Di Con Nos Ta Sigui Bai Bek?
1 Bo a yega di haci bo mes e pregunta ei, kisas ora bo tabata preparando pa bai sirbishi? Den algun área caminda nos teritorio ta ser trahá frecuentemente, doñonan di cas tal bes ta reconocé ken nos ta i ta rechasá nos mesora. Solamente un par por ta reaccioná den un manera faborabel. Tog, tin hopi motibu poderoso pakico nos ta sigui bai bek.
2 Promé cu tur cos, nos ta mandá pa sigui predicá e mensahe di Reino te ora cu e fin yega. (Mat. 24:14; 28:19, 20) Profeta Isaías a puntra pa cuantu tempu lo e mester a sigui cu su trabou di predicá. E contesta cu el a ricibí ta registrá na Isaías 6:11. No tin duda—a bis’é pa sigui bai bek n’e pueblo cu e mensahe di Dios. Mescos tambe awe, aunke kisas nan por rechasá nos, Jehova ta spera di nos pa sigui bishitá e hendenan cu ta biba den nos teritorio. (Eze. 3:10, 11) Esaki ta un responsabilidad sagrado cu a ser confiá na nos.—1 Cor. 9:17.
3 Un otro motibu pa nos sigui bai bek ta cu esaki ta duna nos un oportunidad pa mustra e profundidad di nos debocion na Jehova. (1 Juan 5:3) Ademas, ora nos contemplá loke e futuro cercano ta encerá pa humanidad, con nos por keda sin purba amorosamente di spierta nos próhimo? (2 Tim. 4:2; Sant. 2:8) Dor di ta fiel den cumpli cu nos asignacion, nos ta duna nan hopi oportunidad pa nan reaccioná na Dios su mensahe di salbacion, di manera cu nan lo no por bisa cu nan no a ser spiertá.—Eze. 5:13.
4 Ademas, nunca nos sa ki ora algun hende por cambia di parecer. Esei por ser impulsá dor di un cambio den nan circunstancianan personal, un tragedia den nan famia, of condicionnan mundial cu ta pone nan pensa seriamente riba nan futuro. Na otro un banda, algu cu nos bisa na nan porta lo por causa un reaccion faborabel. (Ecl. 9:11; 1 Cor. 7:31) Tambe, hende ta muda. Nos por haña habitantenan nobo den nos teritorio cu lo reaccioná faborablemente n’e bon nobo—kisas adultonan hóben cu awor ta biba riba nan mes i ta pensando seriamente tocante nan propósito den bida.
5 Nos lo sigui bai bek? Sí! E Scritura ta duna nos hopi motibu pa sigui bai bek cerca e hendenan bes tras bes. Al final, ora e trabou di predicá ta cla, Jehova lo bendicioná nos pa nos esfuerso continuo den e ministerio, i lo e bendicioná esnan cu a respondé cu aprecio n’e bon nobo di Reino.—1 Tim. 4:16.