Dikon Nos Ta Bai Bèk Bes Tras Bes
1 Den hopi pais nos ta kubri nos teritorionan ku basta frekuensia. Nos ta sigui bai bèk na e mesun kasnan bes tras bes, ounke e doñonan di kas kisas a bisa nos ku nan no ta interesá. Dikon nos ta sigui bishitá hende ku no a reakshoná faborablemente den pasado?
2 Amor pa Yehova i pa Hende: E motibu prinsipal pakiko nos ta perseverá den e ministerio ta nos amor pa Yehova. Nos kurason ta motivá nos pa sigui konta otro hende tokante nos gran Dios. (Luk. 6:45) Nos amor pa Yehova ta impulsá nos pa obedesé su mandamentunan i yuda otro hende hasi meskos. (Pro. 27:11; 1 Juan 5:3) Nos perseveransia fiel den e trabou aki no ta dependé di e manera ku hende ta reakshoná. Asta ora e kristiannan den promé siglo tabata ser persiguí, nan a “sigui” prediká sin stòp. (Echo. 5:42) Ora hende ta nenga di skucha, nos no ta laga esaki desanimá nos. Mas bien, nos ta keda firme demostrando asina nos profundo amor i deboshon na Yehova.
3 Nos amor pa nos próhimo tambe ta yuda nos perseverá. (Luk. 10:27) Yehova no ke pa ningun hende wòrdu destruí. (2 Ped. 3:9) Asta den teritorionan ku nos ta prediká frekuentemente nos ta sigui haña hende ku ke sirbi Yehova. Por ehèmpel, na Guadelup, kaminda 1 di kada 56 persona ta Testigu di Yehova, tabatin 214 persona ku a batisá aña pasá. Kasi 20.000 persona a asistí na Memorial, mas o ménos 1 di kada 22 persona na Guadelup!
4 Teritorio Ta Kambia: Konstantemente tin otro hende den nos teritorio. E siguiente bes ora nos yama kaminda hende no a reakshoná bon anteriormente, un otro miembro di famia—podisé unu ku nunka no a tende nos mensahe—lo por habri porta i skucha nos. Òf nos por topa ku habitantenan nobo ku sí ta interesá pa skucha. Yunan ku tin mayornan ku tabata kontra ta krese i bandoná kas. Kisas e personanan ei ta dispuesto pa tende e mensahe di Reino.
5 Hende tambe ta kambia. Tabatin un tempu ku apòstel Pablo tabata “un blasfemadó i un persiguidó i masha agresivo mes.” (1 Tim. 1:13) Di mes manera, tin hopi hende ku ta sirbi Yehova awe pero ku anteriormente no tabata interesá den e bèrdat. Tin di nan kisas asta a yega di oponé e bon nobo. Segun ku e kondishonnan di mundu ta kambiando, algun hende ku ántes tabata kontra òf indiferente kisas por ser motivá pa skucha. Otro hende podisé ta bira mas dispuesto pa skucha despues ku nan a haña nan ku un tragedia manera morto den famia, pèrdida di trabou, problema finansiero òf problema ku salú.
6 E sistema di kosnan aki ta yegando su final, pero nos trabou di prediká i siña ta aselerando. (Isa. 60:22) P’esei, nos ta sigui prediká ku entusiasmo i hasi esfuerso pa mantené un aktitut positivo. E siguiente persona ku nos papia kuné kisas lo skucha. Nos tin ku sigui papia! ‘Hasiendo esaki nos lo sigurá salbashon, tantu pa nos mes komo pa esnan ku ta tende nos.’—1 Tim. 4:16.
[Study Questions]
1. Ki pregunta ta surgi tokante nos trabou di prediká?
2. Kiko ta nos motibu prinsipal pa perseverá den e ministerio?
3. Kon amor pa hende lo yuda nos sigui prediká?
4. Den ki manera teritorionan ta kambia?
5. Kiko por pone ku hende ta bira mas reseptivo?
6. Dikon nos tin ku sigui prediká ku entusiasmo?