Programa di Famia: E Teksto di Dia
1 Mayornan amoroso ta hasi hopi esfuerso tur dia pa perkurá bon alimentashon pa nan yunan. Ta asta mas importante ainda pa perkurá pa nan haña nan alimento spiritual for di e Palabra di Dios. (Mat. 4:4) Un manera ku boso por yuda boso yunan desaroyá un apetit spiritual saludabel i asina ‘krese na salbashon’ ta dor di tuma tempu tur dia pa konsiderá e teksto di dia i su komentario komo famia. (1 Ped. 2:2) Ki ora boso lo por inkluí esei den boso programa di famia?
2 Ora di Kome: Dor di kuminsá boso dia ku e konsiderashon di e teksto, esei lo por yuda boso famia mantené Yehova na mente durante henter e dia. (Sal. 16:8) Un mama a disidí di lesa i konsiderá e teksto i su komentario ku su yu hòmber miéntras ku e yu ta desayuná i kaba hasi un orashon kuné promé ku e bai skol. Esaki a fortalesé su yu pa para firme ora di enfrentá e kuestion di nashonalismo, pa resistí tentashonnan inmoral i duna testimonio ku kurashi tantu na alumno- komo maestronan. Ounke e tabata e úniko Testigu na skol, nunka e no a sintié su so.
3 Si no ta posibel pa konsiderá e teksto mainta, kisas boso lo por konsider’é mas lat komo famia, podisé ora di kome atardi. Algun famia ta papia riba e eksperensianan ku nan tabatin den sirbishi di vèlt i puntonan ku nan a gusta di nan lesamentu personal di Beibel. Hopi ta esnan ku tin grato rekuerdo di e momentunan ku nan a pasa huntu na mesa komo famia, i ta konsiderá e okashonnan ei komo esnan di mas felis ku nan tabatin.
4 Anochi: Pa algun famia, e mihó momentu pa konsiderá e teksto di dia ta nèt promé ku nan bai drumi. Esaki tambe por ta un bon okashon pa hasi orashon huntu. Segun ku boso yunan tende boso papia tur dia tokante Yehova i hasi orashon na dje, e ta bira un persona real pa nan.
5 Yehova bendishoná e esfuerso ku boso ta hasi pa inkulká e bèrdat den boso yunan miéntras ku boso ta hasi bon uso di Eksaminando e Skritura Diariamente.