bon notisia. Na 1880, C. T. Russell i su kompañeronan a kuminsá publiká tratado pa e lesadónan di E Toren di Vigilansia parti pa otro hende. Tratado tabata asina importante ku na 1884 ora C. T. Russell a registrá un korporashon legal no-komersial pa promové interesnan di Reino, el a inkluí e palabra ingles “tract” (tratado) den e nòmber di e korporashon: Zion’s Watch Tower Tract Society (awor konosí komo Watch Tower Bible and Tract Society of Pennsylvania). Pa aña 1918, e Studiantenan di Beibel a laga mas ku 300 mion tratado. Te awe tratado ta un hèrmènt práktiko pa prediká kuné.
2. Dikon e tratadonan ta práktiko?
2 Nan Ta Práktiko: E tratadonan ta kolorido i yamativo, i nan mensahe ta breve, informativo i fasinante. Nan ta atraé e doñonan di kas ku ta haña ku un revista òf buki ta muchu pa lesa. Nan ta fásil pa asta publikadó nobo i mucha ofresé. Ademas, komo ku nan ta chikí, ta fásil pa nos tin nan huntu ku nos tur ora.
3. Konta un eksperensia personal òf un ku a sali den nos publikashonnan ku ta mustra e balor di tratado.
3 Hopi hende a konosé e bèrdat pa medio di un tratado. Por ehèmpel, un señora na Haiti a haña un di nos tratadonan abou na suela. El a kue, les’é i bisa: “Mi a haña e bèrdat!” Ku tempu, el a bai Salòn di Reino, a kuminsá studia Beibel i a batisá, tur esaki debí na e poder di e Palabra di Dios ku tin den un tratado.
4. Kiko ta nos meta ora nos tin tratado komo oferta di luna?
4 Di Kas pa Kas: Ya ku tratado ta un hèrmènt masha útil pa duna testimonio, kuminsando na novèmber, de bes en kuando nan lo ta nos oferta di luna. Klaru, nos meta no ta pa djis duna e doño di kas un tratado, sino usa esaki pa kuminsá un kòmbersashon. Si na e promé bishita òf rebishita nos mira ku e persona tin interes, nos por splik’é kon nos ta studia Beibel ku hende usando e buki Beibel Ta Siña òf un otro publikashon di estudio. Kon nos por ofresé tratado? Komo ku tin diferente tratado, lo ta bon pa nos konosé kontenido di esnan ku nos ta bai ofres’é.
5. Kon nos por ofresé tratado di kas pa kas?
5 Nos mester adaptá nos presentashon na e tratado ku nos ta usa i na e teritorio. Nos por kuminsá e kòmbersashon dunando e doño di kas e tratado. Kisas e parti dilanti yamativo por lanta su interes. Òf nos por mustra e doño di kas diferente tratado i lag’é skohe esun ku e ta haña interesante. Si nos ta den un teritorio kaminda hende tin miedu di habri porta, nos por tene e tratado di tal manera ku e doño di kas por mira e tema, òf nos por puntr’é si nos por pasa e tratado bou di su porta i haña su opinion tokante e tema. Si e tema di e tratado ta den forma di un pregunta, nos por pidié su opinion tokante dje. Òf nos mes por hasi un pregunta ku ta lanta interes i ku ta hiba na kòmbersashon. E ora ei nos por lesa parti di e tratado ku e doño di kas, i kaminda tin pregunta nos por pousa pa puntra e doño di kas su opinion. Lo ta bon pa lesa e tekstonan klave for di Beibel. Despues di konsiderá un parti di e informashon, nos por konkluí e kòmbersashon i traha un afsprak pa bolbe. Si nos kongregashon tin kustumber di laga literatura ora no tin hende na kas, nos por laga un tratado na un lugá ku ta for di bista di otro hende.
6. Kon nos por usa tratado pa prediká riba kaya?
6 Riba Kaya: Bo a yega di usa tratado ora di prediká riba kaya? Tin hende tin purá i no ta dispuesto pa para kòmbersá ku nos. P’esei no ta fásil pa determiná kuantu interes nan tin. Den un kaso asina, ta mihó duna nan un tratado i no e último revistanan, ya ku nos no sa si nan lo lesa e revistanan. Debí ku e parti dilanti di e tratado ta yamativo i su mensahe ta breve, e por lanta hende su kuriosidat i motivá nan pa lesa e tratado ora nan ta mas trankil. Klaru, si nan no tin purá, nos por konsiderá un parti di e tratado ku nan.
7. Konta algun eksperensia ku ta mustra kon pa ofresé tratado ora di duna testimonio informal.
7 Testimonio Informal: Ta fásil pa duna testimonio informal ku tratado. Un ruman hòmber ta hinka un par den su saku ki ora ku e sali kas. Ora e topa un hende, manera un trahadó den un pakus, e ta ofres’é un tratado. Un pareha ku a bai keiru na New York tabata sa ku nan lo a topa hende di diferente pais. P’esei nan a disidí di bai ku e foyeto Bon Nobo pa Hende di Tur Nashon i vários tratado den diferente idioma. Anto, ora nan a topa un hende ku tabata papia un otro idioma ta bende kos riba kaya, sintá banda di nan den un parke òf den un restorant, nan tabata ofres’é un tratado den su idioma.
8. Dikon por kompará tratado ku simia?
8 “Sembra Bo Simia”: Por kompará tratado ku simia. Un sembradó ta stroi hopi simia pasobra e no sa kua ta bai sprùit. Eklesiástes 11:6 ta bisa: “Sembra bo simia mainta, i no keda sin hasi nada atardi; pasobra bo no sa si sembramentu di mainta òf di atardi lo tin éksito, òf si nan tur dos lo ta bon.” Pues laga nos sigui “plama konosementu” pa medio di e hèrmènt práktiko akí pa duna testimonio.—Pro. 15:7.
[Komentario na página 3]
Ya ku tratado ta un hèrmènt masha útil pa duna testimonio, kuminsando na novèmber, de bes en kuando nan lo ta nos oferta di luna