Bo Ta Hasiendo Bon Uso di e Foyeto Analisá e Skritura Tur Dia?

Bo tin kustumber di lesa e teksto di Beibel i su komentario tur dia den e foyeto Analisá e Skritura Tur Dia? Si esei no ta e kaso, bo por hasi esei parti di bo rutina? Hopi hende ta preferá di analisá e teksto di dia parti mainta, ya asina henter dia nan por meditá riba dje. (Hos 1:8; Sl 119:97) Kon bo por benefisiá mas di e teksto di dia? Lesa konteksto di e teksto di Beibel pa bo komprondé e teksto mihó. Purba di pensa riba un relato di Beibel ku ta enfatisá e prinsipio ku tin den e teksto di dia. Despues, apliká e prinsipio ei den bo bida. Ora bo ta tuma desishon ku ta basá riba e Palabra di Dios, bo ta laga su prinsipionan dirigí bo bida i esei lo benefisiá bo mashá.—Sl 119:105.

Rònt mundu e famia di Bètel ta trata e foyeto Analisá e Skritura Tur Dia ora di desayuno. Den e último añanan, hopi di e programanan di Adorashon di Mainta ta riba JW Broadcasting bou di e sekshon di vidio PROGRAMA- I EVENTONAN. Ki dia tabata e último biaha ku bo a wak un di nan? Kisas algun di nan por ta presis loke bo tin mester. Por ehèmpel, kiko bo por siña for di e relato di Lòt ku por yuda bo ora di tuma desishon?

WAK E VIDIO NO STIMA MUNDU (1HN 2:15), I DESPUES KONTESTÁ E SIGUIENTE PREGUNTANAN:

• Riba ki prinsipio di Beibel e programa di Adorashon di Mainta tabata basá?

• Kiko e relato di Lòt ta laga nos komprondé tokante e peliger di stima mundu i e kosnan ku tin den mundu?—Gén 13:12; 14:12; 19:3, 12, 13, 24-26

• Kon nos por demostrá ku nos ta stima Yehova i no mundu ni e kosnan ku tin den mundu?