Studia Profecia di Daniel
1 Cuminsando e siman di 17 di april, nos lo studia e buki Presta Atencion na e Profecia di Daniel! na Studio di Buki di Congregacion. Hopi ruman a lesa e buki fasinante aki caba, pero awor nos tin e chens di disfrutá dje beneficionan cu ta bini di considerá e informacion den grupo. Tur publicadó, hende interesá i mucha ta invitá, sí, ta ser animá, pa ta presente tur siman pa e studio profundo aki dje buki bíblico di Daniel.—Deu. 31:12, 13.
2 Programa di Studio i Instruccionnan: Den e edicion aki di Nos Ministerio di Reino tin e programa di studio completo pa e buki Profecia di Daniel. Haci sigur di warda un copia den bo buki di studio. E programa ta mustra e capítulo i paragrafnan dje buki i tambe e versículonan di Daniel cu lo trata cada siman. E notanan na final dje programa ta splica con i den ki manera lo considerá algun informacion dje buki. Nos ta animá e conductor pa na conclusion di cada studio semanal, e repasá cu e grupo e versículonan specífico di Daniel cu tin programá pa e siman ei. Segun tempu permití, e rumannan por lesa i comentá riba e versículonan. Tin algun versículo ta pasa di un siman pa otro debí cu e consideracion ta sigui trata nan aplicacion.
3 Prepará pa un Studio Cabal: Nos a haci esfuerso pa por tin suficiente tempu tur siman pa asina no tin nodi considerá e informacion asigná purá-purá. Tin cuater les cu ta basta corticu. Pues, na fin dje studio dje siman di 5 di juni, e conductor por incluí un repaso di Daniel 2:1-40. Pa e siman di 26 di juni, e por repasá Daniel 3:1-30. E siman di 4 di september mester incluí un consideracion cabal di plachi i textonan na página 139. Mester considerá e cuadro na página 188 i 189 durante e studio dje siman di 2 di october.
4 Prepará bon pa e studio di cada siman, i disfrutá di participá den dje. Apreciá bo privilegio di por asociá cu e organisacion visibel di Jehova i beneficiá dje perspicacia i comprendimentu cu su ungínan fiel ta percurá. (Dan. 12:3, 4) Animá otro rumannan bondadosamente pa asistí regularmente n’e studio di buki. Laga nos tur presta atencion na Dios su palabra profético revelá den e buki impresionante di Daniel.—Heb. 10:23-25; 2 Ped. 1:19.