April—Un Tempu pa Ta Celoso pa Obranan Excelente!
1 Ora un horcan ta acercá un área poblá, ta bira urgente pa spierta e hendenan dje peliger cu ta na caminda. Mas cerca e horcan yega, mas fuerte e spiertamentunan mester ta. Di con? Pasobra bida ta den wega! Tin hende cu kisas no a tende e spiertamentunan anterior. Tin otronan cu a tende pero cu a neglishá di tuma accion. Mescos ta conta p’e spiertamentu divino cu nos a ser comisioná pa resoná promé cu e “bientu di tempestad” di Dios su rabia hustu supla tur rastro dje mundu malbado aki bai cuné. (Pro. 10:25) Bida eterno di miles di miyones di hende ta den wega! Mester resoná e spiertamentu. Nos mester ta “celoso pa obranan excelente.”—Tito 2:11-14.
2 Ya pa décadanan, e pueblo di Jehova ta ser motivá pa haci e temporada di Memorial un tempu pa demostrá celo special den e ministerio. Den primavera di 1939, e Informador, predecesor di Nos Ministerio di Reino, a duna e animacion aki: “Ya cu primavera i bon weer ta na caminda, nos por verwagt cu publicadónan [di congregacion] lo dòbel nan oranan den veld, i e pioneronan su tempu lo aumentá significativamente. April ta un luna di cincu diadomingo. Tambe e tin cincu diasabra. Haci tur diasabra i diadomingo durante april . . . un ocasion pa testificacion special.” Pa e rumannan di 60 aña pasá, esei tabata un meta grandi! E aña aki, mescos cu na 1939, e luna di april tin cincu fin di siman completo. Kico ta bo plannan pa e luna aki? Kico bo a skirbi riba bo kalender pa april 2000? Planea pa bo tin un participacion significativo den obranan excelente huntu cu e resto dje pueblo di Jehova durante e luna special aki di mayor actividad spiritual.
3 Loke Nos Ta Spera di Logra: E dia mas importante di aña 2000 ta cai den e luna aki. Esei ta 19 di april, e aniversario di Jesus su morto. Laga nos haci un esfuerso special pa invitá mas tantu hende posibel na Memorial. Manera nos a sugerí luna pasá, traha un lista di tur hende cu posiblemente lo por asistí na Memorial i chek pa no lubidá ningun. Esnan invitá mester incluí tur publicadó inactivo, studiante di Bijbel, rebishita, hende cu a yega di studia un tempu, coleganan di trabou, compañeronan di scol, bisiña, famia i otro conocínan. Esnan cu kier asistí tin transport? Si no ta asina, bo por yuda nan amorosamente? E anochi di Memorial, nos tur lo tin e privilegio di laga esnan cu asistí sinti nan bon biní. Despues di Memorial, nos por sigui duna yudansa spiritual na tur e personanan interesá ei.
4 Un bon manera pa mustra Jehova cu nos di berdad ta apreciá tur loke el a haci pa nos ta dor di ser “celoso pa obranan excelente” durante e dianan promé i despues di Memorial. Claridad di dia cu ta dura mas largu i mihó weer den mayoria lugá lo haci posibel pa hopi di nos aumentá nos esfuerso den e actividad di evangelisá. Si bo ta traha como pionero auxiliar, lo bo kier haci bo best pa dedicá 50 ora of mas n’e ministerio. (Mat. 5:37) Pega estrechamente na e programa cu bo a traha na comienso di luna. (Ecl. 3:1; 1 Cor. 14:40) E resto di nos por haci loke nos por pa duna un man di apoyo na tur pionero, tantu dor di animá nan como dor di traha huntu cu nan den veld. (Compará cu 2 Reynan 10:15, 16.) Si nos sembra cu celo durante april, nos por spera gran goso i un bendicion for di Jehova. (Mal. 3:10) Kisas esaki lo sirbi como un trampolin pa traha pionero auxiliar riba un base continuo of pa bira pionero regular. Nos ta spera cu e empuhe spiritual cu nos adkerí den april ta extendé te den e siguiente lunanan miéntras nos ta sigui como publicadónan di Reino regular.
5 Sin duda, miles di publicadó dje pueblo di Jehova lo cuminsá mas studio di Bijbel e luna aki. Abo lo kier cuminsá unu? Resa pidi specíficamente pa un studio, i traha na armonia cu bo oracion. Bo por tin sigur cu Jehova lo apreciá bo peticionnan humilde pa su yudansa den haña un persona di curason onrado pa siña.—1 Juan 3:22.
6 Ata aki un introduccion probá den veld i cu rumannan a usa cu éxito pa cuminsá combersacion. Bo ta cuminsá dor di puntra: “Bo ta kere cu tur e violencia na scolnan público ta e resultado di actividad di demoño, of ta debí cu muchanan falta entrenamentu di nan mayornan?” Permití contesta. Si e persona bisa “actividad di demoño,” lesa Revelacion 12:9 i 12, i resaltá e papel cu Diabel ta hunga den fomentá turbulencia den mundu. Anto habri e foyeto Rekerí na les 4, i puntra e persona si el a yega di puntra su mes di unda Diabel a bini. E ora ei lesa i considerá e promé dos paragrafnan. Si e persona ta scoge “debí cu muchanan falta entrenamentu di nan mayornan” como e motibu pakico tin violencia na scol, lesa 2 Timoteo 3:1-3 i señalá e rasgonan cu evidentemente ta contribuí na e problema aki. Anto habri e foyeto Rekerí na les 8, lesa §5, i sigui e consideracion. Si bo logra traha un cita pa bolbe bek, anto por ta masha bon cu bo ta riba caminda pa tene un studio di Bijbel regular cu e persona. Durante un otro bishita, puntr’é si e sa di cualkier otro persona cu kisas lo ta interesá pa tende loke e ta siñando.
7 Un otro manera pa ta “celoso pa obranan excelente” durante april ta dor di participá den vários rasgo di predicacion. Bo a bin ta pensa riba duna testimonio den parke of riba un parkeerplaats? Na un parada di bus of na stacion di trein? Of lo bo kier purba duna testimonio via telefon, riba caya of den teritorio di negoshi? Pakico no pone e pensamentunan ei na práctico e luna aki? Jehova lo yuda bo tuma e curashi necesario. (Echo. 4:31; 1 Tes. 2:2b) Kisas bo por palabrá pa traha cu un pionero of un publicadó cu tin experencia den e facetanan aki dje ministerio.
8 Ken cu tin gana di aumentá su participacion den e trabou di duna testimonio lo kier participá den testificacion informal. Hopi bes tur loke esei ta rekerí ta, enbolbé un persona den un combersacion amigabel. Djis plantia un tema di interes general, kisas dor di usa e introduccion mencioná den §6. Purba haci bon uso di asta porcionnan chikitu di tempu cu di otro manera lo a bai perdí. Nos no ta benta dòsplaca, debchi ni dies placa afó, djis pasobra nan no ta un florin completo. Wel, pakico no probechá di asta cincu minuut, dies minuut of un cuart’i ora pa duna testimonio informal?
9 Un Tempu pa Refleccioná: Pensa bek riba e puntonan poderoso presentá den e drama dje Congreso di Distrito di aña pasá, “Dios Su Palabra Profético.” E drama, titulá Laga Nos Apreciá Nos Patrimonio Spiritual, a pone nos pensa cuidadosamente riba e contraste entre Jacob cu Esau. Esau a bisa cu e tabata interesá den cosnan spiritual mescos cu Jacob, pero Esau su obranan no a demostrá esei. (Gén. 25:29-34) Esta un spiertamentu fuerte pa nos! Mescos cu Jacob, laga nos ta cla pa lucha, sí bringa, pa haña Jehova su bendicion. (Gén. 32:24-29) Pakico no usa april i tur e siguiente lunanan pa renobá nos celo, i nunca tuma nos maraviyoso patrimonio spiritual como algu di poco balor?
10 “E gran dia di Jehova ta cerca. E ta cerca, i e ta pura masha tantu.” (Sof. 1:14) Mester sigui anunciá e bon nobo di Reino. Bida ta den wega! Laga e luna aki resultá di ta un luna specialmente bendicioná pa henter Jehova su pueblo segun cu nos unidamente ta mustra cu nos ta “celoso pa obranan excelente.”
[Box on page 4]
Recordatorionan di Memorial
E celebracion di Memorial ta cai e aña aki riba diarason, 19 di april. Ancianonan mester duna atencion n’e siguiente asuntunan:
◼ Na momento di fiha e ora pa e reunion, haci sigur cu lo no pasa e emblemanan sino te despues cu solo baha.
◼ Mester informá tur hende, incluso e orador, dje ora i lugá exacto di e celebracion.
◼ Mester obtené i prepará e tipo corecto di pan cu biña.—Mira La Atalaya di 15 di februari 1985, página 19.
◼ Di antemano mester trece na e salon un mesa apropiado cu paña di mesa, tayó i glas, i pone nan na nan lugá.
◼ For di trempan mester limpia e Salon di Reino of otro lugá di reunion cabalmente.
◼ Di antemano mester scoge ushernan i esnan cu ta pasa cu e emblemanan i instruí nan tocante e procedura corecto i nan tareanan.
◼ Mester haci areglo pa sirbi e emblemanan na cualkier un di e ungínan cu ta enfermo i no por ta presente.
◼ Ora mas cu un congregacion ta programá pa usa e mésun Salon di Reino, mester tin bon coordinacion entre e congregacionnan pa asina evitá congestionamentu innecesario den lobi, n’e entrada, riba acera público i n’e lugá di stacioná auto.