Bo Yunan Ta Bon Prepará?

1. Dikon yunan ku ta bai skol mester ta bon prepará?

¹ Ta falta un par di siman mas pa e aña eskolar nobo kuminsá. Bo yunan lo haña nan ku reto i preshonnan nobo. Pero tambe nan lo haña oportunidatnan nobo pa “duna testimonio di e bèrdat.” (Juan 18:⁠37) Nan ta bon prepará?

2. Kiko bo yunan mester sa pa nan ta bon prepará?

² Bo yunan ta komprondé bon kla kiko seremonianan nashonalista i fiestanan pagano ta enserá i dikon nos no ta partisipá den nan? Nan ta prepará pa enfrentá preshon ku nan lo haña en konekshon ku edukashon avansá, namorashon, uso di alkohòl òf droga? Nan lo djis bisa ku nan no por partisipá den aktividat pasobra e ta bai kontra nan religion, òf nan por splika nan kreensia?​—⁠1 Ped. 3:⁠15.

3. Kon mayornan por usa e anochi di Adorashon Komo Famia pa prepará nan yunan?

³ Hasi Bon Uso di e Anochi di Adorashon Komo Famia: Ta klaru ku durante e aña eskolar boso lo trata diferente tópiko segun e nesesidat di e famia. Pero si boso hasi un esfuerso èkstra promé ku skol kuminsá pa trata e posibel problemanan ku lo presentá, bo yunan lo por enfrentá un situashon ku mas konfiansa. Pakiko no usa ún òf mas anochi di Adorashon Komo Famia pa e propósito akí? Puntra bo yunan kiko ta preokupá nan, spesialmente awor ku skol ta bai kuminsá. Awor ku e yunan a krese i nan tin un mihó komprondementu, repasá informashon ku boso a yega di konsiderá den pasado. (Sal. 119:⁠65) Inkluí seshonnan di práktika tambe. Un mayor por hunga e papel di un maestro, mèntòr òf un kompañero di skol. Siña bo yunan pa duna kontesta for di Beibel i kon nan por usa e buki di Rasonamentu i e dos bukinan di Hóbennan Sa Puntra. Un mama a usa seshonnan di práktika na komienso di kada aña eskolar pa prepará su yunan pa nan sa kon pa aserká nan maestronan nobo i splika ku nan ta Testigu di Yehova.​—⁠Wak E Toren di Vigilansia di 1 di desèmber 2010, página 29-⁠31.

4. Kiko mayornan sabí lo hasi?

⁴ E problemanan ku hóbennan kristian ta enfrentá durante e último dianan akí ta bira kada bes mas i mas difísil pa trata kuné. (2 Tim. 3:⁠1) Mayornan sabí ta antisipá e problemanan akí i ta prepará nan yunan pa enfrentá nan ku éksito. (Pro. 22:⁠3) Hasi tur loke bo por pa bo yunan ta bon prepará promé ku e aña eskolar nobo kuminsá.