Pakiko Sigui Prediká?
1 E trabou di prediká e Reino tin hopi tempu ta tuma lugá den bo komunidat? (Mat. 24:14) Si ta asina, kisas bo ta haña ku e kongregashon su teritorio a ser kubrí sufisiente. Awor ora bo ta prediká, kisas mayoria hende ku bo topa ta parse di no ta interesá den e mensahe di Reino. Pero, tuma nota di loke e buki E Profecia di Isaías II ta atmití tokante Hesus su disipelnan berdadero. Na página 141 e ta bisa: “Na algun lugá, kisas e resultado di nan ministerio ta parse insignifikante na komparashon ku e kantidat di trabou i esfuerso ku nan ta dediká na dje. I tòg, nan ta perseverá.” Pero pakiko sigui prediká?
2 Kòrda Yeremías: Nos mester perseverá fielmente den e trabou di prediká sin importá si hende ta skucha nos òf no. Yeremías a prediká 40 aña den e mesun teritorio maske ta masha poko hende a skuch’é i hopi tabata kontra su mensahe. Dikon Yeremías a perseverá? Pasobra e tabata hasi un trabou ku Dios a mand’é hasi. Tambe e tabata sa loke ta bai sosodé den futuro, i esei a obligu’é sigui papia ku kurashi.—Yer. 1:17; 20:9.
3 Nos situashon ta meskos. Hesus a ‘manda nos prediká na e pueblo i duna testimonio ku esaki ta Esun ku Dios a nombra komo hues di e bibunan i di e mortonan.’ (Echo. 10:42) E mensahe ku nos ta hiba ta un asuntu di bida i morto pa esnan ku tend’é. Hende lo ser husgá a base di nan reakshon riba e bon nobo. Siendo ku esei ta e kaso, nos responsabilidat ta pa hasi presis manera Dios a manda nos hasi. Asta ora hende ta nenga di skucha, esaki ta duna nos chèns di demostrá e profundidat di nos amor pa nan i di nos deboshon na Yehova dor di persistí den hasi loke nos tin ku hasi. Pero tin mas motibu.
4 Nos Ta Benefisiá: Hasi e boluntat di Dios, sin importá e reakshon den teritorio, ta duna nos pas interno, satisfakshon i felisidat; kosnan ku nos no por haña di ningun otro manera. (Sal. 40:8) Nos bida ta haña berdadero nifikashon i propósito. Mas nos partisipá den e ministerio, mas nos kurason i mente ta enfoká riba e speransa i goso di biba den Dios su mundu nobo. Dor di meditá riba e promesanan bíbliko aki, nos ta oumentá nos spiritualidat i ta hasi nos relashon ku Yehova mas fuerte.
5 Asta si nos no ta mira resultado mesora den nos aktividat di prediká, kisas nos a planta un simia di e bèrdat den kurason di un persona. E simia ei lo sprùit na Yehova su debido tempu. (Huan 6:44; 1 Kor. 3:6) Ningun di nos no sa kuantu hende mas lo siña tokante e Reino dor di esfuerso ku e pueblo di Yehova ta hasi, sea lokalmente òf mundialmente.
6 Ta mas urgente ku nunka pa nos hasi kaso di Hesus su instrukshon: “Tene kuidou, keda alerta, pasobra boso no sa ki ora e tempu ta yega. I loke mi ta bisa boso, mi ta bisa tur: ‘Keda alerta!’” (Mar. 13:33, 37) Pues anto, laga nos tur sigui deklará e bon nobo di Reino, alegrando Yehova su kurason segun ku nos ta yuda santifiká su gran nòmber santu.