Considerá Jehova Su Palabra Tur Dia!
1 Tur dia nos fe ta enfrentá desafionan nobo. Kisas un conocí mundano dje sexo opuesto ta sigui preshoná bo pa bai sali cuné. Bo maestro kier pa bo sigui un carera seglar of bo doño di trabou kier pa bo traha mas tantu ora. Kisas bo salú ta bayendo atras. Maske pruebanan asina por confrontá bo ki ora cu ta, bo no ta bo so. Jehova ta cla pa duna bo e sabiduria necesario pa trata cu nan. Un manera pa bo asimilá e Palabra di Jehova riba un base regular ta dor di considerá e texto bíblico i comentarionan for di Examinando e Scritura. Bo ta probechá dje percuracion aki?
2 Tin Yudansa Disponibel: Isaías 30:20 ta describí Jehova como e “Magnífico Instructor” na ken e pueblo di Dios por acudí pa yudansa. E ta duna bo net loke bo tin mester pa enfrentá e desafionan contra bo fe. Con asina? E siguiente versículo ta splica: “Bo propio oreanan lo tende un palabra bo tras ta bisa: ‘Esaki ta e caminda. Cana den dje.’ ” Awe, Jehova ta manda su “palabra” mediante e Scritura i e publicacionnan di “e esclabo fiel.” (Mat. 24:45) Den edicionnan di pasado di E Toren di Vigilancia so caba tin un abundancia di sabiduria cu ta trata prácticamente cu tur aspecto di bida cristian. Repasando esnan cu Examinando e Scritura ta cita, ta yuda bo edificá un mangasina di conocimentu cu ta di balor incalculabel ora di trata cu tur sorto di prueba.—Isa. 48:17.
3 Traha Tempu P’e: Maske e tabata hopi druk parti mainta, tog un mama a soru p’e lesa i considerá e texto cu su comentario ora su yu homber tabata come su desayuno. E palabranan ei huntu cu oracion tabata e último palabranan cu e yu tabata tende tur mainta promé cu e bai scol. Nan a fortifik’é pa resistí avancenan sexual, pa tuma un posicion cu no ta comprometé su principionan relacioná cu nacionalismo i pa duna testimonio cu curashi tantu na studiante como maestronan. Aunke e tabata e único Testigo na scol, nunca e no a sintié su so.
4 Acudí na Jehova i su Palabra pa direccion i guia. Si bo haci esei, Jehova lo ta real pa bo, manera un amigu di confiansa. Acudí na dje tur dia! Laga bo wowonan bira “wowonan cu ta mira bo Magnífico Instructor,” huntu cu miyones di otro hende rond mundu cu ta consultá e Palabra di Dios tur dia.