Tratado Nobo, Diseño Nobo!
1. Ki publikashon pa sirbishi tin un diseño nobo?
1 Na e Kongreso di Distrito 2013 “E Palabra di Dios Ta e Bèrdat!” nos a haña sinku tratado nobo. Despues a agregá e Notisia di Reino Num. 38, “E Mortonan Por Bolbe Biba?” na e grupo di tratadonan akí. Nan tur seis tin un diseño nobo ku ta masha práktiko. Dikon e kambio akí? Kon nos por usa e aspektonan nobo di e tratadonan akí den e trabou di kas pa kas?
2. Kon e diseño nobo di e tratadonan ta yuda nos?
2 Dikon un Diseño Nobo?: Pa nos por logra bon resultado den sirbishi di kas pa kas, nos mester kumpli ku e kuater puntonan akí: (1) Puntra e persona su opinion pa kuminsá ku e kòmbersashon. (2) Mustr’é loke Beibel ta bisa. (3) Ofres’é algun publikashon pa e lesa. (4) Laga un pregunta pendiente pa kontestá na e siguiente bishita i traha un afsprak pa bolbe. E diseño nobo di e tratadonan ta yuda nos kumpli na un manera fásil ku e kuater puntonan akí.
3. Kon nos por ofresé e tratadonan nobo den sirbishi?
3 Kon pa Usa Nan: (1) Despues di kumindá e persona, mustr’é e pregunta interesante ku tin parti dilanti di e tratado, i pidié su opinion. (2) Habri e tratado i kòmbersá riba “Loke Beibel Ta Bisa.” Si ta posibel, lesa e teksto direktamente for di Beibel. Si e persona tin tempu, analisá “Kiko Esaki Por Nifiká pa Nos?” (3) Ofres’é e tratado i pidié pa lesa e sobrá informashon despues. (4) Promé ku bo bai, mustr’é e pregunta parti patras di e tratado bou di e suptema: “Algu pa Pensa Ariba” i traha un afsprak pa bolbe i analisá e kontesta ku Beibel ta duna.
4. Kon nos por usa e tratadonan nobo ora di hasi rebishita?
4 Ta fásil pa hasi e rebishita tambe. Djis usa e tekstonan ku tin parti patras di e tratado pa kontestá e pregunta ku bo a laga pendiente na bo último bishita, i hala e persona su atenshon na e potrèt di e foyeto Bon Notisia ku tin riba e tratado. Promé ku bo bai, mustr’é e foyeto i e lès ku ta duna mas informashon relashoná ku e tema ku boso a kaba di trata, i ofres’é e foyeto. Si e aseptá e foyeto, traha un afsprak pa analis’é na e siguiente bishita. Asina bo a kuminsá ku un estudio di Beibel. Òf, na lugá di ofresé e foyeto, bo por ofresé un otro tratado i traha un afsprak pa analis’é ku e persona.
5. Pakiko ta bon pa usa nos tratadonan den sirbishi?
5 Pa mas ku 130 aña kaba nos ta usa tratado den nos sirbishi. Nan a kambia di tamaño i diseño, pero nan ta bon yudansa pa duna testimonio. Laga nos hasi bon uso di nan diseño nobo pa sigui plama e konosementu di Beibel rònt mundu.—Pro. 15:7a.