Sigui Predicá!
1 Ta Dios su boluntad pa “tur clase di hende ser salbá i yega na un conocimentu exacto dje berdad.” (1 Tim. 2:4) P’esei el a duna nos e asignacion di predicá e bon nobo. (Mat. 24:14) Si nos ta comprendé pakico nos tin cu sigui predicá, e ora ei ningun desanimacion ni posibel distraicion cu nos encontrá lo no stop nos.
2 Pakico Persistí? Den mundu tin hopi distraicion cu ta pone cu hende ta lubidá of no ta tuma mashá na serio loke nos ta bisa nan. Pues nos tin cu sigui recordá nan di Dios su mensahe di salbacion. (Mat. 24:38, 39) Ademas, circunstancianan den bida di hende ta cambia constant. Asta condicion di mundu por cambia drásticamente di un dia pa otro. (1 Cor. 7:31) Kisas mañan, otro siman of otro luna, e hendenan na ken nos ta predicá ta haña nan confrontá cu problema of preocupacionnan nobo cu ta pone nan pensa seriamente riba e bon nobo cu nos ta trece pa nan. Abo no ta gradicidu cu e Testigo cu a trece e berdad pa bo a persistí?
3 Pa Imitá Dios Su Misericordia: Cu pacenshi Jehova a permití tempu pasa promé cu e ehecutá huicio riba e malbadonan. Via nos e ta sigui apelá na hende di curason sincero pa nan acudí na dje i ser salbá. (2 Ped. 3:9) Nos lo ta culpabel di sanger si nos no proclamá Dios su mensahe di misericordia na hende i spierta nan dje binidero huicio di Dios cu lo ser ehecutá riba tur cu no kita for di nan mal caminda. (Eze. 33:1-11) Aunke no ta semper hende ta ricibí nos predicacion cu gustu, nunca nos no tin cu baha man na haci tur esfuerso pa yuda esnan sincero apreciá Dios su gran misericordia.—Echo. 20:26, 27; Rom. 12:11.
4 Pa Demostrá Nos Amor: Ta Jehova Dios, mediante Jesucristo, ta esun cu a manda pa predicá e bon nobo den tur e tera. (Mat. 28:19, 20) Asta ora hende ta nenga di scucha, nos tin un oportunidad di demostrá nos amor i debocion na Dios dor di persistí den haci loke ta corecto.—1 Juan 5:3.
5 Sea decididu pa sigui predicá! Laga nos sigui haci esei celosamente miéntras cu ainda ta Jehova su “dia di salbacion.”—2 Cor. 6:2.