Bo Ta Kla pa Skol?
1. Ki oportunidat tin bo dilanti awor ku skol ta bai kuminsá?
1 Abo, komo un hóben kristian, ta bai enfrentá reto- i preshonnan nobo na skol, sea ku esaki ta bo promé aña òf djis un otro aña mas na skol. Pero tambe bo tin bo dilanti oportunidatnan nobo pa “duna testimonio di e bèrdat.” (Juan 18:37) Bo ta bon prepará i kla pa duna testimonio?
2. Menshoná algun manera ku bo ta demostrá ku bo ta kla pa skol.
2 Bo a haña basta entrenamentu serka Yehova, serka bo mayornan i serka e esklabo fiel i prudente pa yuda bo di manera ku bo por tin éksito den tur aspekto di bida. (Pro. 1:8; 6:20; 23:23-25; Efe. 6:1-4; 2 Tim. 3:16, 17) Kasi sigur bo sa kaba ki retonan bo por ferwagt na skol. Prepará bo mes pa duna testimonio a base di e entrenamentu ku bo a haña di loke Dios ta rekerí i e echo ku bo sa ki ambiente bo ta bai haña bo kuné. (Pro. 22:3) Pensa seriamente riba e instrukshon- i sugerensianan bíbliko útil ku bo a haña den e dos bukinan di Hóbennan sa puntra i tambe den artíkulonan relashoná ku esei ku a sali regularmente den ¡Despertad!
3. Menshoná algun manera ku lo bo por duna testimonio.
3 Skol ta bo teritorio úniko, i lo bo tin chèns di duna testimonio den vários manera. Ora otro hende opservá bo manera ehemplar di bisti i peña, bo komportashon i manera di papia, e rèspèt ku bo ta mustra na bo kompañeronan di klas i na maestronan, asta e puntonan ku bo ta haña, i nan ta sinti ku bo tin un fundeshi sólido den bida, algun di nan lo por puntra: “Dikon bo ta otro asina?” (Mal. 3:18; Juan 15:19; 1 Tim. 2:9, 10) Lo bo por haña chèns di duna testimonio i splika kiko ta bo kreensia. Durante e aña eskolar akí, probablemente lo bo enfrentá retonan manera seremonianan nashonalista i dianan di fiesta. Si nan puntra bo dikon bo no ta partisipá den nan, akaso lo bo djis bisa: “Esei ta kontra mi religion; mi ta Testigu di Yehova?” Òf lo bo probechá di e oportunidat pa duna testimonio tokante Yehova, bo Tata amoroso? Bon preparashon bou di e guia di Yehova lo yuda bo pa bo ta kla pa duna un bon testimonio na maestronan, kompañeronan di klas i otro hende.—1 Ped. 3:15.
4. Dikon bo ta sigur ku bo por tin un aña eskolar eksitoso?
4 Maske kisas bo ta un poko nèrvioso pa bai skol, bo por ta sigur ku bo tin e apoyo di hopi hende ku ke pa bo tin un aña eskolar eksitoso. Ademas, nos ta mes kontentu ku bo pa e chèns ku lo bo tin pa prediká na e hendenan den bo teritorio úniko. Pues anto, tene kurashi i sea kla pa skol!